ମୁମ୍ବାଇ,୧୯।୪: ମହାରାଷ୍ଟ୍ରର ନଭି ମୁମ୍ବାଇରେ ଆୟୋଜିତ ମହାରାଷ୍ଟ୍ର ଭୂଷଣ ପୁରସ୍କାର କାର୍ଯ୍ୟକ୍ରମରେ ଲୁ ଯୋଗୁ ଏବେ ପର୍ଯ୍ୟନ୍ତ ୧୪ ଜଣଙ୍କ ମୃତ୍ୟୁ ହେଲାଣି। ୭ ଜଣ ଏବେବି ହସ୍ପିଟାଲରେ ଭର୍ତ୍ତି ଅଛନ୍ତି। ଏହି ମାମଲାକୁ ନେଇ ଏବେ ମହାରାଷ୍ଟ୍ର ସରକାର ଆକ୍ସନକୁ ଆସି ଯାଇଛନ୍ତି। ମହାରାଷ୍ଟ୍ର ସରକାର ବୁଧବାର(୧୯ ଏପ୍ରିଲ)ରେ ଖୋଲାରେ ରାଲିକୁ ନେଇ ଗାଇଡଲାଇନ ଜାରି କରିଛନ୍ତି।
ଗାଇଡ ଲାଇନ ଅନୁଯାୟୀ, ସମ୍ପୂର୍ଣ୍ଣ ମହାରାଷ୍ଟ୍ରରେ ଦିନ ୧୨ଟାରୁ ସନ୍ଧ୍ୟା ୫ଟା ମଧ୍ୟରେ ଖୋଲା ସ୍ଥାନରେ କୌଣସି ସମାରୋହ/କାର୍ଯ୍ୟକ୍ରମ ସେପର୍ଯ୍ୟନ୍ତ ଆୟୋଜନ ହୋଇ ପାରିବ ନାହିଁ ଯେପର୍ଯ୍ୟନ୍ତ ରାଜ୍ୟରେ ହିଟ ଓ୍ବେଭ କମ ନ ହୋଇଛି। ମହାରାଷ୍ଟ୍ର ସରକାର ଏହାକୁ ନେଇ ଏକ ଜିଆର(ସରକାରୀ ସଂକଳ୍ପ) ଜାରି କରିବେ। କ୍ୟାବିନେଟ ମନ୍ତ୍ରୀ ମଙ୍ଗଳ ପ୍ରଭାତ ଲୋଢା ଏହି ସୂଚନା ଦେଇଛନ୍ତି।
ଏହାକୁ ନେଇ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ଏକ ପତ୍ର ଲେଖି ଅଜିତ ପାଓ୍ବାର କହିଛନ୍ତି, ଏହା ପ୍ରାକୃତିକ ନୁହେଁ ଏଥିପାଇଁ ରାଜ୍ୟ ସରକାର ଦାୟୀ। ଏହି ଘଟଣାର ଜଣେ ଅବସରପ୍ରାପ୍ତ ବିଚାରପତି ଯାଞ୍ଚ କରିବା ଜରୁରୀ। ମୃତକଙ୍କ ପରିଜନକୁ ୫ ଲକ୍ଷ ପରିବର୍ତ୍ତେ ୨୦-୨୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ପାଓ୍ବାର ଦାବି କରିଛନ୍ତି।
