ଆରଡି,୧୮।୨( ଡି.ଏନ୍.ଏ.): ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡି ମହାଶିବରାତ୍ରି ପାଇଁ ଉତ୍ସବମୁଖର ହୋଇଉଠିଛି । ଭୋର ୪ଟାରୁ ବାବାଙ୍କୁ ଦର୍ଶନ ପାଇଁ ଭକ୍ତଙ୍କ ଭିଡ ପରିଲକ୍ଷିତ ହୋଇଛି । ହରିବୋଲ, ହୁଳହୁଳି, ଓଁନମୋ ଶିବାୟ ଧ୍ବନିରେ ମନ୍ଦିର ପରିସର ପ୍ରକମ୍ପିତ ହୋଇଉଠିଛି । ଶ୍ରଦ୍ଧାଳୁମାନେ ଲମ୍ବା ଲାଇନରେ ଆସି ବାବା ଆଖଣ୍ଡଳମଣିଙ୍କୁ ଦର୍ଶନ କରୁଛନ୍ତି ।
ସକାଳରୁ ରାତ୍ରି ୧୧.୩୦ ପର୍ଯ୍ୟନ୍ତ ପ୍ରଭୁ ଦିଗମ୍ବର ବେଶରେ ଦର୍ଶନ ଦେବେ। ଏନେଇ ପ୍ରଭୁଙ୍କ ପ୍ରିୟ ଘର୍ଷଣ ଭୋଗ ଲାଗି କରାଯିବ । କରୋନା ମହାମାରୀ ପାଇଁ ୨ ବର୍ଷ ହେଲା ଭକ୍ତମାନେ ପୀଠକୁ ଆସି ନ ଥିଲେ । ଚଳିତ ବର୍ଷ ପୀଠରେ ପ୍ରାୟ ୨ ଲକ୍ଷ ଭକ୍ତ ସମାଗମ ହେବାର ସମ୍ଭାବନା ଥିବାରୁ ଜିଲା ପ୍ରଶାସନ ଓ ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ରାତି ୧.୩୦ରେ ପ୍ରଭୁଙ୍କର ଦୁର୍ଲଭ ସୁନାବେଶ ଓ ଭୋର ୫ଟାରେ ମହାଦୀପ ଉଠିବ ବୋଲି ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।