ପୁଣେ,୧୮।୧୨: ଛତ୍ରପତି ସମ୍ଭାଜିନଗର କନ୍ନଡ ନିର୍ବାଚନମଣ୍ଡଳୀରୁ ଏକନାଥ ସିନ୍ଦେଙ୍କ ଦଳର ଶିବସେନା ପ୍ରାର୍ଥୀ ସଞ୍ଜନା ଯାଦବ ତାଙ୍କର ଏକ ନିର୍ବାଚନ ରାଲିରେ କାନ୍ଦୁଥିବା ଦେଖିବାକୁ ମିଳିଥିଲା। ତାଙ୍କ ସ୍ବାମୀ ହର୍ଷବର୍ଦ୍ଧନ ଯାଦବ ଜଣେ ସ୍ବାଧୀନ ପ୍ରାର୍ଥୀ ଭାବରେ ତାଙ୍କ ବିରୋଧରେ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଉଭୟ ସ୍ବାମୀ ଏବଂ ସ୍ତ୍ରୀ ଦୀର୍ଘ ଦିନ ହେବ ଅଲଗା ରହୁଛନ୍ତି। ତେବେ ଦୁହେଁ ଛାଡପତ୍ର ହୋଇନାହାଁନ୍ତି।
ଏହି ସଭାରେ ଯୋଗ ଦେଇ ସଞ୍ଜନା ଯାଦବ କହିଛନ୍ତି, ହର୍ଷବର୍ଦ୍ଧନଙ୍କୁ ବିବାହ କରିବା ପରେ ସେ ବହୁତ କଷ୍ଟ ପାଇଛନ୍ତି। ରାଓସାହେବ ଦାନଭେ ଚୁପ ରହିଛନ୍ତି। କାରଣ ସେ ଗୋଟିଏ ଝିଅର ପିତା ଅଟନ୍ତି। ବିବାହର ଏକ ମାସ ପରେ ମୁଁ ଘରକୁ ଆସିଥିଲି। ପିତା କହିଥିଲେ ଯେ ପିଲା ଜନ୍ମ ହେବା ପରେ ସେ (ହର୍ଷବର୍ଦ୍ଧନ) ବଦଳିଯିବେ। କିନ୍ତୁ ତାହା ହୋଇ ନ ଥିଲା। ବାପା କହୁଥିଲେ ଜଣେ ବ୍ୟକ୍ତି ଚାଳିଶ ବର୍ଷ ବୟସରେ ଭଲ ହୋଇଯାଏ। ଚାଳିଶ ବର୍ଷ ବୟସ ପରେ ମଧ୍ୟ ସେ ସୁଧୁରିଲେ ନାହିଁ।
ସଞ୍ଜନା ତାଙ୍କ କାହାଣୀ ବର୍ଣ୍ଣନା କରିବାବେଳେ ଭୋ ଭୋ ହୋଇ କାନ୍ଦିଥିଲେ। ସେ କହିଛନ୍ତି, ମୁଁ ଯାହା ସହିଛି ସେଥିପାଇଁ ମୁଁ କୌଣସି ପୁରସ୍କାର ପାଇ ନାହିଁ, କିନ୍ତୁ ତୁମେ ଜାଣ ଯେ ମୋର ସ୍ଥାନ କିଏ ନେଇଛି। ମୋ ବାପାଙ୍କ ବିରୋଧରେ ସମସ୍ତ ପ୍ରକାରର ଅଭିଯୋଗ କରାଯାଇଥିଲା, କିନ୍ତୁ ଆମେ ଏହାକୁ ସହ୍ୟ କରିଥିଲୁ କାରଣ ଗୋଟିଏ ଝିଅର ପିତା ଏହାକୁ ବହନ କରିବାକୁ ପଡିବ। ତାଙ୍କ ଭାଷଣର ଭିଡିଓ ସୋସିଆଲ ମିଡିଆରେ ଅଧିକ ଭାଇରାଲ ହେବାରେ ଲାଗିଛି।
କିଛି ଦିନ ପୂର୍ବରୁ ସଞ୍ଜନା ଯାଦବଙ୍କ ପିତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ରାଓ ସାହେବ ଦାନଭେ ପାଟିଲଙ୍କ ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଥିଲା। ଏହି ଭିଡିଓରେ ସେ ଜଣେ ଶ୍ରମିକଙ୍କୁ ପିଟୁଥିବାର ନଜର ଆସିଥିଲେ।