ଧାମନଗର,୪।୪ (ଡି.ଏନ.ଏ.): ଜାତୀୟ ହ୍ବିଲଚେୟାର ଫେନ୍ସିଂ ଚାମ୍ପିୟନଶିପ୍ରେ ସ୍ବର୍ଣ୍ଣ ଓ ରୌପ୍ୟ ପଦକ ପାଇ ଗୌରବ ଆଣିଛନ୍ତି ଭଦ୍ରକ ଜିଲା ଧାମନଗର ବ୍ଲକ ଅଧୀନ ଦଳାଙ୍ଗ ପଞ୍ଚାୟତ ରାମେଶ୍ବରପୁର ଗ୍ରାମର ମଧୁସ୍ମିତା ସାହୁ (୨୯)। ହରିଆଣାର କର୍ନାଲଠାରେ ଗତ ମାସରେ ଆୟୋଜିତ ୧୫ତମ ଜାତୀୟ ଫେନ୍ସିଂ ଚାମ୍ପିୟନଶିପ୍ରେ ସେ ବିଜୟୀ ହୋଇଥିବାରୁ ବିଧାୟକ ସୂର୍ଯ୍ୟବଂଶୀ ତାଙ୍କୁ ସମ୍ବର୍ଦ୍ଧିତ କରିଛନ୍ତି। ମଧୁସ୍ମିତା ହରିଆଣାରୁ ଫେରି ଭୁବନେଶ୍ବରରେ ପହଞ୍ଚିବା ପରେ ସୋମବାର ବିଧାୟକଙ୍କୁ ତାଙ୍କ କ୍ୱାର୍ଟର୍ସରେ ଭେଟିଥିଲେ। ଜାତୀୟ ପ୍ରତିଯୋଗିତାରେ ପଦକ ଜିଣି ଧାମନଗର ସହ ଓଡ଼ିଶାର ସମ୍ମାନ ରଖିଥିବା ବିଧାୟକ ତାଙ୍କୁ କହିଥିଲେ। ଜନ୍ମ ପରେ ପରେ ପୋଲିଓରେ ଆକ୍ରାନ୍ତ ମଧୁସ୍ମିତା ପିଲାଟି ବେଳୁ ଖେଳ ପ୍ରତି ଆଗ୍ରହ ରଖିଥିଲେ। ପରିବାରର ଆର୍ଥିକ ଅବସ୍ଥା ସ୍ବଚ୍ଛଳ ନ ଥିଲେ ମଧ୍ୟ ସେ କେବେ ବି ନିଜ ଲକ୍ଷ୍ୟରୁ ହଟି ନ ଥିଲେ। ଜାତୀୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ ଲାଗି ଯୋଗ୍ୟ ବିବେଚିତ ହୋଇଥିଲେ ମଧ୍ୟ ଗରିବ ପରିବାର ହୋଇଥିବାରୁ ଭାଙ୍ଗିପଡ଼ିଥିଲେ। ତାଲିମ ନେବାକୁ ନା ଅର୍ଥ ଥିଲା ନା ଖେଳ ସରଞ୍ଜାମ ଥିଲା। ଏତିକିବେଳେ ଗଁାକୁ କୃତଜ୍ଞତା ଯାତ୍ରାରେ ଆସିଥିବା ବିଧାୟକ ସୂର୍ଯ୍ୟବଂଶୀ ସୂରଜ ଏ ବିଷୟରେ ଜାଣିବା ପରେ ଗୋଟିଏ ସପ୍ତାହ ଭିତରେ ମଧୁସ୍ମିତାଙ୍କୁ ଖେଳ ସରଞ୍ଜାମ ସବୁ ଯୋଗାଇ ଦେଇଥିଲେ। ଏଥିସହ ଜାତୀୟସ୍ତରୀୟ ଚାମ୍ପିୟନଶିପ୍ରେ ଭାଗ ନେବା ଲାଗି ତାଙ୍କୁ ଆବଶ୍ୟକ ଅର୍ଥରାଶି ମଧ୍ୟ ପ୍ରଦାନ କରିଥିଲେ। ମଧୁସ୍ମିତା ହରିଆଣାର କର୍ନାଲରେ ପହଞ୍ଚି ଚାମ୍ପିୟନଶିପ୍ରେ ଅଂଶଗ୍ରହଣ କରିଥିଲେ। ଏହାସହ ଆସନ୍ତା ସେପ୍ଟେମ୍ବରରେ ଥାଇଲାଣ୍ଡରେ ହେବାକୁ ଥିବା ଅନ୍ତର୍ଜାତୀୟ ହ୍ବିଲଚେୟାର ଫେନ୍ସିଂ ଚାମ୍ପିୟନଶିପ୍ରେ ଦେଶର ପ୍ରତିନିଧିତ୍ୱ କରିବା ପାଇଁ ସେ ମନୋନୀତ ହୋଇଛନ୍ତି।