ନନ୍ଦାହାଣ୍ଡି,୧୯।୪,(ଡି.ଏନ୍.ଏ.): ୨୦୦୪ରେ ଆରମ୍ଭ ହୋଇଥିବା ନ୍ୟାସନାଲ ଫୁଡ୍ ଫର ୱାର୍କ ପ୍ରୋଗ୍ରାମ ଏବଂ ଏମ୍ଜିଏନ୍ଆର୍ଇଜିଏସ୍ରେ କର୍ମ ନିଯୁକ୍ତି ପାଇଁ ନବରଙ୍ଗପୁର ଜିଲା ନନ୍ଦାହାଣ୍ଡି ବ୍ଲକରେ ଅନେକ ମହାବନ୍ଧ ଖୋଳା ଯାଇଥିଲା। ସାଧାରଣ ଲୋକଙ୍କ ନିତ୍ୟ ବ୍ୟବହାର, ଅଭାବି ବର୍ଷା ସମୟରେ ଚାଷ ଉପଯୋଗୀ କରେଇବା ଏହି ମହାବନ୍ଧର ଉଦ୍ଦେଶ୍ୟ ଥିଲା। ଲକ୍ଷଲକ୍ଷ ଟଙ୍କା ବ୍ୟୟରେ ନିର୍ମିତ ଏହି ମହାବନ୍ଧରୁ କିଛି ଟା ଏବେ ବ୍ୟବହାର ଉପଯୋଗୀ ହୋଇ ପାରୁ ନ ଥିବା ଦେଖିବାକୁ ମିଳୁଛି। ଅଳ୍ପ କିଛି ଟଙ୍କା ବ୍ୟୟରେ ଏସବୁକୁ ପୁନଃରୁଦ୍ଧାର କରାଯାଇ ବ୍ୟବହାର ଉପଯୋଗୀ କରାଯାଇପାରେ। କିନ୍ତୁ ଏହାକୁ ପୋତିବାରେ ଟଙ୍କା ଖର୍ଚ୍ଚ କରାଯାଉଥିବା ନନ୍ଦାହାଣ୍ଡି ବ୍ଲକରେ ଦେଖିବାକୁ ମିଳିଛି।
ବ୍ଲକ ଅଫିସ ପଛପଟେ ଏକ ମହାବନ୍ଧ ଅବହେଳିତ ହୋଇ ପଡିଥିବାବେଳେ ଏହାର ପୁନଃରୁଦ୍ଧାର ପାଇଁ ପୂର୍ବରୁ ବିଭିନ୍ନ ସମୟରେ ବିଡିଓଙ୍କ ସହ ଆଲୋଚନା କରାଯାଇଥିଲା। କିନ୍ତୁ ଆଶ୍ଚର୍ଯ୍ୟର କଥା ତାହାର ପୁନଃରୁଦ୍ଧାର ପରିବର୍ତ୍ତେ ଟ୍ରାକ୍ଟରରେ ପୁରୁଣା ଘର ଭଗ୍ନାବଶେଷ ଏବଂ ମାଟି ନେଇ ତାହାକୁ ପୋତା ଯାଉଛି। ବ୍ଲକ କାର୍ଯ୍ୟାଳୟ ପରିସର ଭିତରେ ଥିବାବେଳେ ଏହା କୌଣସି ବିଭାଗୀୟ ଅଧିକାରୀ, କାର୍ଯ୍ୟରତ କର୍ମଚାରୀ କିମ୍ବା ଲୋକ ପ୍ରତିନିଧିଙ୍କ ନଜରକୁ କିଭଳି ଆସୁନାହିଁ ତାହାକୁ ନେଇ ପ୍ରଶ୍ନ ଉଠିଛି। ବର୍ତମାନ ଅମୃତ ସରୋବର ଖୋଳିବାରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଉଥିବାବେଳେ ଏହିଭଳି ଏକ ପୁରୁଣା ମହାବନ୍ଧର ପୁନଃରୁଦ୍ଧାର କରା ନଯିବା ପଛରେ କାରଣ କଣ ରହିଛି ଓ ଏହାକୁ ପୋତିବା ପାଇଁ କିଏ ଅନୁମତି ଦେଇଛି ତାହା ତଦନ୍ତ ସାପେ। ଏହି ଭଳି ଏକ ମହାବନ୍ଧକୁ ପୋତିବାର ଯୋଜନାକୁ ସାଧାରଣ ଲୋକେ ନାପସନ୍ଦ କରିବା ସହ ପ୍ରଶାସନର ଦୃଷ୍ଟିଗୋଚର କରି ଏହାର ପୁନଃରୁଦ୍ଧାର କରିବାକୁ ଦାବି ହୋଇଛି। ଏ ନେଇ ବିଡିଓ କ୍ଷୀରୋଦ ଚନ୍ଦ୍ର ସାହୁଙ୍କୁ ପଚାରିବାରୁ ଏ ନେଇ ଅବଗତ ନ ଥିଲି। ମହାବନ୍ଧକୁ ନ ପୋତି ଏହାର ପୁନଃରୁଦ୍ଧାର କରିବା ଦିଗରେ ପଦକ୍ଷେପ ନିଆଯିବ ବୋଲି ସେ କହିଛନ୍ତି।