ଆରଡ଼ି,୧୭।୨(ଡି.ଏନ.ଏ.): ଭଦ୍ରକ ଜିଲା ଆରଡ଼ି ଆଖଣ୍ଡଳମଣି ପୀଠ ଦୁଇବର୍ଷ ପରେ ପୁଣି ମହାଶିବରାତ୍ରିରେ ଉତ୍ସବମୁଖର ହେବ। ଏନେଇ ଜିଲା ଓ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ମନ୍ଦିର ପ୍ରଶାସନ ଓ ସେବାୟତଙ୍କ ଦ୍ୱାରା ଶିବରାତ୍ରି ନୀତିକାନ୍ତି ପ୍ରସ୍ତୁତ ହୋଇସାରିଛି। ଶୁକ୍ରବାରଠାରୁ ପୀଠରେ ସ୍ବେଚ୍ଛାସେବୀ ସଙ୍ଗଠନ ପକ୍ଷରୁ ସଫେଇ ସହ ବ୍ଲିଚିଂ ପାଉଡର ପକାଇ ପରିଷ୍କାର କରାଯାଇଛି। ଏଥର ୨ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହେବାର ସମ୍ଭାବନା ରହିଛି। ଶୁକ୍ରବାର ଏସ୍ପି ବରୁଣ ଗୁଣ୍ଟୁପାଲି ଓ ଉପଜିଲାପାଳ ମନୋଜ ପାତ୍ର ପୀଠକୁ ଆସି ଶିବରାତ୍ରି ପ୍ରସ୍ତୁତି ସମ୍ପର୍କରେ ସେବାୟତମାନଙ୍କ ସହ ଆଲୋଚନା କରିଛନ୍ତି। ଏଥିସହ ବହୁସଂଖ୍ୟକ ପୋଲିସ ପୀଠରେ ପହଞ୍ଚତ୍ ସାରିଛନ୍ତି।
ଶନିବାର ଭୋର ୪ଟାରେ ମନ୍ଦିର ପହଡ଼ ଖୋଲାଯିବା ସହ ମଙ୍ଗଳ ଆଳତି କରାଯିବ ଓ କନିକା ରାଜାଙ୍କ ଦ୍ୱାରା ପହିଲି ଘର୍ଷଣ ଭୋଗ ଲାଗି କରାଯିବ। ୫ଟା ୧୫ରେ ପାଳି ସେବାୟତଙ୍କ ଦ୍ୱାରା ପହିଲି ଖେଚୁଡି ଭୋଗ ପ୍ରଭୁଙ୍କୁ ସମର୍ପଣ କରାଯିବ। ପ୍ରାତଃ ୫ଟା ୪୫ରୁ ରାତ୍ର ୧୧ଟା ୩୦ ପର୍ଯ୍ୟନ୍ତ ସର୍ବସାଧାରଣରେ ଦିଅଁ ଦର୍ଶନ ସହ ଭୋଗ ଲାଗି ହେବ। ରାତି ୧୨ଟା ୩୦ରୁ ୧ଟା ୩୦ ମଧ୍ୟରେ ସୁନାବେଶ ସମ୍ପୂର୍ଣ୍ଣ ଓ ମହାଦୀପ ପ୍ରସ୍ତୁତି କରାଯିବ। ୧ଟା ୩୦ରୁ ୩ଟା ୩୦ ଓ ୫ଟା ୧୫ରୁ ସକାଳ ୬ଟା ୩୦ ପର୍ଯ୍ୟନ୍ତ ସର୍ବସାଧାରଣରେ ସୁନାବେଶ ଦର୍ଶନ, ୪ଟା ୩୦ରୁ ୫ଟା ମଧ୍ୟରେ ମହାଦୀପ ମନ୍ଦିର ଚୂଡ଼ାକୁ ଉଠିବ ବୋଲି ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ଶ୍ରଦ୍ଧାଳୁମାନେ କିପରି ସୁଚାରୁ ରୂପେ ବାବା ଆଖଣ୍ଡଳମଣିଙ୍କୁ ଦର୍ଶନ କରିବେ, ସେଥିଲାଗି ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ଏସ୍ପି ଓ ଅତିରିକ୍ତ ଏସ୍ପି ପୀଠରେ ଉପସ୍ଥିତ ରହିବେ। ୬ ଡିଏସ୍ପିଙ୍କ ସହ ୭ ଇନ୍ସପେକ୍ଟର ଓ ୨୦ ପ୍ଲାଟୁନ ପୋଲିସ ଫୋର୍ସ ପୀଠରେ ମୁତୟନ ରହିବେ ବୋଲି ଆରଡ଼ି ଫାଣ୍ଡି ଅଧିକାରୀ ସୁରେନ୍ଦ୍ର ମଲ୍ଲ କହିଛନ୍ତି।