ରାଉରକେଲା,୨୨।୧୦(ସଙ୍ଗୀତା ଜେନାଶାରଦୀୟ ଦୁର୍ଗାପୂଜା ପାଇଁ ଇସ୍ପାତ ନଗରୀ ରାଉରକେଲା ଚଳଚଞ୍ଚଳ ହୋଇପଡିଛି। ସହରରେ ଷ୍ଟିଲ୍ ଟାଉନଶିପ୍, ସିଭିଲ ଟାଉନଶିପ୍ ଓ ଫର୍ଟିଲାଇଜର ଟାଉନଶିପ୍ ଆଦି ସମୁଦାୟ ୧୦୮ଟି ସ୍ଥାନରେ ଦୁର୍ଗତିନାଶିନୀ ମା’ ଦୁର୍ଗାଙ୍କ ପୂଜା ଆୟୋଜନ ହୋଇଛି। ପୂଜାକୁ ଆକର୍ଷଣୀୟ କରିବା ପାଇଁ ରଙ୍ଗବେରଙ୍ଗ ଆଲୋକମାଳାରେ ସହରକୁ ସଜ୍ଜିତ କରାଯାଇଛି। ବିଭିନ୍ନ ରାଜ୍ୟର ପ୍ରସିଦ୍ଧି ଲାଭ କରିଥିବା ରାଜ ଉଆସ, ମନ୍ଦିର ଓ ବୈଜ୍ଞାନିକ ଉପକରଣକୁ ତୋରଣ ଭାବେ ତିଆରି କରାଯାଇଛି। ଶୁକ୍ରବାର ରାତିରେ ମଣ୍ଡପଗୁଡିକରେ ମା’ଙ୍କ ବିଲ୍ବବରଣ ସହ ଶନିବାର ସକାଳେ ୭ମୀ ପୂଜା ହୋଇଛି। ଏହି ଅବସରରେ କଳସ ଯାତ୍ରା ହୋଇଥିଲା। ପୂଜା ଦେଖିବା ପାଇଁ ବିଭିନ୍ନ ମଣ୍ଡପରେ ପ୍ରବଳ ଗହଳି ହୋଇଥିଲା। ଭିଡ଼ ନିୟନ୍ତ୍ରଣ ପାଇଁ ୨୪ ପ୍ଲାଟୁନ ଫୋର୍ସ, ୧ୟୁନିଟ୍ ଡିଭିଏଫ୍, ୪ଶହ ହୋମଗାର୍ଡ ମୁତୟନ ହୋଇଛନ୍ତି। ମୁଖ୍ୟ ଜନଗହଳିପୂର୍ଣ୍ଣ ମଣ୍ଡପଗୁଡିକରେ ପୋଲିସ କଣ୍ଟ୍ରୋଲ ରୁମ୍ ପ୍ରତିଷ୍ଠା କରାଯାଇଛି। ଏହାକୁ ତଦାରଖ କରିବା ପାଇଁ ୧୧ ଜଣ ଡିଏସ୍ପି, ୩ଜଣ ଅତିରିକ୍ତ ଏସପି, ୯୨ ଜଣ ଥାନାଧିକାରୀ ଓ ସବ୍ଇନସ୍ପେକ୍ଟର ରହିବେ ବୋଲି ଏସ୍ପି ମିତ୍ରଭାନୁ ମହାପାତ୍ର ସୂଚନା ଦେଇଛନ୍ତି। ଏହାବ୍ୟତୀତ ମଣ୍ଡପରେ ଭକ୍ତଙ୍କ ସୁରକ୍ଷା ପାଇଁ ସିସିଟିଭି ଓ ସ୍ବଚ୍ଛ ପରିମଳ ବଜାୟ ରଖିବାକୁ ପୂର୍ବରୁ ପୂଜା କମିଟିକୁ ନିର୍ଦ୍ଦେଶ ଦିଆଯାଇଛି। ପୋଲିସ ପାଟ୍ରୋଲିଂକୁ କଡ଼ାକଡ଼ି କରାଯିବା ଲାଗି କୁହାଯାଇଛି ବୋଲି ଏସ୍ପି ମହାପାତ୍ର ସୂଚନା ଦେଇଛନ୍ତି।