ଦିଗପହଣ୍ଡି,୨।୧୦(ଡି.ଏନ.ଏ.): ଦିଗପହଣ୍ଡି ସହରର ଗଣପର୍ବ ମା’ ବୁଢ଼ୀ ଠାକୁରାଣୀଙ୍କ ଶାରଦୀୟ ଯାତ୍ରା ମହୋତ୍ସବ ଶନିବାର ବିଳମ୍ବିତ ରାତିରୁ ଆରମ୍ଭ ହୋଇଛି। ଠାକୁରାଣୀ ଯାତ୍ରା ନିମନ୍ତେ ସହର ଉତ୍ସବ ମୁଖର ହୋଇଛି। ରାଜ୍ୟ ତଥା ରାଜ୍ୟ ବାହାରେ ରହୁଥିବା ବହୁ ସଂଖ୍ୟକ ବାସିନ୍ଦା ଯାତ୍ରା ପାଇଁ ପିଲାଙ୍କୁ ନେଇ ଘରକୁ ଆସିଛନ୍ତି। ଯାତ୍ରା ପାଇଁ ଘରେ ଘରେ ପିଠା ପଣା ଭୋଜି ଭାତର ଆସର ପାଲଟିଛି। ଶନିବାର ମନ୍ଦିର ପୀଠକୁ ଗଙ୍ଗା ଜଳରେ ଶୋଧନ କରାଯିବା ପରେ ପୂର୍ବ ପ୍ରଚଳିତ ନୀତିକାନ୍ତି ଅନୁଯାୟୀ ମା’ ଙ୍କୁ ମାଜଣା ସେବା ପୂଜା ବନ୍ଦାପନା କରାଯାଇଥିଲା। ମୁଖ୍ୟ ପୁରୋହିତ ପଣ୍ଡିତ ସନାତନ ରଥ, ମନ୍ଦିର ସେବାୟତ ଲିଙ୍ଗରାଜ ପାତ୍ର, ଶମ୍ଭୁନାଥ ପାତ୍ର, ସୋମନାଥ ପାତ୍ର, ପ୍ରଫୁଲ୍ଲ ପାତ୍ର, ତାରିଣୀ ପାତ୍ର, ଆଦିତ୍ୟ ପାତ୍ର ପ୍ରମୁଖ ଦୀର୍ଘ ସମୟ ଧରି ମା’ଙ୍କୁ ପୂଜାର୍ଚ୍ଚନା କରିବା ପରେ ମା’ଙ୍କ ସାନ୍ଧ୍ୟା ଆଳତି କରାଯାଇଥିଲା। ମନ୍ଦିର ପରିସରରେ ବହୁ ସଂଖ୍ୟକ ଶ୍ରଦ୍ଧାଳୁଙ୍କ ଭିଡ ପରିଲକ୍ଷିତ ହୋଇଥିଲା। ଢୋଲ, ମହୁରୀ, ମୃଦଙ୍ଗ, ଘଣ୍ଟ , ଗିନି କୀର୍ତ୍ତନ ବାଦ୍ୟ ବାଜଣା ସହ ମା’ ଙ୍କ ଜୟ ଜୟକାର ଧ୍ୱନିରେ ମନ୍ଦିର ପୀଠ ପ୍ରକମ୍ପିତ ହୋଇଥିଲା। ମୁଖ୍ୟ ପୁରୋହିତଙ୍କ ଦ୍ୱାରା ଶକ୍ତିପଲ୍ଲବ ଦେବୀ ମନ୍ତ୍ର ପାଠ କରାଯାଇ ନବଶକ୍ତି ମଣ୍ଡଳ ପୂଜା କ୍ରମରେ ଆସନ, ସ୍ବାଗତ, ପାଦ୍ୟ, ଅର୍ଘ୍ୟ, ଆଚମନ, ମଧୂପର୍କ, ପୁନଃ ଅଚମନ, ବସ୍ତ୍ର ଆଭରଣ, ଗନ୍ଧ, ପୁଷ୍ପ, ଧୂପ, ଦୀପ, ନୈବେଦ୍ୟ ଓ ମହା ଆଳତି ବନ୍ଦାପନା ପରେ ମା’ ଙ୍କୁ ଅସ୍ଥାୟୀ ଯାତ୍ରା ପୀଠକୁ ଆବାହନ କରାଯାଇଥିଲା। ରାତି ପ୍ରାୟ ୧୦ ଟା ୪୮ ମିନଟ ରେ ମା’ ମସ୍ତକରୁ ଆଜ୍ଞା ମାଳ ଖସିବା ପରେ ଫୁଲମଣ୍ଡା ଖଚିତ ଚାଙ୍ଗୁଡ଼ିକୁ ମା’ ବିରାଜମାନ କରିଥିଲେ। ପରେ ଫୁଲ ମଣ୍ଡା ଚାଙ୍ଗୁଡିକୁ ମୁ୍ଯଯ ସେବାୟତଙ୍କ ମସ୍ତକକୁ ଉଠା ଯାଇଥିଲା। ନୃତ୍ୟ ଗୀତ ବାଦ୍ୟ ବାଜଣା ଆତସବାଜି ଫୁଟାଯାଇ ବିଶାଳ ଶୋଭାଯାତ୍ରା ଗୁଣ୍ଡିଚା ମନ୍ଦିର ଛକ, ବଜାର ସାହି ପରିକ୍ରମା କରି ମା’ ସାଆନ୍ତାଣୀ ବୁଢ଼ୀ ଠାକୁରାଣୀ ରାତି ପ୍ରାୟ ୧ ଟାରେ ଅସ୍ଥାୟୀ ଯାତ୍ରା ପୀଠରେ ପହଞ୍ଚି ଥିଲେ। ଯାତ୍ରା କମିଟି ସଭାପତି ବିକାଶ ପଶୁପାଳକ, ଉପସଭାପତି ପ୍ରଭାକର ରେଡ୍ଡୀ, ସମ୍ପାଦକ ନୀଳମାଧବ ଗୌଡ, ସହ ସମ୍ପାଦକ ଆଲୁ.ସୁଶାନ୍ତ, କୋଷାଧ୍ୟକ୍ଷ ହିମାଂଶୁ ଶେଖର ପାଣିଗ୍ରାହୀ, ସହ କୋଷାଧ୍ୟକ୍ଷ ଆଶିଷ କୁମାର ପଟ୍ଟନାୟକ, ଦୁର୍ଗା ମେକାପଙ୍କ ସମେତ ଯାତ୍ରା କମିଟିର ସମସ୍ତ ସଦସ୍ୟ ପ୍ରମୁଖ ଉପସ୍ଥିତ ଥିଲେ। ଆସନ୍ତା ୮ ତାରିଖ ଶନିବାର ଭୋରରେ ଆଶ୍ୱିନ ପୂର୍ଣ୍ଣମୀ ତିଥିରେ ଏହି ଯାତ୍ରା ମହୋତ୍ସବ ଉଦ୍ଯାପିତ ହେବ। ପ୍ରତିଦିନ ସନ୍ଧ୍ୟାରେ ଯାତ୍ରା ପୀଠରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ ବୋଲି ଯାତ୍ରା କମିଟି ପକ୍ଷରୁ ସୂଚନା ମିଳିଛି।
