ବନ୍ତ,୧୨।୨(ଡି.ଏନ.ଏ.)-ଆଧୁନିକ ଚାକଚକ୍ୟ ଭିତରେ ନିଜକୁ ପ୍ରତିଷ୍ଠିତ କରିବାକୁ ଲୋକଙ୍କ ଭିତରେ ପ୍ରତିଯୋଗିତା ଚାଲିଥିବା ବେଳେ ପରିବେଶ ସୁରକ୍ଷା ପ୍ରତି କାହାରି ନିଘା ନାହିଁ। କଳ କାରଖାନା ଗଢ଼ିବା ପାଇଁ ଜଙ୍ଗଲ କାଟି ସଫା କରି ଦିଆଯାଉଛି। ଶିକ୍ଷିତ ସମାଜ ପରିବେଶ ସୁରକ୍ଷାକୁ ଗୁରୁତ୍ୱ ଦେଉ ନ ଥିବା ବେଳେ ଜଣେ ଅପାଠୁଆ ଅଭାବୀ ମଣିଷ ପରିବେଶ ସୁରକ୍ଷାକୁ ଗୁରୁତ୍ୱ ଦେଇଛନ୍ତି। ସଚେତନ ବୋଲାଉଥିବା ଲୋକେ ଅବାଧରେ ଗଛ କାଟି ଚାଲିଥିବା ବେେଳେ ସେ ତାଙ୍କ ଗାଁ ମୁଣ୍ଡରେ ଥିବା ଏକ ଛୋଟିଆ ଜଙ୍ଗଲକୁ ଜଗି ରହିଛନ୍ତି। କୌଣସି ଲୋକଙ୍କୁ ସେହି ଜଙ୍ଗଲରୁ ଗଛ କାଟିବାକୁ ଦିଅନ୍ତି ନାହିଁ। ଏମିତି ଏକ ନିଆରା ଭାବନାର ମଣିଷ ହେଉଛନ୍ତି ମଦନ ମୋହନ ଦାସ ା ବନ୍ତ ବ୍ଲକ ଅଧୀନ ଆଡ଼ିଆ ପଞ୍ଚାୟତର ନିମଗଢ଼ିଆ (ଜିରିଣା) ଗ୍ରାମରେ ତାଙ୍କ ଘର।
ଗାଁର ପଶ୍ଚିମରେ ଥିବା ଏକ ଛୋଟିଆ ଜଙ୍ଗଲର ସେବା ଯନତ୍ ନେବା ସହିତ ଦୀର୍ଘ ୨୦ ବର୍ଷ ଧରି ଏହାକୁ ସୁରକ୍ଷା ଦେଇ ଆସୁଛନ୍ତି ା ପରିବେଶ ସୁସ୍ଥ ରଖିବାକୁ ଏପରି ପଦକ୍ଷେପ ନେଇଥିବା କହିଛନ୍ତି ସେ। ତାଙ୍କର ଏହି ଛୋଟ ଜଙ୍ଗଲରେ କୋରେଇ, କଣ୍ଟାକସି, ଶିମିଳି, ଅର୍ଜୁନ, ଲୁଣିକୋଳି ଓ ପଳାସ ଆଦି ବିଭିନ୍ନ ପ୍ରକାରର ପ୍ରାୟ ୧୫୦ରୁ ଊର୍ଦ୍ଧ୍ୱ ଗଛ ରହିଛି। ଆଗରୁ କିଛି ଗଛ ଥିବା ବେଳେ ସେ ପ୍ରତି ବର୍ଷ ବୃକ୍ଷରୋପଣ କରୁଛନ୍ତି। ମାତ୍ର ୧୨ ଗୁଣ୍ଠ ଜମି ତାଙ୍କର ନିଜସ୍ବ ସମ୍ବଳ ହୋଇଥିବା ବେଳେ ପରଘରେ ମୂଲ ମଜୁରୀ ଲାଗି ପରିବାର ଚଳାଇଥାନ୍ତି। ଏତେ ଅସୁବିଧାରେ ଥାଇ ମଧ୍ୟ ସମାଜର ମଙ୍ଗଳ ପାଇଁ ତାଙ୍କର ଏହି ସୁନ୍ଦର ଚିନ୍ତାଧାରାକୁ ବେଶ ପ୍ରଶଂସା କରିଛନ୍ତି ସ୍ଥାନୀୟ ଲୋକେ। ମଦନ କୁହନ୍ତି ବର୍ତ୍ତମାନ ନୂତନ ଜଙ୍ଗଲ ସୃଷ୍ଟି ହେବା ପରିବର୍ତ୍ତେ ଲୋକେ ଅବାଧରେ ଗଛ କାଟି ଚାଲିଛନ୍ତି। ପ୍ରଚଣ୍ଡ ଖରାରେ ବିଶ୍ରାମ ନେବା ପାଇଁ ମନୁଷ୍ୟ ଓ ପଶୁପକ୍ଷୀ ଛାଇ ଟିକିଏ ପାଉନାହାନ୍ତି। ଏଥିପାଇଁ ମୁଁ ଏ ଜଙ୍ଗଲକୁ ଜଗିବା ସହିତ ଗଛଗୁଡ଼ିକର ଯନତ୍ ନେଉଛି। ଏହି ଜଙ୍ଗଲରେ ବନଦେବୀଙ୍କୁ ପ୍ରତିଷ୍ଠା କରି ପୂଜାର୍ଚ୍ଚନା କରୁଛି। ପ୍ରତିବର୍ଷ ମାଘ ସପ୍ତମୀରେ ଗାଁର ଯୁବକମାନଙ୍କ ସହାୟତାରେ ବନ ଦେବୀଙ୍କ ପୂଜା ଧୁମ୍ଧାମ୍ରେ କରାଯାଏ। ବନୀକରଣ ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ବନ ବିଭାଗର କୌଣସି ଅଧିକାରୀଙ୍କର ଏହି ଜଙ୍ଗଲ ପ୍ରତି ଦୃଷ୍ଟି ପଡ଼ିନାହିଁ ବୋଲି ସେ କହିଛନ୍ତି।