ରସୁଲପୁର,୨୮ା୪(ଡି.ଏନ.ଏ.): ରସୁଲପୁର ବ୍ଲକ୍ ଅଧୀନ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଅବ୍ୟବସ୍ଥା କ୍ରମଶଃ ଦୂର ହେବାରେ ଲାଗିଛି। ଏଠାରେ ରୋଗୀ ସେବାଠାରୁ ଆରମ୍ଭ କରି ଗରିବ ଲୋକଙ୍କୁ ମାଗଣା ସ୍ବାସ୍ଥ୍ୟସେବା ଉପଲବ୍ଧ ହେବା କ୍ଷେତ୍ରରେ ବିଶେଷ ପରିବର୍ତ୍ତନ ଘଟିଥିବା ପରିଲକ୍ଷିତ ହେଉଛି। ନିରାମୟ ଯୋଜନାକୁ ଅଧିକ କ୍ରୀୟାଶୀଳ ଓ ରୋଗୀ ସେବାମୁଖୀ ପାଇଁ ଡାକ୍ତରଖାନାରେ ସ୍କାନର ମେଶିନ ଲଗାଯାଇଛି। ରୋଗୀଙ୍କ ପାଇଁ ଉଦ୍ଦିଷ୍ଟ ଔଷଧ ଓ ପରୀକ୍ଷା ପରାମର୍ଶ ଚିଠାକୁ ମେଶିନରେ ସ୍କାନ କରାଯାଉଛି। ଏହା ସମୟସାପେକ୍ଷ ହେଲେ ବି ଏଭଳି କରାଯାଇ ପ୍ରତ୍ୟହ ଡାକ୍ତରଖାନାରେ ରୋଗୀଙ୍କୁ କେଉଁ ପ୍ରକାର ଔଷଧ ଲେଖାଯାଉଛି, ସେଥିରୁ କେଉଁ ସବୁ ଔଷଧ ନିରାମୟରେ ଉପଲବ୍ଧ ହେଉଛି, ଆଉ କେଉଁ ଔଷଧ ବାହାରୁ କିଣିବାକୁ ପଡୁଛି, କେଉଁ ସବୁ ପରୀକ୍ଷା ଡାକ୍ତରଖାନାରେ ମାଗଣାରେ ଉପଲବ୍ଧ ଏବଂ କେଉଁଗୁଡିକ ବାହାରେ ପରୀକ୍ଷା କରିବାକୁ ପଡୁଛି, ସେ ସବୁ ସ୍ପଷ୍ଟ ହୋଇପାରୁଛି। ଡାକ୍ତରଖାନାରେ ଉପଲବ୍ଧ ସ୍ବାସ୍ଥ୍ୟସେବା ସୁବିଧାରୁ ଲୋକେ କିଭଳି ବଞ୍ଚତ୍ତ ନହେବେ ସେଥି ସକାଶେ ଏଭଳି କରାଯାଉଛି। ଡାକ୍ତରଙ୍କ ଲାଭଖୋର ମନୋବୃତ୍ତିରେ ସ୍କାନର ମେଶିନ ବାଧକ ସାଜିବା ସହ ରୋଗୀଙ୍କୁ ମାଗଣା ସେବା ପ୍ରଦାନରେ ସହାୟକ ହେଉଛି ବୋଲି କୁହାଯାଉଛି।
ନୂତନ କୋଠାରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ବହିଃବିଭାଗ ରୋଗୀ ସେବା ସହଜ ହୋଇପାରିଛି। ଏଠାରେ ଦୈନିକ ଏକାଥରକେ ୩ ଡାକ୍ତରଙ୍କଠାରୁ ସେବା ଉପଲବ୍ଧ ହେଉଛି। ରୋଗୀ ସେମାନଙ୍କ ସମସ୍ୟାକୁ ନେଇ ପୃଥକ୍ ଡାକ୍ତରଙ୍କ ପରାମର୍ଶ ନେଉଥିବାରୁ ବିଭାଗରେ ଆଗଭଳି ଆଉ ଗହଳି ପରିଲକ୍ଷିତ ହେଉନାହିଁ। ଡାକ୍ତରଖାନାରେ ୩ଜଣ ଏମ୍ବିବିଏସ୍ ଡାକ୍ତର ରୋଗୀ ଦେଖୁଥିବାବେଳେ ଜଣେ ସ୍ତ୍ରୀ ଓ ପ୍ରସୂତି ବିଭାଗ ଡାକ୍ତର ସପ୍ତାହକୁ ୫ଦିନ, ଚକ୍ଷୁ ବିଭାଗ ଡାକ୍ତର ସପ୍ତାହକୁ(ମଙ୍ଗଳବାର ଓ ବୁଧବାର) ୨ ଦିନ ରୋଗୀ ସେବା ପ୍ରଦାନ କରୁଛନ୍ତି। ଏକାଥରକେ ୨ ଷ୍ଟାଫ ନର୍ସ ଡ୍ୟୁଟି କରୁଛନ୍ତି। ପ୍ରସବକାଳୀନ କକ୍ଷ, ଅସ୍ତ୍ରୋପଚାର ଗୃହ ଓ ଆବଶ୍ୟକ ସରଞ୍ଜାମ ଉପଲବ୍ଧ ହେଉଥିବାରୁ ଡାକ୍ତରଖାନାରେ ଶିଶୁ ଜନ୍ମ ହାର ବୃଦ୍ଧି ଘଟିଛି। ଏଥି ଯୋଗୁ ବହିଃବିଭାଗରେ ରୋଗୀ ସେବା ସହଜ ହେବା ସହ ରୋଗୀଙ୍କୁ ଉନ୍ନତ ଚିକିତ୍ସା ପ୍ରଦାନ ଉପରେ ଗୁରୁତ୍ୱ ଦିଆଯାଉଛି ବୋଲି ଡାକ୍ତରଖାନା କର୍ତ୍ତୃପକ୍ଷଙ୍କଠାରୁ ସୂଚନା ମିଳିଛି।
ହେଲେ ଏଯାଏ ଔଷଧ ଚିଠାରେ ସ୍ବଚ୍ଛତା ଅବଲମ୍ବନ କରାଯାଉନାହିଁ। ନିୟମାନୁଯାୟୀ ଡାକ୍ତରମାନେ ଔଷଧ ଚିଠା ଲେଖିବାବେଳେ ଔଷଧର ନାମ ଲେଖିବା ବଦଳରେ ଔଷଧଗୁଡ଼ିକ କେଉଁ ପଦାର୍ଥରେ ତିଆରି ହୋଇଛି ସେ ସମ୍ପର୍କରେ ଉଲ୍ଲେଖ କରିବେ। ତାହା ପୁଣି ଇଂଲିଶରେ ବଡ଼ ଅକ୍ଷରରେ ଲେଖାଯିବା ଦରକାର। ଏଭଳି ନିର୍ଦ୍ଦେଶ କୋର୍ଟଙ୍କ ପକ୍ଷରୁ ଦିଆଯାଇଛି। ମାତ୍ର ଏହି ନିର୍ଦ୍ଦେଶକୁ ଏଠାରେ କଡ଼ାକଡ଼ି ପାଳନ କରାଯାଉନାହିଁ। ଡାକ୍ତରମାନେ ଲେଖୁଥିବା ଔଷଧ ଚିଠାରେ ଔଷଧ ନାମ ଲେଖୁଛନ୍ତି। ମାତ୍ର ସେମାନେ ଲେଖୁଥିବା ଅକ୍ଷରଗୁଡ଼ିକ ସାଧାରଣରେ ପଢ଼ି ହେଉନାହିଁ। ତେବେ ଏ ଦିଗରେ କେବେ ସ୍ବଚ୍ଛତା ଆସିବ ସେ ନେଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ସୁଧୀର କୁମାର ସାହୁଙ୍କୁ ପଚାରିବାରୁ ସେ କହିଛନ୍ତି, ଏ ସମ୍ପର୍କରେ ଡାକ୍ତରମାନଙ୍କ ସହ ବୈଠକରେ ଆଲୋଚନା ହୋଇଛି। ଆଗକୁ ଏ ଦିଗରେ ପରିବର୍ତ୍ତନ ଆଣିବା ଉପରେ ଧ୍ୟାନ ଦିଆଯାଉଛି। ନିୟମ ଖିଲାପକାରୀ ଡାକ୍ତରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ପ୍ରକାଶ ଥାଉକି, ଦୀର୍ଘବର୍ଷ ଧରି ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିତ୍ୟକ୍ତ କୋଠାରେ ଚାଲୁଥିଲା। ୨ ପଞ୍ଚାୟତର ସୀମା ବିବାଦ ଯୋଗୁ ଡାକ୍ତରଖାନା ସ୍ଥାନାନ୍ତର ହୋଇପାରୁ ନ ଥିଲା। ଏବେ ଡାକ୍ତରଖାନା ସ୍ଥାନାନ୍ତର ହେବା ସହ ସ୍ବାସ୍ଥ୍ୟ ଅଧିକାରୀ ଡାକ୍ତର ସାହୁଙ୍କ ଯୋଗଦାନ ପରେ ଡାକ୍ତରଖାନା ସ୍ଥିତିରେ ସୁଧାର ଆସିପାରିଛି। ପୂର୍ବସ୍ଥାନରେ ପ୍ରସବକାଳୀନ କକ୍ଷ ଓ ଅସ୍ତ୍ରୋପଚାର ଗୃହ ବିପଦ ସଂକୁଳ ଅବସ୍ଥାରେ ରହିଥିଲା। ଏଠାରେ ସ୍ତ୍ରୀ ଓ ପ୍ରସୂତି ବିଭାଗ ଡାକ୍ତର ନିଯୁକ୍ତି ଥାଇ ବି ଶିଶୁ ଜନ୍ମ ସମ୍ଭବ ହୋଇପାରୁ ନ ଥିଲା। ଏବେ ଏ ସବୁ କ୍ଷେତ୍ରରେ ପରିବର୍ତ୍ତନ ଘଟୁଛି। ଡାକ୍ତରଙ୍କ ପାଳି ଡ୍ୟୁଟିରେ ପୂର୍ଣ୍ଣଛେଦ ପଡ଼ିଛି। ଡାକ୍ତରଖାନାକୁ ଆସୁଥିବା ରୋଗୀଙ୍କ ଅଭିଯୋଗ ଶୁଣାଣିକୁ ତ୍ୱରିତ କରାଯାଇଛି। ଏହାବାଦ୍ ଅନ୍ୟ ସବୁ ଦିଗରେ ସ୍ବାଭାବିକ ସ୍ଥିତି ଫେରିବା ଉପରେ ଗୁରୁତ୍ୱ ଦିଆଯାଉଛି ବୋଲି ସ୍ବାସ୍ଥ୍ୟ ଅଧିକାରୀଙ୍କ ସହ ଆଲୋଚନା ବେଳେ ସେ ପ୍ରକାଶ କରିଛନ୍ତି।