ଗଞ୍ଜାମ,୯।୧୦(ଡି.ଏନ୍.ଏ.): ପ୍ରତିବର୍ଷ ଭଳି ଚଳିତ ବର୍ଷ କୁମାରପୂର୍ଣ୍ଣିମା ଉପଲକ୍ଷେ ଗଞ୍ଜାମ ସହର ବଡ଼ ବଜାରଠାରେ ମା’ଗଜଲକ୍ଷ୍ମୀଙ୍କ ପୂଜା ରବିବାର ଆରମ୍ଭ ହୋଇଛି। ବଜାର ବଣିକ ସଂଘ ପକ୍ଷରୁ ପୂଜାର ଆୟୋଜନ କରାଯାଇଛି। ପ୍ରବଳ ବର୍ଷା ସତ୍ତ୍ୱେ ଅସ୍ଥାୟୀ ମଣ୍ଡପରେ ପୂଜା ପାଉଛନ୍ତି ମା’ ଗଜଲକ୍ଷ୍ମୀ। ଏନେଇ ଉତ୍ସବମୁଖର ହୋଇ ଉଠିଛି ସହର। ଆଲୋକ ମାଳାରେ ଝଲସି ଉଠିଛି ବଜାର। ତୁହାକୁ ତୁହା ବର୍ଷା ସତ୍ତ୍ୱେ ମା’ଙ୍କ ଦର୍ଶନ ପାଇଁ ଭକ୍ତଙ୍କ ଭିଡ଼ ଦେଖିବାକୁ ମିଳିଛି। ବଡ଼ ବଜାର ବଣିକ ସଂଘ ସଭାପତି ଗୌରୀ ଶଙ୍କର ବାରିକି, ସମ୍ପାଦକ କାହ୍ନୁଚରଣ ପଣ୍ଡା, କୋଷାଧ୍ୟକ୍ଷ ଜି ରାମଦାସ ରେଡ଼ି, ଉପସଭାପତି ଗଣେଶ ପଟ୍ଟନାୟକ, ବ୍ୟବସାୟୀ ରମେଶ ଚନ୍ଦ୍ର ମହାପାତ୍ର, ଜଗୁ ରେଡ଼ି, ଅନି ପଟ୍ଟନାୟକ ପ୍ରମୁଖ ପୂଜା ପରିଚାଳନା କରୁଥିବା ବେଳେ ସମସ୍ତ ବ୍ୟବସାୟୀ ସହଯୋଗ କରୁଛନ୍ତି। ମା’ଙ୍କ ପୂଜା ୯ ଦିନ ଚାଲିବ ବୋଲି ବଣିକ ସଂଘ ପକ୍ଷରୁ କୁହାଯାଇଛି।