ଓ୍ବାଶିଂଟନ୍, ୧୬ା୪: ହଜାର ହଜାର ନିବେଶକଙ୍କ ପାଇଁ ଭରସାର ଅନ୍ୟନାମ ପାଲଟିଥିଲେ ବର୍ନାଡ ମ୍ୟାଡ୍ଅଫ୍। ତାଙ୍କ ନିକଟରେ ନୋବେଲ ବିଜେତା ଏଲି ଓ୍ବିସେଲ, ଫିଲ୍ମ ନିର୍ମାତା ଷ୍ଟିଭେନ ସ୍ପାଇଲବର୍ଗ, ଅଭିନେତା କେଭିନ୍ ବେକନ, କାଏରା ସେଜଓ୍ବିକ୍ଙ୍କ ସମେତ ବହୁ ବ୍ୟାଙ୍କ, କଲେଜ, ୟୁନିଭର୍ସିଟି ଓ ଘରୋଇ ସଂସ୍ଥା ଅର୍ଥ ଜମା କରିଥିଲେ। ହେଲେ ପ୍ରତିଶ୍ରୁତି ଓ ଭରସା ଅନୁସାରେ ନିବେଶକଙ୍କୁ ଲାଭ ମିଳି ନ ଥିଲା। ଶେଷରେ ନିବେଶକଙ୍କୁ ଡୁବାଇଦେବା ଏହି ଆମେରିକୀୟ ଫାଇନାନ୍ସର୍ଙ୍କୁ ୧୫୦ ବର୍ଷ ଜେଲ ଦଣ୍ଡାଦେଶ ହୋଇଥିବାବେଳେ କାରାଗାରରେ ହିଁ ତାଙ୍କ ମୃତ୍ୟୁ ଘଟିଛି।
ବିଶ୍ୱ ଇତିହାସରେ ସବୁଠାରୁ ବଡ଼ ଚିଟ୍ଫଣ୍ଡ ଦୁର୍ନୀତିର ମାଷ୍ଟରମାଇଣ୍ଡ ବର୍ନାଡ ମ୍ୟାଡ୍ଅଫ୍ଙ୍କ ବୁଧବାର ଆମେରିକାର ଏକ ଜେଲ୍ରେ ମୃତ୍ୟୁ ଘଟିଛି। ତାଙ୍କୁ ୮୨ ବର୍ଷ ହୋଇଥିଲା। ଷ୍ଟକ୍ ମାର୍କେଟ୍ରେ ଆମେରିକୀୟ ନିବେଶକଙ୍କୁ ଭଲ ଲାଭର ଗ୍ୟାରେଣ୍ଟି ଦେଇ ସେମାନଙ୍କଠାରୁ ବର୍ନାଡ ପ୍ରାୟ ୬୪.୮ ବିଲିୟନ ଡଲାର (୪୮,୪୮,୯୬, ୧୩,୨୦,୦୦୦ ଟଙ୍କା) ଠକି ନେଇଥିଲେ। ୨୦୦୮ରେ ଗିରଫ ହେବା ପରେ ତାଙ୍କୁ ୧୫୦ ବର୍ଷ ପର୍ଯ୍ୟନ୍ତ ଜେଲ ଦଣ୍ଡାଦେଶ ହୋଇଥିଲା।
ନିବେଶକଙ୍କ ପାଇଁ ଭରସାର ଅନ୍ୟନାମ ପାଲଟିଥିବା ବର୍ନାଡଙ୍କ ନିକଟରେ କେବଳ ଆମେରିକା ନୁହେଁ, ବିଶ୍ୱର ବହୁ ପ୍ରମୁଖ ବ୍ୟକ୍ତି ବିଶେଷ ଏପରିକି ନୋବେଲ ବିଜେତା ଏଲି ଓ୍ବିସେଲ, ଫିଲ୍ମ ନିର୍ମାତା ଷ୍ଟିଭେନ ସ୍ପାଇଲବର୍ଗ, ଅଭିନେତା କେଭିନ୍ ବେକନ, କାଏରା ସେଜଓ୍ବିକ୍ଙ୍କ ସମେତ ବହୁ ବ୍ୟାଙ୍କ, କଲେଜ, ୟୁନିଭର୍ସିଟି, ବେସରକାରୀ ସଂସ୍ଥା ସେମାନଙ୍କ ଅର୍ଥ ଜମା କରିଥିଲେ। ଅନେକ ଲୋକ ଅଧିକ ଲାଭ ଆଶାରେ ସେମାନଙ୍କ ଜୀବନସାରା ଅର୍ଜିତ ପୁଞ୍ଜିକୁ ବର୍ନାଡଙ୍କୁ ଦେବାରେ ପଛେଇ ନ ଥିଲେ। ଦୀର୍ଘ ୧୬ ବର୍ଷ ପର୍ଯ୍ୟନ୍ତ ସେ ଏହି କାରବାର ଜାରି ରଖିଥିଲେ। ଖୁବ କମ୍ ଦିନରେ ବର୍ନାଡ ବିପୁଳ ସମ୍ପତ୍ତିର ଅଧିକାରୀ ହୋଇଯାଇଥିଲେ। ହେଲେ ପ୍ରତିଶ୍ରୁତି ଓ ଭରସା ଅନୁସାରେ ନିବେଶକଙ୍କୁ ଲାଭ ମିଳି ନ ଥିଲା। ଏପରିକି ବର୍ନାଡ ନୂଆ ଜମାକାରୀଙ୍କ ଟଙ୍କାକୁ ପୁରୁଣା ନିବେଶକଙ୍କୁ ଦେଉଥିଲେ। ୨୦୦୮ରେ ଆମେରିକା ଅର୍ଥନୀତିରେ ସଙ୍କଟ ଆସିବା ପରେ ବଡ଼ ନିବେଶକମାନେ ସେମାନଙ୍କ ଟଙ୍କା ଫେରସ୍ତ ଚାହିଁଥିଲେ। ପରେ ସେମାନେ ଠକାମିର ଶିକାର ହୋଇଥିବା ଜାଣିବାକୁ ପାଇଥିଲେ।