ପୁଣେ,୨୮।୬: ମହାରାଷ୍ଟ୍ରର ସାଙ୍ଗଲି ଜିଲାରେ ଗୋଟିଏ ପରିବାରର ୯ ଜଣ ସଦସ୍ୟଙ୍କ ମୃତ୍ୟୁ ଘଟଣାର ତଦନ୍ତରୁ ଚାଞ୍ଚଲ୍ୟକର ଖୁଲାସା ହୋଇଛି। ପରିବାର ଲୋକ ଆତ୍ମହତ୍ୟା କରି ନ ଥିଲେ, ବରଂ ତାନ୍ତ୍ରିକ ଅବ୍ବାସ ମହମ୍ମଦ ଅଲି ଏହି ଘଟଣାର ଘଟାଇଥିଲେ। ପୋଲିସର ସୂଚନାନୁସାରେ, ତାନ୍ତ୍ରିକ ପରିବାର ସଦସ୍ୟଙ୍କୁ ଚା’ରେ ବିଷ ମିଶାଇ ପିଆଇଥିଲେ। ଫଳରେ ପରିବାର ସଦସ୍ୟ ଜଣଙ୍କ ପରେ ଜଣେ ମୃତ୍ୟୁବରଣ କରିଥିଲେ। ପୂର୍ବରୁ ଏହାକୁ ଋଣ ଭାର ଯୋଗୁ ଆତ୍ମହତ୍ୟା କୁହାଯାଉଥିଲା। ଏବେ ଏହି ଘଟଣା ଆତ୍ମହତ୍ୟା ପରିବର୍ତ୍ତେ ଏକ ହତ୍ୟାକାଣ୍ଡରେ ପରିଣତ ହୋଇଛି। ପୋଲିସ ତାନ୍ତ୍ରିକ ଅବ୍ବାସ ଏବଂ ତାଙ୍କ ଡ୍ରାଇଭରକୁ ଗିରଫ କରିଛି। ଏହି ହତ୍ୟାକାଣ୍ଡର ଖୁଲାସା ବେଳେ କୋଲହାପୁର ରେଞ୍ଜ ଆଇଜି ମନୋଜ କୁମାର ଲୋହିଆ ଏହି ସୂଚନା ଦେଇଛନ୍ତି।
ପୋଲିସର ସୂଚନାନୁସାରେ, ଅବ୍ବାସ ଏବଂ ତାଙ୍କ ସହଯୋଗୀ ଡ୍ରାଇଭର ଜୁନ ୨୦ରେ ମଇସାଲ ଗାଁରେ ଥିବା ଦୁଇ ଭାଇଙ୍କ ପରିବାରକୁ ଧ୍ୱଂସ କରିବାର ଏହି ଜଘନ୍ୟ କାଣ୍ଡ କରିଥିଲେ। ପୂର୍ବରୁ ଗୁପ୍ତଧନ ଖୋଜିବା ବାହାନାରେ ତାନ୍ତ୍ରିକ ସମ୍ପୃକ୍ତ ପରିବାରଠାରୁ ପ୍ରାୟ ୧ କୋଟି ଟଙ୍କା ଠକି ନେଇଥିଲେ। ଦୁଇ ଭାଇଙ୍କ ଘରେ ନଅ ଜଣଙ୍କ ମୃତଦେହ ମିଳିବା ପରେ ସାରା ଦେଶରେ ଚହଳ ସୃଷ୍ଟି ହୋଇଥିଲା। ମୃତକଙ୍କ ମଧ୍ୟରେ ଜଣେ ଶିକ୍ଷକ ଏବଂ ଅନ୍ୟଟି ପ୍ରାଣୀ ଚିକିତ୍ସକ ଥିଲେ।