ଭୋପାଳ,୧।୮: ପାର୍କିଂ ଫି ନ ଦେବାରୁ ଦୁଇ ପୋଲିସ ଅଧିକାରୀଙ୍କୁ ମାଡ଼ ମାରିଛନ୍ତି ପାର୍କିଂ କଣ୍ଟ୍ରାକ୍ଟର ଓ ତାଙ୍କ ସହଯୋଗୀମାନେ। ଏହି ଘଟଣା ଘଟିଛି ମଧ୍ୟପ୍ରଦେଶର ରାତଲାମ ରେଲଓ୍ବେ ଷ୍ଟେଶନ ବାହାରେ। ଆତଙ୍କବାଦୀ ନିରୋଧି ସ୍କ୍ବାଡର ଦୁଇ ସଦସ୍ୟଙ୍କୁ ଆକ୍ରମଣର ସମ୍ପୂର୍ଣ୍ଣ ଘଟଣା କଏଦ ହୋଇଛି ସିସିଟିଭିରେ।
ପାର୍କିଂରେ ଗାଡ଼ିରେ ରଖିବା ପରେ ଟଙ୍କା ନ ଦେବାରୁ ଦୁଇ ପୋଲିସ କର୍ମୀଙ୍କ ସହ ପାର୍କିଂ କଣ୍ଟ୍ରାକ୍ଟର ମୀନାଙ୍କ ସହ ଗଣ୍ଡଗୋଳ ହୋଇଥିଲା। ସ୍ଥିତି ଏତେ ଗମ୍ଭୀର ଥିଲା ଯେ, ଆକ୍ରମଣକାରୀଙ୍କ ଠାରୁ ବର୍ତ୍ତିବା ପାଇଁ ପୋଲିସ ଅଧିକାରୀଙ୍କୁ ପିସ୍ତଲ ଦେଖାଇବାକୁ ପଡ଼ିଥିଲା। ଏହାସତ୍ତ୍ୱେ ପଛଘୁଞ୍ଚା ଦେଇ ନ ଥିଲେ ଆକ୍ରମଣକାରୀ। ଶେଷରେ ଷ୍ଟେଶନରେ କାର୍ଯ୍ୟରତ କିଛି ପୋଲିସକର୍ମୀ ଉଭୟ ପକ୍ଷଙ୍କୁ ବୁଝାଇବା ପରେ ବିବାଦ ଥମି ଥିଲା। ତେବେ ଏ ସଂକ୍ରାନ୍ତରେ ଥାନାରେ କୌଣସି ମାମଲା ରୁଜୁ ହୋଇ ନାହିଁ।
