ବାଲେଶ୍ୱର ଅଫିସ, ୪।୧୨: ବାଲେଶ୍ୱର ସହରରେ ଶନିବାର ସକାଳେ ଏକ ପାଗଳ କୁକୁର ଆତଙ୍କ ଖେଳାଇଥିଲା। ମର୍ଣ୍ଣିଂଓ୍ବାକ କରୁଥିବା ଲୋକଙ୍କୁ ଗୋଡାଇ ଗୋଡାଇ କାମୁଡିଲା। ଆକ୍ରମଣରେ ୨୨ଜଣ ଆହତ ହୋଇଛନ୍ତି। ଆହତମାନଙ୍କୁ ଚିକିତ୍ସା ଲାଗି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଅନ୍ୟପକ୍ଷରେ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇ ପାଗଳ କୁକୁରକୁ ପିଟି ପିଟି ମାରିଦେଇଥିବା ଜଣାପଡିଛି। ପୌରାଞ୍ଚଳ ଅଧୀନ ୪ନଂ ୱାର୍ଡ଼ର ପୁଲବଜାର, ଖୁଆଜାବାଗ୍, କସାବ ମହଲ୍ଲା, ବାଲୁବଜାର, ରେଜାଉଲ୍ଲା ଲେନ, ମୁନିପଦା ଆଦି ଅଞ୍ଚଳରେ ସକାଳ ସମୟରେ ଲୋକମାନେ ମର୍ଣ୍ଣିଂଓ୍ବାକ କରୁଥିବା ବେଳେ ହଠାତ୍ ଉକ୍ତ ପାଗଳ କୁକୁର ଆସି ପ୍ରଥମେ ସେକ ଆକବରଙ୍କୁ କାମୁଡିଥିଲା। ପରେ ନସିମା ବିବି, ଗୋପାଳଚନ୍ଦ୍ର ସେଠୀ,ସେକ ଅନାଦୁଲ୍ଲା, ସେକ ଅବଦୁଲ୍ଲା, ସେକ୍ କାଦିର, ତୁମରୁନ ବିବି, ସେକ ପିଆଉଦ୍ଦିନ, ସେକ୍ ଇଦ୍ରିସ ଓ ସୃଷ୍ଟିଧର ଦେଙ୍କ ଭଳି ମୋଟ ୨୨ଜଣଙ୍କୁ ଆକ୍ରମଣ କରିଥିଲା। ଏଥିରେ ଲୋକମାନେ ଭୟଭୀତ ହୋଇ ଏଣେତେଣେ ଦୌଡ଼ିବାକୁ ଲାଗିଥିଲେ। କୁକୁରର ଏମିତି ଉତ୍ପାତ ଦେଖି ଲୋକମାନେ ଛାନିଆ ହୋଇଯାଇଥିଲେ। ଆହତ ବ୍ୟକ୍ତି ଓ ପିଲାମାନଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ସ୍ଥାନୀୟ ଲୋକମାନେ କୁକୁରକୁ ପିଟି ପିଟି ମାରିଦେଇଛନ୍ତି। କୁକୁର କାମୁଡ଼ାରେ ଆହତ ସେଖ କାଦର କହିଛନ୍ତି, କୁକୁରଙ୍କ ଏଭଳି ଉତ୍ପାତ ପାଇଁ ପ୍ରଶାସନ ଦାୟୀ। ବୁଲା କୁକୁରଙ୍କ ପାଇଁ କିଛି ବ୍ୟବସ୍ଥା କରାଯାଉ ନ ଥିବାରୁ ବିଭିନ୍ନ ସମୟରେ ଲୋକେ ଆକ୍ରମଣର ଶିକାର ହେଉଛନ୍ତି।