ଭୁବନେଶ୍ୱର,୨୭। ୭(ବ୍ୟୁରୋ): ସ୍ବିଡେନ୍ ସରକାରଙ୍କ କଳା ବିଭାଗର ପରାମର୍ଶଦାତା ତଥା ଆର୍ଟ ଆଡ୍ଭାଇଜର ଭାବେ ନିଯୁକ୍ତ ହୋଇଛନ୍ତି ଓଡ଼ିଆ ଚିତ୍ରଶିଳ୍ପୀ ପି.କେ. ମହାନନ୍ଦିଆ। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାଇକ୍ରୋ ବ୍ଲଗିଂ ସାଇଟ୍ ଟୁଇଟରରେ ମହାନନ୍ଦିଆଙ୍କୁ ଶୁଭେଚ୍ଛା ଜଣାଇବା ସହ ଅଭିନନ୍ଦନ ଜ୍ଞାପନ କରିଛନ୍ତି। ମହାନନ୍ଦିଆଙ୍କ ସଫଳତା ସମଗ୍ର ରାଜ୍ୟ ପାଇଁ ଗୌରବ ଆଣିଛି। ଆଗାମୀ ଦିନରେ ସେ ଆହୁରି ଖ୍ୟାତି ଅର୍ଜନ କରନ୍ତୁ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଅନୁଗୋଳ ଜିଲାର ଏକ ଗରିବ ପରିବାରରେ ଜନ୍ମଗ୍ରହଣ କରିଥିବା ମହାନନ୍ଦିଆଙ୍କର ପିଲାବେଳୁ କଳା ପ୍ରତି ଅହେତୁକ ଆକର୍ଷଣ ରହିଥିଲା। ଚିତ୍ରକଳାକୁ ନେଇ ନିଜ ଭବିଷ୍ୟତ କରିବେ ଭାବି ସେ ୧୯୭୧ରେ ନୂଆଦିଲ୍ଲୀର ଏକ କଳା ଶିକ୍ଷାନୁଷ୍ଠାନରେ ନାମ ଲେଖାଇଥିଲେ। ତେବେ ଦିଲ୍ଲୀରେ ସ୍ବିଡେନ୍ର ଚାର୍ଲୋଟ ନାମକ ଜଣେ ଯୁବତୀଙ୍କ ପ୍ରେମରେ ପଡ଼ି ତାଙ୍କୁ ବିବାହ କରିବା ପରେ ମହାନନ୍ଦିଆ ଚର୍ଚ୍ଚାକୁ ଆସିଥିଲେ। କେବଳ ଏତିକି ନୁହେଁ, ଚାର୍ଲୋଟ ନିଜ ଦେଶକୁ ଫେରିଯିବା ପରେ ମହାନନ୍ଦିଆ ତାଙ୍କୁ ଦେଖା କରିବାକୁ ସ୍ବିଡେନ୍ ଯିବାକୁ ବାହାରିଥିଲେ। ପାଖରେ ଅର୍ଥ ନ ଥିବାରୁ ନିଜର ସବୁକିଛି ବିକ୍ରି କରି ଏକ ପୁରୁଣା ସାଇକେଲ୍ କିଣିଥିଲେ। ଆଉ ସେହି ସାଇକେଲରେ ଭାରତରୁ ସ୍ବିଡେନ୍ ଅଭିମୁଖେ ବାହାରିଥିଲେ। ଏଥିପାଇଁ ତାଙ୍କୁ ୫ମାସ ସମୟ ଲାଗିଥିଲା। ଶେଷରେ ନିଜ ସ୍ତ୍ରୀ ଚାର୍ଲୋଟଙ୍କୁ ଭେଟିବା ସହ ସେଠାକାର ନାଗରିକତ୍ୱ ଗ୍ରହଣ କରିଥିଲେ।
