ନିଶ୍ଚିନ୍ତକୋଇଲି,୧୬ା୫(ସ୍ବ.ପ୍ର.): କଟକ ଜିଲା ମାହାଙ୍ଗା ଥାନା ଅଧିକାରୀ ନୀହାର ରଞ୍ଜନ ମହାନ୍ତିଙ୍କୁ ରବିବାର ଗ୍ରାମାଞ୍ଚଳ ଏସ୍ପିଙ୍କ କାର୍ଯ୍ୟାଳୟକୁ ବଦଳି କରିଦିଆଯାଇଛି। ସେ ଦୀର୍ଘଦିନ ହେବ ନେମାଳ ଓ ପରେ ମାହାଙ୍ଗା ଥାନା ଅଧିକାରୀଭାବେ କାର୍ଯ୍ୟ କରି ଆସୁଥିଲେ। ତାଙ୍କ ସ୍ତ୍ରୀ ତଥା ରାୟଗଡା ଅବକାରୀ ଅଧୀକ୍ଷକ ନୀନା ବେଉରା ଶନିବାର ମଦ ବ୍ୟବସାୟୀଙ୍କଠାରୁ ୬ ଲକ୍ଷ ୨୯ ହଜାର ଟଙ୍କା ନେଇ ଭୁବନେଶ୍ୱର ଫେରୁଥିବାବେଳେ ଭିଜିଲାନ୍ସ ହାତରେ ଧରାପଡ଼ିଥିଲେ। ଏହାପରେ ଭିଜିଲାନ୍ସ ଟିମ୍ ମାହାଙ୍ଗାରେ ପହଞ୍ଚତ୍ ନୀହାରଙ୍କ କ୍ୱାର୍ଟସକୁ ଚଢ଼ାଉ କରିବାକୁ ଯାଇଥିଲା। ମାତ୍ର ନୀହାର ତାଲା ପକାଇ ପଳାଇଯାଇଥିଲେ। ଶେଷରେ ଭିଜିଲାନ୍ସ ଟିମ୍ ତାଙ୍କ ସରକାରୀ ବାସଭବନକୁ ସିଲ୍ କରିଦେଇଥିଲା। ପରେ ଅତିରିକ୍ତ ଏସ୍ପିଙ୍କ ନିର୍ଦ୍ଦେଶକ୍ରମେ ମହାନ୍ତି ଭିଜିଲାନ୍ସ କାର୍ଯ୍ୟାଳୟରେ ପହଞ୍ଚତ୍ ଥିଲେ। ସେଠାରେ ସ୍ବାମୀ ସ୍ତ୍ରୀଙ୍କୁ ମୁହାଁମୁହିଁ ଜେରା କରାଯାଇଛି।
ଅପରପକ୍ଷେ ନୀହାରଙ୍କ କାର୍ଯ୍ୟକୁ ନେଇ ଗତ ୨ ବର୍ଷ ହେବ ପ୍ରଶ୍ନ ଉଠିଥିଲା। କେତେବେଳେ ଖବରଦାତାଙ୍କୁ ମିଥ୍ୟା ମାମଲାର ଭୟ ଦେଖାଇବା ଓ କେତେବେଳେ କୋର୍ଟ ଆଦେଶକୁ ବେଖାତିର କରିବା ଭଳି ଘଟଣାକୁ ନେଇ ସେ ଚର୍ଚ୍ଚାର ପରିସରକୁ ଆସିଥିଲେ। ବିଶେଷ କରି ମାହାଙ୍ଗା ଡବଲମର୍ଡର ଘଟଣାରେ ଜେଏମ୍ଏଫ୍ସି କୋର୍ଟର ବାରମ୍ବାର ତାଗିଦ୍ ସତ୍ତ୍ୱେ ଅଭିଯୁକ୍ତଙ୍କ କଲ୍ ଡିଟେଲ ରେକର୍ଡ ଦାଖଲ ନ କରି ସେ ବିବାଦକୁ ଆସିଥିଲେ। ତେବେ ଥାନା ଅଧିକାରୀଙ୍କ କେବଳ ବଦଳି ନା ଅଧିକ କାର୍ଯ୍ୟାନୁଷ୍ଠାନ ହେବ ସେନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ନୀହାରଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ।