ଭୁବନେଶ୍ୱର,୯। ୮(ବ୍ୟୁରୋ): ମହାନଦୀ ଉପରମୁଣ୍ଡରେ ଛତିଶଗଡ଼ କେତୋଟି ବ୍ୟାରେଜ ନିର୍ମାଣ କରିଛି ସେ ନେଇ ତଥ୍ୟ ଦେବାକୁ ମହାନଦୀ ଜଳ ବିବାଦ ଟ୍ରିବ୍ୟୁନାଲ ଶନିବାର କେନ୍ଦ୍ର ସରକାରଙ୍କୁ ନୋଟିସ କରିଛନ୍ତି। ଜଳ ବିବାଦ ଶୁଣାଣି କରି ଓଡ଼ିଶା ସରକାରଙ୍କ ଆବେଦନ ଉପରେ ଏହି ନୋଟିସ୍ ଦିଆଯାଇଛି। ଏଥିସହିତ ମହାନଦୀ ଜଳ ବିବାଦ ସମ୍ପର୍କିତ ସମସ୍ତ ତଥ୍ୟ କମନ୍ ଫର୍ମାଟ୍ରେ ଦେବାକୁ ଜଷ୍ଟିସ୍ ଏ.ଏମ୍. ଖାନଓ୍ବିଲକରଙ୍କ ଅଧ୍ୟକ୍ଷତାରେ ତଥା ଇନ୍ଦରମିତ କୌର ଏବଂ ରବି ରଞ୍ଜନଙ୍କୁ ନେଇ ଗଠିତ ଖଣ୍ଡପୀଠ ଓଡ଼ିଶା ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। କ୍ରିଷ୍ଣା ଓ କାବେରୀ ନଦୀ ଜଳ ବିବାଦ ଢାଞ୍ଚାରେ ମହାନଦୀ ଜଳ ବିବାଦର ସଂକ୍ଷିପ୍ତ ବିବରଣୀ ପ୍ରସ୍ତୁତ କରାଯିବ ବୋଲି ଖଣ୍ଡପୀଠ କହିଛନ୍ତି। ଏଥିସହିତ ଓଡ଼ିଶା ସରକାର ମହାନଦୀ ଜଳ ବିବାଦ ନେଇ ଆବଶ୍ୟକ କରୁଥିବା ସମସ୍ତ ତଥ୍ୟ ଦେବାକୁ ଖଣ୍ଡପୀଠ କେନ୍ଦ୍ରୀୟ ଜଳ ଆୟୋଗ, ଭାରତୀୟ ପାଣିପାଗ ବିଭାଗ ଏବଂ କେନ୍ଦ୍ରୀୟ ଭୂତଳ ଜଳ ବୋର୍ଡକୁ ନିର୍ଦ୍ଦେଶ ଦେଇଛନ୍ତି। ଏହାର ପରବର୍ତ୍ତୀ ଶୁଣାଣି ଅଗଷ୍ଟ ୨୯ରେ ହେବ।
ଓଡ଼ିଶା ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ ମୋହନ କାଟର୍କି କ୍ରିଷ୍ଣା ଓ କାବେରୀ ନଦୀ ଜଳ ବିବାଦ ଟ୍ରିବ୍ୟୁନାଲ ଭଳି ସମସ୍ତ ତଥ୍ୟ ଥିବା କମନ ଫର୍ମାଟ୍ ଦାଖଲ କରିଛନ୍ତି । ସେହି ଫର୍ମାଟ୍ ଅନୁଯାୟୀ ମହାନଦୀ ଜଳ ବିବାଦ ମାମଲା ପରିଚାଳନା କରାଯିବ। ଓଡ଼ିଶା, ଛତିଶଗଡ଼ ଓ ଅନ୍ୟାନ୍ୟ ରାଜ୍ୟ ଦ୍ୱାରା ବ୍ୟବହାର କରାଯାଉଥିବା ମହାନଦୀ ଜଳର ସମସ୍ତ ତଥ୍ୟକୁ ନେଇ ଏକ କମନ ଫର୍ମାଟ୍ରେ ପ୍ରସ୍ତୁତ କରାଯାଉ, ଯଦ୍ଦ୍ବାରା ଟ୍ରିବ୍ୟୁନାଲ ଶୁଣାଣି ବେଳେ ସେହି ତଥ୍ୟଗୁଡ଼ିକୁ ବ୍ୟବହାର କରିପାରିବେ ବୋଲି କାଟର୍କି ଦର୍ଶାଇଥିଲେ। କିନ୍ତୁ ଛତିଶଗଡ଼ର ପ୍ରତିପକ୍ଷ ଓକିଲ କହିଥିଲେ ଯେ, କେନ୍ଦ୍ରୀୟ ଜଳ ଆୟୋଗଙ୍କ ଦ୍ୱାରା କମନ ଫର୍ମାଟ୍ ପ୍ରସ୍ତୁତ କରାଯାଇପାରିବ।
ମହାନଦୀ ଉପରମୁଣ୍ଡରେ ଛତିଶଗଡ଼ ବହୁ ସଂଖ୍ୟାରେ ବ୍ୟାରେଜ ନିର୍ମାଣ କରିବା ଦ୍ୱାରା ନଭେମ୍ବରରୁ ମେ ପର୍ଯ୍ୟନ୍ତ ଅର୍ଥାତ୍ ଅଣମୌସୁମୀ ସମୟରେ ଜଳପ୍ରବାହ ହ୍ରାସପାଇଛି। ଛତିଶଗଡ଼ ନିର୍ମାଣ କରୁଥିବା ବ୍ୟାରେଜଗୁଡ଼ିକ ଉପରେ ରୋକ ଲଗାଇବାକୁ ଓଡ଼ିଶା ସରକାରଙ୍କ ପକ୍ଷରୁ ଆବେଦନ କରାଯାଇଛି। ଟ୍ରିବ୍ୟୁନାଲ ଜୁଲାଇ ୧୧ରେ ଭିଡିଓ କନଫରେନ୍ସ ମାଧ୍ୟମରେ ମାମଲାର ଶୁଣାଣି ପାଇଁ ୩୬ ଇସ୍ୟୁ ପ୍ରସ୍ତୁତ କରିଥିଲେ। ସେଥିରୁ ଓଡ଼ିଶା ପକ୍ଷରୁ ୨୩ଟି ଦାଖଲ କରାଯାଇଥିବାବେଳେ ଛତିଶଗଡ ପକ୍ଷରୁ ୧୩ଟି ଦାଖଲ କରାଯାଇଥିଲା। ଶନିବାର ଶୁଣାଣି ପୂର୍ବରୁ ଓଡ଼ିଶା ପକ୍ଷରୁ ସମସ୍ତ ପ୍ରମାଣ ଟ୍ରିବ୍ୟୁନାଲଙ୍କ ନିକଟରେ ଦାଖଲ କରାଯାଇଛି। ଛତିଶଗଡ଼ ଓ ଅନ୍ୟ ରାଜ୍ୟଗୁଡ଼ିକ ତଥ୍ୟ ପ୍ରମାଣ ଦାଖଲ କରିନାହାନ୍ତି। ଛତିଶଗଡ଼ର ୬ ବ୍ୟାରେଜ୍ ଓ ୫୧୬ ଆନିକଟ୍ ଯୋଗୁ ଅଣମୌସୁମୀ ସମୟରେ ଓଡ଼ିଶା ଦେଇ ପ୍ରବାହିତ ହେଉଥିବା ଜଳର ପରିମାଣ ହ୍ରାସ ଘଟିଛି କି ନାହିଁ ଟି୍ରିବ୍ୟୁନାଲ ତାହା ଅନୁଧ୍ୟାନ କରିବେ।