ଘଟଗାଁ,୧୩।୭(ଡି.ଏନ.ଏ.) – ଆସନ୍ତା ଗୁରୁବାର ଘଟଗାଁ ମା’ ତାରିଣୀଙ୍କ ଆଷାଢୀ ପର୍ବ ପାଳନ କରାଯିବ। ଏଥିପାଇଁ ଗତ ସୋମବାର ତାରିଣୀ ମନ୍ଦିର ପରିଚାଳନା ବୋର୍ଡ ପକ୍ଷରୁ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ବୈଠକ ପରେ ଏନେଇ ବ୍ୟାପକ ଆଲୋଚନା କରାଯାଇ ମା’ଙ୍କ ଏହି ପର୍ବ କିପରି ଶାନ୍ତି ଶୃଙ୍ଖଳାରେ ଶେଷ ହେବ ଏଥିପାଇଁ ବିଚାର ବିମର୍ଶ କରାଯାଇଥିଲା। ୨୨ଖଣ୍ଡ ମୌଜାର ଗ୍ରାମ ମୁଖ୍ୟ ଓ ଗ୍ରାମଦେବତୀଙ୍କ ପୂଜକମାନଙ୍କୁ ଏଥିପାଇଁ ନିମନ୍ତ୍ରଣ କରାଯାଇଛି। ସନ୍ଧ୍ୟାରେ ମନ୍ଦିର ଖୋଲିବା ପରେ ସେମାନେ ସମସ୍ତେ ମା’ଙ୍କ ଆଷାଢୀ ପୂଜା ପାଇଁ ଭୋଗ ଡାଲା ଓ ବୋଜା ଧରି ଭିତରକୁ ଯାଇ ଏହି ପୂଜା କରିବେ।
ଏହି ପୂଜା କାହିଁି କେତେ କାଳରୁ ପ୍ରଚଳିତ ହୋଇ ଆସୁଛି। ଏହି ପୂଜାକୁ ନେଇ ସ୍ଥାନୀୟ ଲୋକଙ୍କ ବହୁ ଆସ୍ଥା ଓ ବିଶ୍ୱାସ ରହିଛି। ପରମ୍ପରା ଅନୁଯାୟୀ ସେଦିନ ସକାଳୁ ସନ୍ଧ୍ୟା ଯାଏ ମନ୍ଦିର ବନ୍ଦ ରହିବ। କୌଣସି ପୂଜାନୀତି ହେବ ନାହିଁ। ଏହି ବନ୍ଦ ସମୟରେ ମା’ ତାରିଣୀ ବର୍ଷରେ ଗୋଟିଏ ଦିନ ଉପବାସ ରହି ଭଗବାନ ବିଷ୍ଣୁଙ୍କ ଧ୍ୟାନରେ ରହି ପ୍ରଜାମାନଙ୍କ ମଙ୍ଗଳ କାମନା କରିଥାନ୍ତି। କେହି କେହି ଏହାକୁ କୃଷି ଓ କୃଷକମାନଙ୍କ ଶୁଭକାମନା କରି କିପରି ଭଲ ଚାଷ ହେବ ସେଥିପାଇଁ ମା’ ତାରିଣୀ ଉପବାସରେ ରହୁଥିବା କହିଥାନ୍ତି। ଏହି ପର୍ବରେ ଆଉ ଏକ ବିଶେଷତ୍ୱ ହେଲା ନିଶା ପୂଜା। ଯାହାକୁ ବିଳମ୍ବିତ ରାତିରେ କେବଳ ବରିଷ୍ଠ ପୂଜକମାନଙ୍କ ଦ୍ୱାରା କରାଯାଇଥାଏ। ସେଦିନ ସକାଳୁ ବରିଷ୍ଠ ପୂଜକମାନେ ଉପବାସ ରହି ରାତିରେ ଏହି ପୂଜା କରିବାପରେ ପ୍ରସାଦ ପାଇଥାନ୍ତି। ଦିନତମାମ ମନ୍ଦିର ବନ୍ଦ ପରେ ସନ୍ଧ୍ୟା ୭ଟାରେ ପହଡ଼ ଖୋଲିବା ମାତ୍ରେ ଭିଡ଼ ଜମିଥାଏ। ମା’ଙ୍କ ଆଷାଢୀ ପୂଜା ଓ ସୁନାବେଶ ଦର୍ଶନ ପାଇଁ ପ୍ରବଳ ଜନ ସମାଗମ ହୋଇଥାଏ। ଏହାକୁ ଦୃଷ୍ଟିରେ ରଖି ପୋଲିସ ବ୍ୟବସ୍ଥା କଡ଼ାକଡ଼ି କରାଯାଇଛି। ମନ୍ଦିର ପରିଚାଳନା ବୋର୍ଡର ସଭାପତି ରାଜେନ୍ଦ୍ର କୁମାର ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବରିଷ୍ଠ ସଦସ୍ୟ କ୍ଷୀରୋଦ ପ୍ରସାଦ ଦାସ, ରୁଦ୍ର ନାରାୟଣ ମହାନ୍ତ, ପ୍ରମୋଦ କୁମାର ଦେହୁରୀ, ଆନନ୍ଦ ଚନ୍ଦ୍ର ସିଂହ, ନିର୍ମଳ କୁମାର ମହାନ୍ତି, ଦୟାନିଧି ମହାନ୍ତ ଓ ମନ୍ଦିର କାର୍ଯ୍ୟ ନିର୍ବାହୀ ଅଧିକାରୀ ସଞ୍ଜୀବ ମହାପାତ୍ର ପ୍ରମୁଖ ଉପସ୍ଥିତ ଥିଲେ। ବୈଠକ ପରେ ବରିଷ୍ଠ ପୂଜକ ଶ୍ୟାମସୂନ୍ଦର ଦେହୁରୀ, ଦୋଳଗୋବିନ୍ଦ ଦେହୁରୀ ଓ ନଟବର ଦେହୁରୀଙ୍କ ସହ ଆଲୋଚନା କରାଯାଇଥିଲା।