ଗୋପ,୩୦।୬(ଭାରତୀ ଭୂଷଣ ଉପାଧ୍ୟାୟ): ଗୋପସ୍ଥିତ ଶୋଳପୁର-ମଦରଙ୍ଗ ନଦୀବନ୍ଧ କାର୍ଯ୍ୟ ଅତ୍ୟନ୍ତ ନିମ୍ନମାନର ହୋଇଥିବା ନେଇ ଅଭିଯୋଗ ଆସିବା ପରେ ନିମାପଡ଼ା ଜଳସମ୍ପଦ ବିଭାଗ ଅଧୀକ୍ଷକ ଯନ୍ତ୍ରୀ ବୈକୁଣ୍ଠନାଥ ଦଳାଇ ଗୁରୁବାର ନଦୀବନ୍ଧ ବୁଲିବା ସହ ତୁରନ୍ତ ରାସ୍ତା କାର୍ଯ୍ୟ ମରାମତି କରିବା ପାଇଁ ଗୋପ ଜଳସମ୍ପଦ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ସଂଗ୍ରାମ କିଶୋର ମହାନ୍ତି ଓ ସହକାରୀ ଯନ୍ତ୍ରୀ ସଞ୍ଜୀବ କୁମାର ସାହୁଙ୍କୁ ନିର୍ଦ୍ଦେଶ ଦେଇଛନ୍ତି। ଅଧୀକ୍ଷଣ ଯନ୍ତ୍ରୀଙ୍କ ନିର୍ଦ୍ଦେଶରେ ଶୁକ୍ରବାରଠାରୁ ମରାମତି କାର୍ଯ୍ୟ କରାଯିବ ବୋଲି ଜଣାପଡ଼ିଛି। ପ୍ରକାଶ ଯେ, ଜଳସମ୍ପଦ ବିଭାଗ ଅଧୀନରେ ଥିବା ଏହି ରାସ୍ତାଟି କିଛିଦିନ ଧରି ସାଧାରଣ ଲୋକମାନେ ଯିବାଆସିବା ବେଳେ ଅସୁବିଧା ହେବାରୁ ଗୋପ ଜଳସମ୍ପଦ ବିଭାଗ ପକ୍ଷରୁ ୨ଟି ଇଷ୍ଟିମେଟ କରାଯାଇଥିଲା। ପରେ ଏହି ୩ କିଲୋମିଟର ନଦୀବନ୍ଧ ରାସ୍ତା କାର୍ଯ୍ୟ ଟେଣ୍ଡର କରାଯାଇଥିଲା। ପ୍ରାୟ ୯୦ ଲକ୍ଷ ଟଙ୍କାର କାର୍ଯ୍ୟକୁ ଟେଣ୍ଡର ମାଧ୍ୟମରେ ଦୁଇଜଣ ଠିକାଦାରଙ୍କୁ କାର୍ଯ୍ୟ ମିଳିଥିଲା। ମଦରଙ୍ଗ ପଟୁ ହୋଇ ଥିବା ଦେଢ଼ କିଲୋମିଟର ପିଚୁ ରାସ୍ତା କାର୍ଯ୍ୟ ଠିକ୍ ଭାବେ ହୋଇଥିବା ସମୟରେ ଆଉ ଅବଶିଷ୍ଟ ପିଚୁ କାର୍ଯ୍ୟ ଅତ୍ୟନ୍ତ ନିମ୍ନମାନର ହୋଇଥିଲା। ଠିକାଦାର ଜଣଙ୍କ ନଦୀବନ୍ଧ ରାସ୍ତା କାର୍ଯ୍ୟ ଦାୟିତ୍ୱରେ ଥିବା ସହକାରୀ ଯନ୍ତ୍ରୀ ସଞ୍ଜିବ କୁମାର ସାହୁ ନିର୍ଦ୍ଦେଶକୁ ମାନି ନ ଥିଲେ। ଫଳରେ ମାତ୍ର ଗୋଟିଏ ମାସ ପରେ ଶୋଳପୁର ପଟ ନଦୀବନ୍ଧ ରାସ୍ତାଟି ଦବି ଯିବା ସହିତ ଫାଟିଯାଇଥିଲା। ଏପରି ଏକ ନିମ୍ନମାନର କାର୍ଯ୍ୟ ସମ୍ପର୍କରେ କେତେକ ଖବରକାଗଜରେ ପ୍ରକାଶିତ ହେବା ପରେ ଗୋପ ଜଳସମ୍ପଦ ବିଭାଗ ଅଧୀକ୍ଷଣ ଯନ୍ତ୍ରୀ ଦଳାଇ ଏହି ନିମ୍ନମାନର କାର୍ଯ୍ୟସ୍ଥଳକୁ ଯାଇ ତଦାରଖ କରିଥିଲେ। ଏହି ଅଭିଯୋଗକୁ ନେଇ ଅଧୀକ୍ଷଣ ଯନ୍ତ୍ରୀ ବୈକୁଣ୍ଠନାଥ ଦଳାଇ କୁହନ୍ତି, ନଦୀ ବନ୍ଧ ବୁଲି ଦେଖିବା ସହିତ ତୁରନ୍ତ ମରାମତି କରିବା ପାଇଁ ନିର୍ଦ୍ଦେଶ ଦେଇଛି। ଏଥିସହ ସମ୍ପୃକ୍ତ ଠିକାଦାରଙ୍କ ବିଲ୍ ବନ୍ଦ କରିବା ଲାଗି ମଧ୍ୟ କହିଛି।