ନାଓ୍ବାଡା,୨।୨: ବିହାର ନାଓ୍ବାଡାର ଝିଅ ଅଭିନେତ୍ରୀ ତଥା ପୂର୍ବତନ ମିସ୍ ଇଣ୍ଡିଆ ଇଣ୍ଟରନ୍ୟାସନାଲ ଆୟଶା ଏସ୍.ଏମନଙ୍କୁ ଶ୍ରେଷ୍ଠ ଅଭିନେତ୍ରୀ ଡେବ୍ୟୁ ପୁରସ୍କାର ପ୍ରଦାନ କରାଯାଇଛି। ନିର୍ଦ୍ଦେଶକ ମଧୁର ଭଣ୍ଡାରକରଙ୍କ ଫିଲ୍ମ ‘ଇଣ୍ଡିଆ ଲକଡାଉନ୍’ରେ ନିଜର ଦମ୍ଦାର ଅଭିନୟ ପାଇଁ ଆୟଶାଙ୍କୁ ଶ୍ରେଷ୍ଠ ଅଭିନେତ୍ରୀ ଡେବ୍ୟୁ ପୁରସ୍କାର ପ୍ରଦାନ କରାଯାଇଥିବା ଜଣାପଡ଼ିଛି। ଏହି ପୁରସ୍କାର ଜାନୁଆରୀ ୩୦ରେ ମୁମ୍ବାଇର ନ୍ୟାସନାଲ ସ୍ପୋର୍ଟସ କ୍ଲବ ଅଫ୍ ଇଣ୍ଡିଆରେ ଆଇପିଏସ୍ ଅଧିକାରୀ ବିଶ୍ୱାସ ନାଗରେ ପାଟିଲଙ୍କ ଦ୍ୱାରା ଆୟଶାଙ୍କୁ ପ୍ରଦାନ କରାଯାଇଥିଲା। ବିଶ୍ୱାସ ପାଟିଲ ମହାରାଷ୍ଟ୍ରର ଦୁର୍ନୀତି ନିବାରଣ ବ୍ୟୁରୋରେ ପୋଲିସର ଅତିରିକ୍ତ ମହାନିର୍ଦ୍ଦେଶକ ଭାବେ କାର୍ଯ୍ୟରତ ଅଛନ୍ତି। ମଧୁର ଭଣ୍ଡାରକରଙ୍କ ଦ୍ୱାରା ନିର୍ଦ୍ଦେଶିତ ହୋଇଥିବା ଏହି ଫିଲ୍ମ ଆୟଶାଙ୍କ ପ୍ରଥମ ଫିଲ୍ମ। ଡିସେମ୍ବର ୨ରେ ଜି-୫ରେ ଫିଲ୍ମ ‘ଇଣ୍ଡିଆ ଲକଡାଉନ’ ରିଲିଜ୍ ହୋଇଥିଲା।
