ପାରାଦୀପ ,୩୦।୧୦(ସ୍ବ.ପ୍ର.): ପାରାଦୀପର ଏକମାତ୍ର କଲେଜ ପରିସରରେ ଥିବା ସମ୍ମିଳନୀ କକ୍ଷରେ ମରାମତି ବାବଦ ଖର୍ଚ୍ଚକୁ ନେଇ ମାସେ ହେବ ବିବାଦ ଲାଗିରହିଛି। ୨୩ ଲକ୍ଷ ଟଙ୍କା ବ୍ୟୟରେ ଏହାକୁ ମରାମତି କରାଯାଇଛି। ମାତ୍ର କାର୍ଯ୍ୟ ଶେଷ ହେବା ପରେ ତାହା କାମରେ ଲାଗୁନାହିଁ ବୋଲି କଲେଜର ୪ ଜଣିଆ ଅଧ୍ୟାପକ ଟିମ୍ ଅଭିଯୋଗ କରିଛନ୍ତି। ଠିକାସଂସ୍ଥା ପକ୍ଷରୁ କରାଯାଇଥିବା କାମ ନିମ୍ନମାନର ହୋଇଛି ବୋଲି ସେମାନେ ଦର୍ଶାଇଛନ୍ତି। ସୂଚନାଯୋଗ୍ୟ, ପାରାଦୀପ କଲେଜ ଅଫିସ କକ୍ଷକୁ ଲାଗି ସମ୍ମିଳନୀ କକ୍ଷ ରହିଛି। ସେଠାରେ ପ୍ରାୟତଃ ବୈଠକ ଓ ସେମିନାର କରାଯାଏ। ପାରାଦୀପ ବନ୍ଦର ଅର୍ଥରେ ନିର୍ମିତ ଏହି କୋଠା ଗତ ଫନି ବାତ୍ୟାରେ କ୍ଷତିଗ୍ରସ୍ତ ହୋଇଥିଲା। ଝରକା କବାଟଠାରୁ ଆରମ୍ଭ କରି ଟେବୁଲ ବେଞ୍ଚ ଆଦି ଭାଙ୍ଗିଯାଇଥିଲା। ଏହାକୁ ମରାମତି କରିବା ପାଇଁ କଲେଜ ପକ୍ଷରୁ ରାଜ୍ୟ ସରକାରଙ୍କୁ ଅନୁରୋଧ କରାଯାଇଥିଲା। ପରେ ଆର ଆଣ୍ଡ ବି (ରୋଡ ଆଣ୍ଡ ବିଲ୍ଡିଂ ) ବିଭାଗ ପକ୍ଷରୁ ଯାଞ୍ଚ କରାଯାଇ ମରାମତି ପାଇଁ ଟେଣ୍ଡର କରାଯାଇଥିଲା। ଏହି କାର୍ଯ୍ୟ ପାଇଁ ୨୩ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ବିଭାଗ ପକ୍ଷରୁ କୁହାଯାଇଥିଲା ବୋଲି କଲେଜ ଅଧ୍ୟାପକ ଅକ୍ଷୟ ମିଶ୍ର କହିଛନ୍ତି। ପରେ ମରାମତି କାର୍ଯ୍ୟ ଯାଞ୍ଚ ନିମନ୍ତେ କଲେଜ ପକ୍ଷରୁ ୪ ଜଣିଆ ଟିମ୍ ଗଠନ କରାଯାଇଥିଲା। କାମ ଶେଷ ହେବା ପରେ ଦେଖାଗଲା, ଯେଉଁ କବାଟ, ଝରକା ଲାଗିଛି ସେଗୁଡ଼ିକ ପ୍ଲାଏରେ ନିର୍ମିତ। ସାମାନ୍ୟ ଧକ୍କା ଦେଲେ ତାହା ଗଳି ପଡ଼ୁଛି। ଏପରିକି ମରାମତି ହେବାର ଅଳ୍ପ ଦିନ ମଧ୍ୟରେ କାଚ ଝରକା ଫବନରେ ଭାଙ୍ଗିଯାଇଛି। ଏମିତି କାମ ଦେଖି ଯାଞ୍ଚ ଟିମ୍ କଲେଜର ତତ୍କାଳୀନ ଅଧ୍ୟକ୍ଷା ସୁପ୍ରେମା କାନୁନଗୋ ନିକଟରେ ଗତ ସେପ୍ଟେମ୍ବରରେ ଅଭିଯୋଗ କରିଥିଲେ। ତେବେ କାନୁନଗୋ ୩୦ ସେପ୍ଟେମ୍ବରରେ ଅବସର ନେବା ପୂର୍ବରୁ ମରାମତି କାର୍ଯ୍ୟ ଠିକ ରହିଛି ବୋଲି ରିପୋର୍ଟରେ ଉଲ୍ଲେଖ କରିଛନ୍ତି। ଏ ସମ୍ପର୍କରେ କାନୁନଗୋଙ୍କୁ ପଚରାଯିବାରୁ ସେ କିଛି କହିବା ପାଇଁ ମନା କରିଦେଇଥିଲେ। ଆର ଆଣ୍ଡ ବି ବିଭାଗର ନିର୍ବାହୀ ଯନ୍ତ୍ରୀ ନିମାଇଁ ଦାସଙ୍କୁ ଏ ବିଷୟରେ ଏକାଧିକ ବାର ଯୋଗାଯୋଗ କରାଯାଇଥିଲା। କିନ୍ତୁ ସେ ମୋବାଇଲ୍ ଫୋନ ଉଠାଇ ନ ଥିଲେ।