ରାଞ୍ଚି,୨୧।୩: ଭାରତର ପୂର୍ବତନ ଦଳର କ୍ରିକେଟର ମହେନ୍ଦ୍ର ସିଂ ଧୋନୀ ଅବସର ନେବା ପରେ ମଧ୍ୟ ତାଙ୍କ କ୍ରେଜ୍ ଆଜି ବି ରହିଛି। ନିଜ ସହର ରାଞ୍ଚିରେ ସେ ବେଶ୍ ଲୋକପ୍ରିୟ। ଏହି କାରଣରୁ ଅବସରରେ ଧୋନୀ ଚାଷ କାର୍ଯ୍ୟକୁ ଲୋକେ ବେଶ୍ ପସନ୍ଦ କରିଛନ୍ତି। ଧୋନୀ ରାଞ୍ଚିରେ ଏକ ଆଉଟ୍ଲେଟ୍ ଖୋଲିଛନ୍ତି। ଏଥିରେ ତାଙ୍କୁ ଫାର୍ମ ହାଉସ୍ରୁ ଅମଳ ହେଉଥିବା ପରିବା ମଧ୍ୟ ଉପଲବ୍ଧ ହେଉଛି। ଏବେ ଧୋନୀଙ୍କ ଦୋକାନରେ ପ୍ରବଳ ଭିଡ ପରିଲକ୍ଷିତ ହେଉଛି। ରବିବାର ସକାଳେ ରାଞ୍ଚିର ମେନ ରୋଡରେ ଧୋନୀଙ୍କ ଇଜା ଫାର୍ମ ହାଉସର ଏକ ଆଉଟଲେଟ ଲଞ୍ଚ କରାଯାଇଥିଲା। ଧୋନୀଙ୍କ କ୍ୟାରିଅରକୁ ଦୃଢତା ଦେଇଥିବା ତାଙ୍କ ବନ୍ଧୁ ପରମଜିତ ସିଂ ଏହାକୁ ଉଦ୍ଘାଟନ କରିଥିଲେ। ଏହି ଅବସରରେ ଧୋନୀଙ୍କ କିଛି ବନ୍ଧୁ ଉପସ୍ଥିତ ଥିଲେ। ଏହାପରେ ଲୋକଙ୍କ ଭିଡ ଜମିଥିଲା। ଏହି ଆଉଟଲେଟରେ ପନିପରିବା, ଦୁଗ୍ଧଜାତ ଦ୍ରବ୍ୟ ସହିତ ଫଳ ଏବଂ କ୍ଷୀର ମଧ୍ୟ ବିକ୍ରି ହେଉଛି। ଧୋନୀଙ୍କ ଫାର୍ମ ହାଉସ୍ରେ ଅର୍ଗାନିକ୍ ପଦ୍ଧତିରେ ପରିବା ଚାଷ କରାଯାଉଥିବାରୁ ଲୋକେ ଏହାକୁ ନେବା ପାଇଁ ଆଗ୍ରହ ଦେଖାଉଛନ୍ତି। ସୂଚନାଯୋଗ୍ୟ, ଆଇପିଏଲ୍ ୨୦୨୧ର ପ୍ରସ୍ତୁତି ପାଇଁ ଧୋନୀ ଏବେ ଚେନ୍ନାଇରେ ଅଛନ୍ତି।
