ଢେଙ୍କାନାଳ ଅଫିସ,୫।୨: ଢେଙ୍କାନାଳର ବିଶ୍ୱ ପ୍ରସିଦ୍ଧ ମହିମା ଧର୍ମର ପୀଠ ମହିମାଗାଦି ଯୋରନ୍ଦାରେ ଶନିବାର ଠାରୁ ଆରମ୍ଭ ହୋଇଛି ମାଘ ମେଳା। ୨ ବର୍ଷ ପରେ କରୋନା କଟକଣା ହଟିଯାଇଥିବାରୁ ଚଳିତବର୍ଷ ବେଶ୍ ଯାକଜମକରେ ମାଘମେଳା ଅନୁଷ୍ଠିତ ହେଉଛି। ସନ୍ଧ୍ୟା ସାଢେ ୫ଟାରେ ଗାଦି ମନ୍ଦିରର ୪ଟି ଦ୍ୱାରରେ ମହିମା ସନ୍ନ୍ୟାସୀମାନଙ୍କ ଦ୍ୱାରା ଝାଡ଼ଦୀପ ପ୍ରଜ୍ୱଳନ କରାଯାଇଥିଲା। ସାଧୁ ସନ୍ନ୍ୟାସୀ ଓ ଶ୍ରଦ୍ଧାଳୁଙ୍କ ଦ୍ୱାରା ଅଲେଖ ମହିମା ଧ୍ୱନିରେ ମହିମାଗାଦି ଯୋରନ୍ଦା ପ୍ରକମ୍ପିତ ହୋଇଉଠିଥିଲା। ମହିମା ସନ୍ନ୍ୟାସୀମାନେ ଘୃତାହୁତି କରି ବିଶ୍ୱ କଲ୍ୟାଣ ପାଇଁ ଶୂନ୍ୟ ପ୍ରଭୁଙ୍କ ନିକଟରେ ପ୍ରାର୍ଥନା କରିଥିଲେ।
ଚଳିତବର୍ଷ ଏହି ମାଘ ମେଳାରେ ପ୍ରାୟ ୫ଲକ୍ଷ ଲୋକଙ୍କ ସମାଗମ ହୋଇଛି। ମଧ୍ୟପ୍ରଦେଶ, ଛତିଶଗଡ, ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ, ଆସାମ, ଆନ୍ଧ୍ରପ୍ରଦେଶ ଓ ତେଲଙ୍ଗାନା ଆଦି ରାଜ୍ୟ ସମେତ ଓଡ଼ିଶାର ବିଭିନ୍ନ ଅଞ୍ଚଳରୁ ଲକ୍ଷାଧିକ ମହିମା ସନ୍ନ୍ୟାସୀ ଓ ଶ୍ରଦ୍ଧାଳୁ ମେଳାରେ ପହଞ୍ଚିଛନ୍ତି। ଅଷ୍ଟ୍ରେଲିଆ ଓ ଇଂଲଣ୍ଡରୁ ମଧ୍ୟ ବିଦେଶୀ ପର୍ଯ୍ୟଟକ ଏହି ମେଳା ବୁଲିବାକୁ ଆସିଛନ୍ତି। ନବରଙ୍ଗପୁର ଜିଲା ରାଇଘର ବ୍ଲକ ଅଞ୍ଚଳରୁ ୨୫ ମହିମା ଶ୍ରଦ୍ଧାଳୁ ୫ଶହ କିଲୋମିଟର ଚାଲିକରି ଯୋରନ୍ଦାରେ ପହଞ୍ଚିଛନ୍ତି। ମେଳା ଉପଲକ୍ଷେ ମହିମା ସନ୍ନ୍ୟାସୀମାନେ ବ୍ରାହ୍ମ ମୁହୂର୍ତ୍ତରୁ ନୀତିକାନ୍ତି କରିଥିଲେ। ଝାଡ଼ଦୀପଗୁଡିକୁ ପ୍ରସ୍ତୁତ କରାଯାଇଥିଲା। ବହୁ ସଂଖ୍ୟାରେ ଶ୍ରଦ୍ଧାଳୁ ଗାଦି ମନ୍ଦିର ପରିସରରେ ମହିମା ସନ୍ନ୍ୟାସୀ ମାନଙ୍କ ଠାରୁ ଆଶୀର୍ବାଦ ଭିକ୍ଷା କରିଥିଲେ। ମହିମା ଶ୍ରଦ୍ଧାଳୁମାନଙ୍କ ଖଞ୍ଜଣି ଭଜନରେ ମହିମାପୀଠ ଯୋରନ୍ଦା ଉତ୍ସବ ମୁଖର ହୋଇପଡିଛି। ଦୁଇଗୋଷ୍ଠୀ ମହିମା ସନ୍ନ୍ୟାସୀଙ୍କ ମଧ୍ୟରେ ବିବାଦ ସତ୍ତ୍ୱେ ସମସ୍ତଙ୍କ ସହମତିରେ ଚଳିତବର୍ଷ ମାଘମେଳା ଶୃଙ୍ଖଳାର ସହ ଆରମ୍ଭ ହୋଇଛି। ଶାନ୍ତିଶୃଙ୍ଖଳା ରକ୍ଷା ପାଇଁ ପୋଲିସ ପ୍ରଶାସନ ପକ୍ଷରୁ ୯ ପ୍ଲାଟୁନ ଫୋର୍ସ ମୁତୟନ କରାଯାଇଛି। ଜିଲାପାଳ, ଏସ୍ପି, ଉପଜିଲାପାଳ ପ୍ରମୁଖ ଉପସ୍ଥିତ ରହି ଶୃଙ୍ଖଳିତ ମେଳା ଉପରେ ନଜର ରଖିଛନ୍ତି।
ଏ ସଂକ୍ରାନ୍ତରେ ଜିଲାପାଳ ସରୋଜ କୁମାର ସେଠୀ କହିଛନ୍ତି, ମହିମାଗାଦି ଯୋରନ୍ଦା ମାଘ ମେଳାର ପ୍ରସିଦ୍ଧି ରହିଛି। ଏଠାକୁ ରାଜ୍ୟ ଓ ରାଜ୍ୟ ବାହାରୁ ବହୁ ଶ୍ରଦ୍ଧାଳୁ, ସାଧୁ ସନ୍ନ୍ୟାସୀ ଆସିଛନ୍ତି। ଦୁଇ ମହିମା ସନ୍ନ୍ୟାସୀ ଗୋଷ୍ଠୀଙ୍କ ମଧ୍ୟରେ ଥିବା ବିବାଦର ଅନ୍ତହେଉ ବୋଲି ଶୂନ୍ୟ ପ୍ରଭୁଙ୍କ ନିକଟରେ ପ୍ରାର୍ଥନା କରୁଛୁ। ଉଭୟେ ଶାନ୍ତିଶୃଙ୍ଖଳା ରକ୍ଷା କରି ମହିମାଧର୍ମ ପୀଠର ଗୌରବକୁ ବଢାନ୍ତୁ ବୋଲି ଜିଲାପାଳ ପ୍ରକାଶ କରିଛନ୍ତି। ଏସ୍ପି ଜ୍ଞାନରଞ୍ଜନ ମହାପାତ୍ର କହିଛନ୍ତି, ମାଘ ମେଳାରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମକୁ ନେଇ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି। ଭିଡ ନିୟନ୍ତ୍ରଣ ପାଇଁ ବ୍ୟବସ୍ଥା ହୋଇଛି। ପାର୍କିଂ ଓ ଟ୍ରାଫିକ ନିୟନ୍ତ୍ରଣ ପ୍ରତି ବିଶେଷ ଧ୍ୟାନ ଦିଆଯାଇଛି। ଅତ୍ୟଧିକ ବୟସ୍କ ଲୋକଙ୍କୁ ଭିଡ ମଧ୍ୟକୁ ନ ଯିବାକୁ ଅନୁରୋଧ କରାଯାଇଛି ବୋଲି ଏସ୍ପି ପ୍ରକାଶ କରିଛନ୍ତି। ଉପଜିଲାପାଳ ସ୍ନିଗ୍ଧାରାଣୀ ଧଳ ମଧ୍ୟ ଉପସ୍ଥିତ ଅଛନ୍ତି।