ଦାରିଙ୍ଗବାଡ଼ି,୬।୫(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡିଠାରେ ଚାଲିଥିବା ମା’ଠାକୁରାଣୀଙ୍କ ଯାତ୍ରାର ପୂର୍ଣ୍ଣାହୁତି ହୋଇଯାଇଛି। ରବିବାର ମା’ଙ୍କ ଘଟ ପରିକ୍ରମାର ଶେଷ ଦିବସ ରହିଥିବା ବେଳେ ମା’ଙ୍କୁ ବିରାଟ ପଟୁଆରରେ ଲୋହାରସାହି ବାସିନ୍ଦା ସାହିକୁ ନିମନ୍ତ୍ରଣ କରି ନେଇଥିଲେ। ଆନ୍ଧ୍ର ପ୍ରଦେଶରୁ କାଳୀଙ୍କ ପାରମ୍ପରିକ ନୃତ୍ୟ ଓ ବାଘ ନାଚ, ଘଣ୍ଟ, ଢୋଲ, ଚାଙ୍ଗୁ ବାଦ୍ୟ ଓ ବାଣରେ ଦାରିଙ୍ଗବାଡି ପ୍ରକମ୍ପିତ ହୋଇଥିଲା।
ଲୋହରା ସାହିଙ୍କ ପକ୍ଷରୁ ସାହି ସଭାପତି ଅମରେଶ ସାହୁଙ୍କ ସମେତ ଅରୁଣ ପ୍ରଧାନ, ନୃସିଂହ ସାହୁ, ସୁରଥ ପ୍ରଧାନ, ଚନ୍ଦନ ଦାସ, କାଳିଆ ସାହୁ, ଜିଲୁ ଡାକୁଆ, ବିନାୟକ ଡାକୁଆ, ଆଲୋକ ତ୍ରିପାଠୀ, ବସନ୍ତ ବେହେରା, ଅତୁଲ ପ୍ରଧାନ, ଟୁକୁନା ସାହୁଙ୍କ ସମେତ ଅନ୍ୟମାନେ କାର୍ଯ୍ୟକ୍ରମ ପରିଚାଳନା କରିଥିଲେ।
ପ୍ରତିଦିନ ଭଳି ଯାତ୍ରାର ଶେଷ ଦିନରେ ମେଲୋଡି ମଧ୍ୟ ଅନୁଷ୍ଠିତ ହୋଇଥିଲା। ସେହିପରି ଯାତ୍ରାରେ ଘଟ ପରିକ୍ରମା ସମୟରେ ମାନସିକଧାରୀ ବିଭିନ୍ନ ବେଶ ଧାରଣ କରି ଗାଁ ବଜାର ବୁଲି ଥିଲେ। ବେଶ ଧାରୀଙ୍କୁ ଦେଖିବା ପାଇଁ ଦର୍ଶକଙ୍କ ଭିଡ଼ ଜମିଥିଲା।
ଯାତ୍ରା ଦେଖିବାକୁ ଜିଲା ତଥା ଜିଲା ବାହାରୁ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଥିଲା। ସେହିପରି ସୋମବାର ଏହାର ପୂର୍ଣ୍ଣାହୁତି ପୂଜା କରାଯାଇଥିଲା। ମା’ ମନ୍ଦିରକୁ ବାହୁଡ଼ିବା ପୂର୍ବରୁ ମାଉସୀଙ୍କ ଘର ନୀଳକନ୍ଦର ସାହିକୁ ବିରାଟ ପଟୁଆରରେ ଯାଇ ମାଉସୀଙ୍କ ହାତରେ ପ୍ରସ୍ତୁତ ପୋଡ଼ ପିଠା ଖାଇ ନିଜ ଘରକୁ ତଥା ମନ୍ଦିରକୁ ଫେରିଥିଲେ। ସୂଚନା ଯୋଗ୍ୟ, ଗତ ମାସ ୨୩ରୁ ଏହି ଯାତ୍ରା ଶୁଭାରମ୍ଭ ହୋଇଥିଲା। ମଙ୍ଗଳବାର ମା’ଙ୍କୁ ପଣା ପ୍ରଦାନ କରାଯିବାର କାର୍ଯ୍ୟକ୍ରମ ରହିଥିବା କମିଟି ପକ୍ଷରୁ କୁହାଯାଇଛି।