ରାୟଗଡ଼ା,୧୬।୨(ଆଶିଷ ରଞ୍ଜନ ପଣ୍ଡା): ବାକି ରହିଯାଇଥିବା ୧୩ ଜିଲାର ଭାଜପା ସଭାପତିଙ୍କ ନାଁ ରବିବାର ଘୋଷଣା କରିଛନ୍ତି ନିର୍ବାଚନ ଅଧିକାରୀ ପ୍ରତାପ ଷଡଙ୍ଗୀ। ସେଥିରେ ରାୟଗଡ଼ା ଜିଲା ସଭାପତି ଭାବେ ଏମ୍ ଗୋପୀ ଆନନ୍ଦ ଚୟନ ହୋଇଛନ୍ତି। ଏହି ଖବରପାଇ ସମର୍ଥକଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ଗୋପୀ ଆନନ୍ଦ ଜିଲା ସଭାପତି ହେବା ପରେ ପୂର୍ବତନ ଜିଲା ସଭାପତି ଶିବ ଶଙ୍କର ଉଲାକା, ପୂର୍ବତନ ଜିଲା ଯୁବମୋର୍ଚ୍ଚା ସଭାପତି ଦେବାଶିଷ ପଣ୍ଡା, ଶାନ୍ତନୁ ସୁବୁଦ୍ଧି ଓ ସମର୍ଥକମାନେ ଶୁଭେଚ୍ଛା ଜଣାଇଛନ୍ତି।
ପ୍ରକାଶ ଥାଉକି, ଜିଲା ଭାଜପା କାର୍ଯ୍ୟାଳୟଠାରେ ଜିଲା ନିର୍ବାଚନ ଅଧିକାରୀ ଦେବେନ୍ଦ୍ର ମହାନ୍ତିଙ୍କ ନିକଟରେ ଭାଜପାର ରାୟଗଡ଼ା ଜିଲା ସଭାପତି ପାଇଁ ଶନିବାର ୧୩ ଜଣ ଆଶାୟୀ ଆବେଦନ କରିଥିଲେ। ସେମାନେ ହେଲେ ଶିବଶଙ୍କର ଉଲାକା, କାଳିରାମ ମାଝି, ରାମଚନ୍ଦ୍ର ବେହେରା, ଏମ.ଗୋପୀ ଆନନ୍ଦ, ପଦ୍ମନାଭ ଦାଶ, ୱାଇ.ଗଣପତି ରାଓ, ହଳଧର ହିମିରିକା, ମଞ୍ଜୁଳା ମିଣିଆକା, ହଳଧର ମିଶ୍ର, ଗୁଣନିଧି ବାଗ, ଶ୍ୟାମସୁନ୍ଦର ଦାଶ, ୟାଲା ଭେଙ୍କେଟେଶ୍ୱର ରାଓ ଏବଂ ଭାସ୍କର ପଣ୍ଡା ।
ତେବେ ଜିଲା ସଭାପତି ନାମ ଘୋଷଣା ପରେ ଗୋପୀ ଆନନ୍ଦ ଦଳର ସଂଗଠନ ସୁଦୃଢ଼ କରିବା ସହିତ ଜିଲାରେ ଦଳକୁ ମଜଭୁତ କରିବେ ବୋଲି କହିଛନ୍ତି। ଏଥିସହିତ ସେ ସମସ୍ତ ରାଜ୍ୟସ୍ତରୀୟ ଓ ଜିଲାସ୍ତରୀୟ ନେତାଙ୍କୁ କୃତଜ୍ଞତା ଜଣାଇଛନ୍ତି।
