ମୁମ୍ବାଇ,୧୯।୩ : ମହାରାଷ୍ଟ୍ରରେ ଭାରତୀୟ ଜନତା ପାର୍ଟି (ଭାଜପା) ଏବଂ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ନେତୃତ୍ୱାଧୀନ ଶିବସେନା ସହିତ ନ୍ୟାଶନାଲ ଡେମୋକ୍ରାଟିକ ଆଲାଏନ୍ସ (ଏନଡିଏ)ର ଅନ୍ୟ ସହଯୋଗୀ ଦଳ ରାଜ୍ୟର ସମସ୍ତ ୨୮୮ ବିଧାନସଭା ଏବଂ ୪୮ ଲୋକସଭା ଆସନରେ ପ୍ରତିଦ୍ୱନ୍ଦ୍ୱିତା କରିବେ। ନାଗପୁରରେ ଏହି ସୂଚନା ଭାଜପା ରାଜ୍ୟ ଅଧ୍ୟକ୍ଷ ଚନ୍ଦ୍ରଶେଖର ବାୱାନକୁଲେ ପ୍ରଦାନ କରିଛନ୍ତି। ତେବେ ଆସନ ବଣ୍ଟନ ନେଇ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ନିଷ୍ପତ୍ତି ନିଆଯାଇ ନାହିଁ।
ଆଗାମୀ ନିର୍ବାଚନ ପାଇଁ ସିଟ ବାଣ୍ଟିବାରେ ଶିନ୍ଦେଙ୍କ ନେତୃତ୍ୱାଧୀନ ଶିବସେନା ପ୍ରତି ଅନ୍ୟାୟ କରାଯାଉଥିବା ଖବର ମଧ୍ୟରେ ବାୱାନକୁଲେଙ୍କ ମନ୍ତବ୍ୟ ଆସିଛି। ବାୱାନକୁଲେ କହିଛନ୍ତି, ଭାଜପା ଏବଂ ଶିବସେନା ଅନ୍ୟ ଏନଡିଏ ସହଯୋଗୀଙ୍କ ସହ ମିଳିତ ଭାବରେ ଲୋକସଭା ଏବଂ ବିଧାନସଭା ଆସନରେ ପ୍ରତିଦ୍ୱନ୍ଦ୍ୱିତା କରିବେ। ଅକ୍ଟୋବର ୨୦୨୪ ରେ ମହାରାଷ୍ଟ୍ରରେ ବିଧାନସଭା ନିର୍ବାଚନ ହେବ।
ସେ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ମୁଖ୍ୟମନ୍ତ୍ରୀ ଶିନ୍ଦେ ତଥା ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ୨୦୦ ଆସନ ଜିତିବା ପାଇଁ ଭାଜପା ଓ ଶିବସେନା ପ୍ରସ୍ତୁତି ଆରମ୍ଭ କରିଛନ୍ତି। ଏପରିସ୍ଥଳେ, ଏନସିପିର ମହାରାଷ୍ଟ୍ର ୟୁନିଟ ଅଧ୍ୟକ୍ଷ ଜୟନ୍ତ ପାଟିଲ କହିଛନ୍ତି ଯେ ୨୦୨୪ ବିଧାନସଭା ନିର୍ବାଚନ ଭାଜପା ବନାମ ମହା ବିକାଶ ଆଘାଡି ହେବ। ଏହା ଶିନ୍ଦେ ନେତୃତ୍ୱାଧୀନ ଶିବସେନାର ଅସ୍ତିତ୍ୱ ଉପରେ ପ୍ରଶ୍ନ ସୃଷ୍ଟି କରିବ।