ମୁମ୍ବାଇ: ଗୋବିନ୍ଦା ପ୍ରାୟ ୨ ଦଶନ୍ଧି ଧରି ବଲିଉଡ୍ରେ ରାଜ୍ କରି ଆସୁଛନ୍ତି। ଆକ୍ସନଠାରୁ ଆରମ୍ଭ କରି ଗୋବିନ୍ଦାଙ୍କ ରୋମାନ୍ସ ଏବଂ କମେଡି ସବୁକିଛି ଦର୍ଶକଙ୍କ ମନକୁ ଛୁଇଁଯାଏ। ୨୧ ଡିସେମ୍ବର ୧୯୬୩ରେ ଫିଲ୍ମ ନିର୍ମାତା ତଥା ଅଭିନେତା ଅରୁଣ ଆହୁଜା ଏବଂ ନିର୍ମଳା ଦେବୀଙ୍କଠାରୁ ଜନ୍ମ ହୋଇଥିବା ଗୋବିନ୍ଦାଙ୍କ ପିଲାଦିନ ଅତ୍ୟନ୍ତ ଦରିଦ୍ରରେ କଟିଥିଲା। ମୁମ୍ବାଇର ବିରାର ଗ୍ରାମରେ ୨୧ ବର୍ଷ ଜୀବନ ବିତାଇଥିଲେ ଗୋବିନ୍ଦା। ପିଲାଦିନରୁ କ୍ରୀଡ଼ା ଏବଂ ନୃତ୍ୟ ପ୍ରତି ଆଗ୍ରହୀ ଥିବା ଗୋବିନ୍ଦାଙ୍କ ପ୍ରକୃତ ନାମ ହେଉଛି ଗୋବିନ୍ଦ ଅରୁଣ ଆହୁଜା।
ଗୋବିନ୍ଦା ତାଙ୍କ ଗାଁରେ ‘ମା’ଙ୍କ ବୋହୂ’ ଭାବେ ଜଣାଶୁଣା। ୧୯୮୭ରେ ଏକ ସାକ୍ଷାତକାରରେ ଗୋବିନ୍ଦ ଅରୁଣ ଆହୁଜାରୁ ତାଙ୍କ ନାମ ଗୋବିନ୍ଦା ରଖିବା ପଛର କାହାଣୀ କହିଥିଲେ। ଗୋବିନ୍ଦା କହିଥିଲେ ସେ, ନ୍ୟୁରୋଲୋଜିରେ ବହୁତ ବିଶ୍ୱାସ କରନ୍ତି। ଗୋବିନ୍ଦାଙ୍କ ଭାଗ୍ୟଶାଳୀ ନମ୍ବର ୩ ହୋଇ ସେ ନିଜକୁ ଗୋବିନ୍ଦା ନାମ ଦେଲେ। ଯେଉଁମାନେ ଗୋବିନ୍ଦାଙ୍କୁ ଜାଣିଥିଲେ, ସେମାନେ ତାଙ୍କୁ ‘ମା’ଙ୍କ ବୋହୂ’ ଭାବେ କହୁଥିଲେ। କାରଣ ଗୋବିନ୍ଦା ତାଙ୍କ ମା’ଙ୍କ ପ୍ରତ୍ୟେକ କଥାକୁ ମାନୁଥିବାରୁ ଗାଁ ଲୋକେ ମା’ଙ୍କ ବୋହୂ ନାମରେ ଡାକୁଥିଲେ। କ୍ୟାରିୟରର ପ୍ରାରମ୍ଭ ଦିନରେ ଗୋବିନ୍ଦା ବିରାରରୁ ମୁମ୍ବାଇକୁ ପ୍ରତିଦିନ ସଂଘର୍ଷ କରିବାକୁ ଆସୁଥିଲେ।
୧୯୮୬ରେ ଆସିଥିବା ଫିଲ୍ମ ‘ତନ୍ ବଦନ’ ଜରିଆରେ ସେ ବଲିଉଡ୍ରେ ଡେବ୍ୟୁ କରିଥିଲେ। ଗୋବିନ୍ଦାଙ୍କୁ ପ୍ରଥମ ଫିଲ୍ମ ତାଙ୍କ ମାମୁ ଦେଇଥିଲେ। ୧୯୯୯ରେ ବିବିସି ବିଶ୍ୱର ଶ୍ରେଷ୍ଠ ୧୦ଟି ତାରକା ତାଲିକାରେ ଗୋବିନ୍ଦା୧୦ ନମ୍ବର ସ୍ଥାନରେ ରହିଥିଲେ। ଏହି ତାଲିକାରେ ଅମିତାଭ ବଚ୍ଚନ, ଚାର୍ଲି ଚାପଲିନ ଏବଂ ରୋବର୍ଟ ଡେନିରୋ ଅନ୍ତର୍ଭୁକ୍ତ ହୋଇଥିଲେ। ୧୯୯୬ରେ ଗୋବିନ୍ଦା ‘ସାଜନ ଚଲେ ଶଶୁରାଲ’ ଫିଲ୍ମ ପାଇଁ ଫିଲ୍ମଫେୟାର ପୁରସ୍କାର ମଧ୍ୟ ପାଇଥିଲେ।