ବ୍ରହ୍ମପୁର ଅଫିସ,୩୦।୧:୧୯୨୦ରୁ ସ୍ବତନ୍ତ୍ର ଓଡ଼ିଶା ପ୍ରଦେଶ କଂଗ୍ରେସ ଗଠିତ ହୋଇଥିଲା। ଏହାପରେ ୧୯୨୧ରେ ଭାରତ ଛାଡ଼ ଆନ୍ଦୋଳନ ସମୟରେ ଓଡ଼ିଶାରେ ପଣ୍ଡିତ ଗୋପବନ୍ଧୁ ଦାସ ସ୍ବାଧୀନତା ସଂଗ୍ରାମର ମୁଖ୍ୟ ପୁରୋଧା ସାଜିଥିଲେ। ଏଥିରେ ଗୋପବନ୍ଧୁଙ୍କ ଅନୁରୋଧ କ୍ରମେ ୧୯୨୧ ମାର୍ଚ୍ଚ ୨୩ରୁ ମହାତ୍ମା ଗାନ୍ଧୀ ଓଡ଼ିଶାରେ ସ୍ବାଧୀନତା ସଂଗ୍ରାମର ସ୍ଥିତି ପରଖିବା ନିମନ୍ତେ ଓଡ଼ିଶା ଗସ୍ତରେ ଆସିଥିଲେ। ଏହି ସମୟରେ ମାର୍ଚ୍ଚ ୨୭,୨୮ ଓ ୨୯ ତିନିଦିନ ବ୍ରହ୍ମପୁର ସହରରେ ଅବସ୍ଥାନ କରିବା ସହ ଜିଲାର ତତ୍କାଳୀନ ରାଜନୈତିକ ସ୍ଥିତି ସମୀକ୍ଷା କରିଥିଲେ। ଏହି ଅବସରରେ ତତ୍କାଳୀନ ବରିଷ୍ଠ ଆଇନଜୀବୀ ତଥା ସ୍ବାଧୀନତା ସଂଗ୍ରାମୀ ମଧୁସୂଦନ ପାଣିଗ୍ରାହୀଙ୍କ ବ୍ରହ୍ମପୁର ମୁଖ୍ୟ ଟାଉନ ହଲ୍ ରୋଡ ସ୍ଥିତ ବାସଭବନ ମଧୁମନ୍ଦିରରେ ରହିଥିଲେ। ଏହି ସୁନ୍ଦର ଅଟ୍ଟାଳିକା ସମ୍ମୁଖରେ ଥିବା ବିସ୍ତୃତ ଖୋଲାସ୍ଥାନରେ କର୍ମୀଙ୍କୁ ଉଦ୍ବୋଧନ ଦେବା ଓ ବୈଠକ ନିମନ୍ତେ ସ୍ଥାନ ଉପଯୁକ୍ତ ହୋଇଥିବାରୁ ବିଶିଷ୍ଟ ସ୍ବାଧୀନତା ସଂଗ୍ରାମୀ ଶଶିଭୂଷଣ ରଥଙ୍କ ଅନୁରୋଧ କ୍ରମେ ଗାନ୍ଧୀ ମଧୁମନ୍ଦିରରେ ରହିଥିଲେ। ସେ ସମୟରେ ମଧୁସୂଦନଙ୍କ ମଧୁମନ୍ଦିର ସହରର ଏକମାତ୍ର ଓଡ଼ିଆଙ୍କ ବାସଭବନ ଭାବେ ମୁଖ୍ୟ ରାସ୍ତାରେ ନିର୍ମିତ ହୋଇଥିଲା। ଗାନ୍ଧୀଙ୍କ ସହ ଓଡ଼ିଶା ଗସ୍ତରେ ଆସିଥିବା କେତେଜଣ ଜାତୀୟସ୍ତରୀୟ ନେତା ମଧ୍ୟ ମଧୁମନ୍ଦିରରେ ରହିଥିଲେ।
ତିନି ଦିନର ରହଣି ମଧ୍ୟରେ ଗାନ୍ଧିଜୀ ବ୍ରହ୍ମପୁର ସହରର ବିଶିଷ୍ଟ ସ୍ବାଧୀନତା ସଂଗ୍ରାମୀ ତଥା ପୂର୍ବତନ ରାଷ୍ଟ୍ରପତି ଭିଭି ଗିରି, ବିଶିଷ୍ଟ ଆଇନଜୀବୀ ଲିଙ୍ଗରାଜ ପାଣିଗ୍ରାହୀ, ଶ୍ୟାମସୁନ୍ଦର ଗନ୍ତାୟତ, ଖଲ୍ଲିିକୋଟ ରାଜା ରାମଚନ୍ଦ୍ର ମର୍ଦ୍ଦରାଜ ଦେଓ, ଲଲାମୋହନ ପଟ୍ଟନାୟକ(ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନର ପ୍ରଥମ ବାଚସ୍ପତି) ପ୍ରମୁଖଙ୍କ ସହ ଓଡ଼ିଶାର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରି ସ୍ବାଧୀନତା ଆନ୍ଦୋଳନକୁ ତୀବ୍ରତର କରିବା ନିମନ୍ତେ ଉଦ୍ବୋଧନ ଦେଇଥିଲେ।
ଏହି ୩ ଦିନ ମଧ୍ୟରେ ଜିଲାର ବହୁ ନେତା ଯୋଗ ଦେଇଥିଲେ। ମଧୁମନ୍ଦିରର ଐତିହାସିକ ମୂଲ୍ୟବୋଧ ଓ ଗୌରବକୁ ବୁଝିବା ସହ ଗାନ୍ଧୀଙ୍କ ବ୍ରହ୍ମପୁର ଗସ୍ତକୁ ମନେରଖିବା ନିମନ୍ତେ ଗାନ୍ଧୀଙ୍କ ଓଡ଼ିଶା ଗସ୍ତର ୧୦୦ବର୍ଷ ପୂର୍ତ୍ତି ଅବସରରେ ୨୦୨୧ରେ ଓଡ଼ିଶା ଡାକ ବିଭାଗ ପକ୍ଷରୁ ଗାନ୍ଧୀଙ୍କ ନାମରେ କେତେକ ଲଫାପା ପ୍ରକାଶିତ ହୋଇଥିଲେ। ସେଥିରେ ମଧୁମନ୍ଦିର ଫଟୋ ସ୍ଥାନ ପାଇଛି। ଯାହା ବ୍ରହ୍ମପୁରବାସୀଙ୍କ ନିମନ୍ତେ ଗୌରବର ବିଷୟ। ବର୍ତ୍ତମାନ ଏହି ମଧୁମନ୍ଦିରରେ ମଧୁସୂଦନ ପାଣିଗ୍ରାହୀଙ୍କ ପୁତ୍ର ବରିଷ୍ଠ ଆଇନଜୀବୀ ରବୀନ୍ଦ୍ରନାଥ ପାଣିଗ୍ରାହୀ ରହୁଛନ୍ତି।