ଭୋପାଳ, ୨୫।୬- ମଧ୍ୟପ୍ରଦେଶର ରାଜଧାନୀ ଭୋପାଳରେ କିଛିଦିନ ହେବ ପ୍ରବଳ ବର୍ଷା ସାଙ୍ଗକୁ ପବନ ଯୋଗୁ ୨୦୦ ବର୍ଷ ତଳର ଏକ ପୁରୁଣା ବରଗଛ ଉପୁଡ଼ି ପଡ଼ିଛି। କିନ୍ତୁ ସ୍ଥାନୀୟ ପ୍ରଶାସନ ପକ୍ଷରୁ ଏହାକୁ ପୁର୍ନବାର ବଞ୍ଚାଇବାକୁ ଏକ ଅଭିନବ ପ୍ରୟାସ ଆରମ୍ଭ ହୋଇଛି। ସ୍ଥାନୀୟ କମଳା ନେହରୁ ପାର୍କରେ ରହିଥିବା ୨୦୦ ବର୍ଷ ତଳର ଏହି ପୁରୁଣା ବରଗଛଟି ଅନେକ ଲୋକଙ୍କୁ ଛାଇ ଦେଇଆସୁଥିଲା। କିନ୍ତୁ ଚଳିତ ବର୍ଷ ମୌସୁମୀ ଆରମ୍ଭରୁ ଲଗାତର ହୋଇଆସୁଥିବା ବର୍ଷାକୁ ଏହି ବରଗଛଟି ସାମ୍ନା କରିପାରି ନାହିଁ। ଗଛଟି ଉପୁଡ଼ି ପଡ଼ିବା ସହ ଏହାର ଚେର ସବୁ ନଷ୍ଟ ହୋଇଯାଇଥିବା ଜଣାପଡ଼ିଛି। ତେବେ ୨୦୦ ବର୍ଷ ତଳର ଏହି ବରଗଛର ମହତ୍ତ୍ୱକୁ ନଜରରେ ରଖି ସ୍ଥାନୀୟ ନଗର ନିଗମ ବିଭାଗ ପକ୍ଷରୁ ଏହାକୁ ପୁର୍ନବାର ବଞ୍ଚାଇବାକୁ ପ୍ରୟାସ ଆରମ୍ଭ ହୋଇଛି। ଏଥିପାଇଁ ଉଦ୍ୟାନ ବିଭାଗର ମଧ୍ୟ ସହାୟତା ନିଆଯାଇଛି। ଭୂମି ଉପରେ ଶୋଇ ପଡ଼ିଥିବା ଏହି ଗଛର ଚେର ଉପରେ ପ୍ରଥମେ ମାଟି ପକାଇବା କାମ ଆରମ୍ଭ ହୋଇଛି। ଗଛଟି ଏତେ ବିଶାଳ ଯେ ଏହାର ମୂଳକୁ ଢ଼ାଙ୍କିବା ପାଇଁ ୧୦ ଟ୍ରକ ମାଟିର ଆବଶ୍ୟକ ହୋଇଛି। ଚେରଗୁଡ଼ିକ ମାଟିରେ ଆଚ୍ଛାଦିତ ହେବାପରେ ଏହାକୁ ପୋତି ଦିଆଯିବ। ଏହାପରେ ଗଛମୂଳରେ ନିରନ୍ତର ପାଣିଦେବା ଲାଗି ପାଇପ୍ର ବନ୍ଦୋବସ୍ତ ମଧ୍ୟ କରାଯାଇଛି। ଏହା ଫଳରେ ଚେରଗୁଡ଼ିକ ଶୁଖିବାରୁ ରକ୍ଷା ପାଇଯିବ। ସେହିଭଳି ଗଛର ଚାରିପଟେ ବାଉଣ୍ଡରୀ ମଧ୍ୟ କରାଯାଇଛି। ଯାହାଦ୍ୱାରା ମାଟି ବାହାରକୁ ଆସିପାରିବ ନାହିଁ। ପୂର୍ବରୁ ଏହି ବରଗଛକୁ ଦୁଇଥର ବଜ୍ରପାତ ହୋଇଥିବା ଜଣାପଡ଼ିଛି।
