ମୁମ୍ବାଇ: ବଲିଉଡର ସ୍ବର୍ଗତ ଅଭିନେତ୍ରୀ ମଧୁବାଲାଙ୍କ ଆଜି ଜନ୍ମ ବାର୍ଷିକୀ। ଫେବୃଆରୀ ୧୪ରେ ଜନ୍ମ ହୋଇଥିବା ମଧୁବାଲାଙ୍କ ପ୍ରକୃତ ନାମ ମମତାଜ ଜାହାନ ବେଗମ ଦେହଲବ। ତାଙ୍କୁ ଟ୍ରାଜେଡି କୁଇନ୍ ମଧ୍ୟ କୁହାଯାଉଥିଲା। ମଧୁବାଲା ୫୦ ଦଶକରେ ଦର୍ଶକଙ୍କ ହୃଦୟରେ ରାଜ୍ କରୁଥିଲେ। ସେ ସେହି ସମୟର ସର୍ବାଧିକ ପାରିଶ୍ରମିକ ପ୍ରାପ୍ତ ଅଭିନେତ୍ରୀ ଥିଲେ। ମଧୁବାଲା ତାଙ୍କ ବୃତ୍ତିଗତ ଜୀବନ ତଥା ବ୍ୟକ୍ତିଗତ ଜୀବନ ପାଇଁ ହେଡଲାଇନରେ ରହିଆସୁଥିଲେ। ବିଶେଷକରି ଦିଲୀପ କୁମାରଙ୍କ ସହ ପ୍ରେମ ଏବଂ ବ୍ରେକଅପ ଏବଂ ପରେ କିଶୋର କୁମାରଙ୍କ ସହ ବିବାହ ଯୋଗୁ ମଧୁବାଲା ଅନେକ ଚର୍ଚ୍ଚାରେ ରହିଆସିଛନ୍ତି। କିନ୍ତୁ କ୍ୱଚିତ୍ କେହି ଜାଣନ୍ତି ନାହିଁ ଯେ ଟ୍ରଜେଡି କୁଇନ୍ ଦିଲୀପ କୁମାରଙ୍କ ପୂର୍ବରୁ ଅନ୍ୟ କାହାକୁ ଭଲ ପାଉଥିଲେ। ମଧୁବାଲା ବହୁତ କମ ବୟସରେ କାମ କରିବା ଆରମ୍ଭ କରିଥିଲେ। ସେ ୧୯୪୨ରେ ଚଳଚ୍ଚିତ୍ର ‘ବସନ୍ତ’ରେ ଶିଶୁ କଳାକାର ଭାବରେ ଡେବ୍ୟୁ କରିଥିଲେ। ଏହାପରେ ୧୯୪୭ରେ ‘ନୀଳ କମଳ’ରେ ମୁଖ୍ୟ ଭୂମିକାରେ ନଜର ଆସିଥିଲେ। ଯେଉଁଥିରେ ବେଗମ ପାରା ଏବଂ ରାଜ କପୁର ମଧ୍ୟ ଅଭିନୟ କରିଥିଲେ।
ନିକଟରେ ମଧୁବାଲାଙ୍କ ଭଉଣୀଙ୍କୁ ଏକ ସାକ୍ଷାତକାରରେ ଦିଲୀପ କୁମାରଙ୍କ ପ୍ରେମରେ ପଡ଼ିବା ପୂର୍ବରୁ ମଧୁବାଲା
ପ୍ରେମନାଥଙ୍କ ପ୍ରେମରେ ପଡିଥିଲେ ବୋଲି ପଚରାଯାଇଥିଲା। ସେ ପ୍ରଶ୍ନର ଉତ୍ତର ଦେଇ କହିଥିଲେ, ହଁ ସେ ତାଙ୍କ ସହ ପ୍ରେମରେ ପଡିଥିଲେ। ପ୍ରେମନାଥ ମୁସଲମାନ ଥିଲେ। ସେତେବେଳେ ହିନ୍ଦୁ ଓ ମୁସଲମାନ ବିବାହ କରୁ ନ ଥିଲେ। ବାପା ସେମାନଙ୍କ ସମ୍ପର୍କକୁ ବିରୋଧ କରିଥିଲେ। ପ୍ରେମନାଥ ଚାହୁଁଥିଲେ କି ମଧୁବାଲା ଧର୍ମ ପରିବର୍ତ୍ତନ କରନ୍ତୁ କିନ୍ତୁ ସେ ମନା କରିଦେଇଥିଲେ। ଯାହାପରେ ତାଙ୍କ ସମ୍ପର୍କ ଭାଙ୍ଗି ଯାଇଥିଲା।
ପରେ ମଧୁବାଲା ଦିଲୀପ କୁମାରଙ୍କ ନିକଟତର ହୋଇଥିଲେ ମଧ୍ୟ ଏହି ସମ୍ପର୍କ ବଢିପାରି ନ ଥିଲା। ସେ ଚିକିତ୍ସା ପାଇଁ ଲଣ୍ଡନ ଯିବା ପୂର୍ବରୁ ୧୯୬୦ରେ କିଶୋର କୁମାରଙ୍କୁ ବିବାହ କରିଥିଲେ।