ନୟାଗଡ,୧୪।୧୧(ଲୋକନାଥ ମିଶ୍ର): ନୟାଗଡ ଷ୍ଟାଡିୟମରେ ଜିଲା ସ୍ତରୀୟ କୃଷି ଯନ୍ତ୍ରପାତି ମେଳା ସୋମବାର ଉଦ୍ଘାଟିତ ହୋଇଛି। ଏଥିରେ ମୁଖ୍ୟ ଅତିଥି ରୂପେ ନୟାଗଡ ବିଧାୟକ ଅରୁଣ କୁମାର ସାହୁ ଯୋଗ ଦେଇ ଉଦ୍ଘାଟନ କରିଥିଲେ। ଏ ଅବସରରରେ ଜିଲାପାଳ ରବୀନ୍ଦ୍ର ନାଥ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ନୟାଗଡ଼ ବିଧାୟକ ସାହୁ ଯୋଗ ଦେଇ କହିଥିଲେ, ଚାଷ ଜମିର ପରିମାଣ ହ୍ରାସ ପାଇ ଚାଲିଛି। ତେବେ ଯାନ୍ତ୍ରୀକରଣ ଯୋଗୁ ଉତ୍ପାଦନ ବଢ଼ିବାରେ ଲାଗିଛି। ଖାଦ୍ୟଶଷ୍ୟରେ ନିଅଣ୍ଟିଆ ରାଜ୍ୟ ଓଡ଼ିଶା ଏବେ ଚାଉଳ କ୍ଷେତ୍ରରେ ବଳକା ରାଜ୍ୟରେ ପରିଣତ ହୋଇପାରିଛି। ପୁଣି ପନିପରିବା, ମାଛ, ଛତୁ, ଦୁଗ୍ଧରେ ଉତ୍ପାଦନ ବଢ଼ି ଚାଲିଛି। ମୁଖ୍ୟମନ୍ତ୍ରୀ କୃଷି ପାଇଁ ବ୍ୟବହୃତ ଯନ୍ତ୍ରପାତିରେ ରିହାତି ବ୍ୟବସ୍ଥା ଲାଗୁ ପରେ ସୁଫଳ ମିଳିଛି। ମୁଖ୍ୟବକ୍ତା ରୂପେ କୃଷି ବିଭାଗର ମୁଖ୍ୟଯନ୍ତ୍ରୀ ମୁକ୍ତିକାନ୍ତ ମହାପାତ୍ର ଯୋଗଦେଇ କହିଥିଲେ, କୃଷି ଯନ୍ତ୍ରପାତି ବିକ୍ରୟ ପାଇଁ ନୟାଗଡ଼ ଜିଲାକୁ ୧୨ କୋଟି ଟଙ୍କା ଟାର୍ଗେଟ ଦିଆଯାଇଛି। କୃଷିର ବିକାଶ ପାଇଁ ମୁଖ୍ୟମନ୍ତ୍ରୀ କୃଷି ଉଦ୍ୟୋଗୀ ଯୋଜନା ପରି ଅନେକ ଯୋଜନା ଚାଷ ପାଇଁ ନୂଆ ଦିଶା ଦେଖାଇଛି। ବହୁ ଯୁବକ ଚାଷ ପ୍ରତି ଆଗ୍ରହ ପ୍ରକାଶ କରି ଆପଣେଇ ଚାଲିଛନ୍ତି। ଜିଲା ପରିଷଦ ସଭାପତି ଦେବାଶିଷ ପଟ୍ଟନାୟକ କହିଛନ୍ତି, କୃଷି ବିଭାଗର ବିଭିନ୍ନ ଯୋଜନା କିଛି ନିର୍ଦ୍ଦିଷ୍ଟ ଚାଷୀ ଉପଭୋଗ କରୁଛନ୍ତି। ତେଲିଆ ମୁଣ୍ଡରେ ତେଲ ଠିକ ନୁହେଁ। ସକରାରଙ୍କ ଯୋଜନା ସମସ୍ତ ଚାଷୀ ଜାଣିବା ଓ ପାଇବା ଦରକାର ବୋଲି କହିଥିଲେ। ସରକାର କୃଷି ପାଇଁ ଦେଉଥିବା ସବ୍ସିଡ ଓ ସୁବିଧା ସୁଯୋଗ ସମ୍ପର୍କରେ ଅଧିକ ସଚେନତାର ଆବଶ୍ୟକତା ରହିଛି। ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା କହିଥିଲେ, ସରକାର କୃଷି ଓ କୃଷକର ଉନ୍ନତି ପାଇଁ ପଦକ୍ଷେପ ନେଉଛନ୍ତି। ମୁଖ୍ୟମନ୍ତ୍ରୀ ସ୍ବତନ୍ତ୍ର କୃଷି ବଜେଟ କରିବା ପରେ କୃଷି ଓ କୃଷକଙ୍କର ଉନ୍ନତି ହୋଇଛି। ଜିଲାପାଳ ସାହୁ କହିଥିଲେ, ଯନ୍ତ୍ରପାତିରେ ରିହାତି ଯୋଗୁ ଚାଷୀଙ୍କ ଆୟ ୨ ଗୁଣା ହୋଇଛି। କୃଷି କ୍ଷେତ୍ରରେ ରାଜ୍ୟ କୃଷି କର୍ମଣ ପୁରଷ୍କାର ବହୁ ଥର ପାଇଛି। ଜିଲା ମୁଖ୍ୟ କୃଷି ଅଧିକୋରୀ ବିଷ୍ଣୁ ପ୍ରସାଦ ସାହୁ ଧନ୍ୟବାଦ ଦେଇଥିବାବେଳେ ଅପନ୍ନା ପ୍ରିୟଦର୍ଶିନୀ ସଭା ସଞ୍ଚାଳନ କରିଥିଲେ।