ମୁମ୍ବାଇ,୨୨।୧ : ଗୋଟିଏ ପଟେ ଯେତେବେଳେ କଂଗ୍ରେସ କିମ୍ବା ବିରୋଧୀ ଶାସିତ ରାଜ୍ୟଗୁଡ଼ିକରେ ପୁରୁଣା ପେନସନ ଯୋଜନା ପୁନଃସ୍ଥାପିତ ହେଉଛି, ସେତେବେଳେ ଭାଜପା ଶାସିତ ରାଜ୍ୟଗୁଡ଼ିକ ଉପରେ ମଧ୍ୟ ଏହାର ଚାପ ବୃଦ୍ଧି ପାଉଛି। ଏବେ ସୂଚନା ମିଳିଛି ଯେ ଭାଜପା ଶାସିତ ମହାରାଷ୍ଟ୍ର ସରକାର ମଧ୍ୟ ଏହି ଦିଗରେ ସକାରାତ୍ମକ ଆଭିମୁଖ୍ୟ ଗ୍ରହଣ କରିବାକୁ ଯାଉଛନ୍ତି। ଶିକ୍ଷକ ଓ ସରକାରୀ କର୍ମଚାରୀଙ୍କ ପାଇଁ ପୁରୁଣା ପେନସନ ଯୋଜନା ପୁଣି ଲାଗୁ ଉପରେ ବିଚାର କରାଯାଉଛି ବୋଲି ମୁଖ୍ୟମନ୍ତ୍ରୀ ଏକନାଥ ଶିନ୍ଦେ କହିଛନ୍ତି।
ଆସନ୍ତା ନିର୍ବାଚନକୁ ନେଇ ଏକ ରାଲିକୁ ସମ୍ବୋଧିତ କରି ଶିନ୍ଦେ କହିଛନ୍ତି ଯେ ରାଜ୍ୟର ଶିକ୍ଷା ବିଭାଗ ପୁରୁଣା ପେନସନ ଯୋଜନା ଉପରେ ଅଧ୍ୟୟନ କରୁଛି। ଶିକ୍ଷକ, ସରକାରୀ କର୍ମଚାରୀ ଏବଂ ଅଣସଂରକ୍ଷିତ ବିଦ୍ୟାଳୟଗୁଡ଼ିକ ପାଇଁ ପୁରାତନ ପେନସନ ଯୋଜନା ବ୍ୟତୀତ ଇଂରାଜୀ ମଧ୍ୟମ ବିଦ୍ୟାଳୟରେ ୨୫ ପ୍ରତିଶତ ସଂରକ୍ଷଣ ପାଇଁ ସରକାର ସକାରାତ୍ମକ ଅଭିମୁଖ୍ୟ ଗ୍ରହଣ କରିଛନ୍ତି ବୋଲି ସେ କହିଛନ୍ତି।
ଡାଭୋସ ଶିଖର ସମ୍ମିଳନୀରେ ପୁଞ୍ଜି ବିନିଯୋଗ ପ୍ରସ୍ତାବ ଉପରେ ଦସ୍ତଖତ ସମ୍ପର୍କରେ ମୁଖ୍ୟମନ୍ତ୍ରୀ ଶିନ୍ଦେ କହିଛନ୍ତି ଯେ ବିରୋଧୀଦଳଙ୍କ ଅଭିଯୋଗକୁ ନେଇ ସରକାର ଏହାର କାର୍ଯ୍ୟ ସହ ଜବାବ ଦେବେ। କିଛି ବିଦେଶୀ କମ୍ପାନୀ ପ୍ରତ୍ୟକ୍ଷ ନିବେଶ କରିବା ପରିବର୍ତ୍ତେ ମିଳିତ ଉଦ୍ୟୋଗକୁ ଯିବାକୁ ପସନ୍ଦ କରନ୍ତି।