ସାକ୍ଷୀଗୋପାଳ,୨୩ା୧୨(ଡି.ଏନ୍.ଏ.): ଶ୍ରଦ୍ଧା ଭକ୍ତିରେ ବଦାନ୍ୟ ଲୋକେ ଠାକୁରଙ୍କୁ ସୁନାରୁପା ଗହଣା ଓ ଟଙ୍କା ଦାନ କରୁଛନ୍ତି। ସେପଟେ ଲୁଟେରାମାନେ ଠାକୁରଙ୍କୁ ଲୁଟିବାକୁ ପଛାଉନାହାନ୍ତି। ପୁରୀ- ଶରଣକୁଳ ନୂଆ ଜଗନ୍ନାଥ ସଡ଼କ ପାର୍ଶ୍ୱରେ ସତ୍ୟବାଦୀ ଥାନା ଆଳିଶ ପଞ୍ଚାୟତରେ ଥିବା ମହାବୀର ମନ୍ଦିରରେ ବୁଧବାର ରାତିରେ ଚୋରି ହୋଇଛି। ମହାବୀରଙ୍କ ଆଖିରେ ଲାଗିଥିବା ସୁନାର ଆଖି ଦୁର୍ବୃତ୍ତମାନେ ତାଡ଼ି ନେଇଛନ୍ତି। ଠାକୁରଙ୍କର ୫ କେଜି ଓଜନର ରୁପା କୀରଟି, ଗଦା, କଙ୍କଣ ଲୁଟି ନେଇଥିବା ବେଳେ ହୁଣ୍ଡି ଭାଙ୍ଗି ୩ ଲକ୍ଷରୁ ଅଧିକ ଦାନ ଅର୍ଥରାଶି ନେଇଯାଇଛନ୍ତି। ମନ୍ଦିର ତାଲାଭାଙ୍ଗି ଭିତରକୁ ପଶି ଦୁର୍ବୃତ୍ତମାନେ ଚୋରି କରିଥିବା ସକାଳୁ ପୂଜକ ଆସିବା ପରେ ଦେଖିଲେ। ଅଭିଯୋଗ କ୍ରମେ ସତ୍ୟବାଦୀ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଠାକୁରଙ୍କ ମନ୍ଦିରରୁ ଏଭଳି ଲୁଟ୍କୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି। ଠାକୁରଙ୍କ ମନ୍ଦିରରୁ ପୂର୍ବରୁ ଚୋରି ହୋଇଥିଲେ ମଧ୍ୟ ଠାକୁରଙ୍କ ଆଖି ତାଡ଼ି ନେବା ଘଟଣା ସ୍ଥାନୀୟ ଲୋକମାନଙ୍କ ମନରେ ଗଭୀର ଆଘାତ ଦେଇଛି। ଏନେଇ ଗ୍ରାମବାସୀ ପୋଲିସ ନିକଟରେ ଲିଖିତ ଅଭିଯୋଗ କରିଛନ୍ତି।