ଚେନ୍ନାଇ: କୃଷକଙ୍କ ଉତ୍ପାଦିତ ବିଭିନ୍ନ ଖାଦ୍ୟଶସ୍ୟ ଉପରେ ସର୍ବନିମ୍ନ ସହାୟକ ମୂଲ୍ୟ(ଏମ୍ଏସ୍ପି) ଜାରି ରହିବ। ଏହା ବର୍ତ୍ତମାନ ପ୍ରଦାନ କରାଯାଉଥିବା ବେଳେ ଆଗକୁ ମଧ୍ୟ ପ୍ରଦାନ କରାଯିବ ବୋଲି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ ମଙ୍ଗଳବାର ସ୍ପଷ୍ଟ କରିଛନ୍ତି। ନୂଆ କରି ଆସିଥିବା କୃଷି ବିଲ୍କୁ ନେଇ ସେ କଂଗ୍ରେସକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ଧାନ ଏବଂ ଗହମ ବ୍ୟତୀତ ଯେଉଁମାନେ ଅନ୍ୟ କୌଣସି ବର୍ଗରେ ଏମ୍ଏସ୍ପି ଦେଉ ନ ଥିଲେ ସେମାନେ ଆଜି ଅଯଥା ଦ୍ୱନ୍ଦ୍ୱ ସୃଷ୍ଟି କରୁଛନ୍ତି। କେନ୍ଦ୍ର ସରକାର ଆଣିଥିବା ନୂଆ ଆଇନରେ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ବିଚାର କରାଯାଇଛି। ଏହା ମଧ୍ୟରେ ଆନ୍ତଃ ରାଜ୍ୟ କୃଷି ବାଣିଜ୍ୟ ଉପରେ ମଧ୍ୟ ଧ୍ୟାନ ରଖାଯାଇଛି ବୋଲି ସେ ମତ ଦେଇଛନ୍ତି।
ସରକାର ଏମ୍ଏସ୍ପିକୁ ଉଚ୍ଛେଦ କରିନେବେ ବୋଲି କୃଷକଙ୍କ ମନରେ ଆଶଙ୍କା ଉପୁଜିଛି। ଏହାକୁ ନେଇ କୃଷକଙ୍କ ପକ୍ଷରୁ ପ୍ରତିବାଦ ଦେଖାଯାଉଛି। ବିରୋଧୀ ଦଳଗୁଡିକ ମଧ୍ୟ ଏ ନେଇ ସରକାରଙ୍କୁ ଘେରିଥିବା ଦେଖାଯାଉଛି। ଏହାର ଉତ୍ତର ରଖି ସୀତାରାମନ କହିଛନ୍ତି, ବିରୋଧୀମାନେ ଯେଉଁଭଳି ଭାବେ ମିଥ୍ୟା ପ୍ରଚାର କରୁଛନ୍ତି ସେ ନେଇ କୌଣସି ବିଭ୍ରାନ୍ତ ହେବା ଆବଶ୍ୟକତା ନାହିଁ। ଏମ୍ଏସ୍ପି ଆଗକୁ ମଧ୍ୟ ଜାରି ରହିବ। ବର୍ତ୍ତମାନ ଏମ୍ଏସ୍ପି ପରିସରରେ ୨୦-୨୩ ଶସ୍ୟ ଆସୁଛି। ଯେଉଁମାନେ କେବଳ ଧାନ ଏବଂ ଗହମ ଉପରେ ଏମ୍ଏସ୍ପି ଦେଉଥିଲେ ସେମାନେ କୁମ୍ଭୀର କାନ୍ଦଣା କାନ୍ଦିବା ସହ ମିଥ୍ୟା ପ୍ରଚାର କରୁଛନ୍ତି ବୋଲି ସୀତାରାମନ ଟାର୍ଗେଟରେ ଉତ୍ତର ରଖିଛନ୍ତି। ଦେଶ ମଧ୍ୟରେ ୨୩ରୁ ୨୪ ଲକ୍ଷ ଟନ୍ ଡାଲି ଜାତୀୟ ସାମଗ୍ରୀ ଆବଶ୍ୟକ ପଡୁଛି। ୧୬ ଲକ୍ଷ ଟନ୍ ଉତ୍ପାଦନ ହେଉଥିବା ବେଳେ ବଳକା ଆମଦାନୀରୁ ପୂରଣ କରାଯାଉଛି। ଏଭଳି ସ୍ଥିତିକୁ ବିଚାରକରି ସରକାର ଅନ୍ୟ ଖାଦ୍ୟଶସ୍ୟକୁ ମଧ୍ୟ ଏମ୍ଏସ୍ପି ପରିସରଭୁକ୍ତ କରାଯାଇଥିବା ସେ ସ୍ପଷ୍ଟ କରିଛନ୍ତି।