ମହୁଆଙ୍କ ମାମଲାରେ ନିଶିକାନ୍ତ କହିଲେ ୨୪ ଅକ୍ଟୋବର ପର୍ଯ୍ୟନ୍ତ ସଂଘର୍ଷ ବିରାମ

ନୂଆଦିଲ୍ଲୀ,୨୨।୧୦: ଟଙ୍କା ବଦଳରେ ସଂସଦରେ ପ୍ରଶ୍ନ କରିବା ଘଟଣାରେ ତ୍ରୁଣମୂଳ କଂଗ୍ରେସ (ଟିଏମସି) ଏମପି ମହୁଆ ମୋଇତ୍ର ଏବେ ଭାଜପାର ଟାର୍ଗେଟରେ ଅଛନ୍ତି। ଏହି ସମୟରେ,ଭାଜପା ଏମପି ନିଶିକାନ୍ତ ଦୁବେ ରବିବାର କହିଛନ୍ତି ଯେ ଅକ୍ଟୋବର ୨୪ରେ ଦଶହରା ପର୍ଯ୍ୟନ୍ତ ସେମାନେ ସଂର୍ଘର୍ଷ ବିରାମ କରିବେ।

ଟିଏମସି ଏମପିଙ୍କ ବିରୋଧରେ ଆସିଥିବା ଅଭିଯୋଗ ସମ୍ପର୍କରେ ତାଙ୍କ ବିବୃତ୍ତି ରେକର୍ଡ କରିବାକୁ ଦୁବେ ଅକ୍ଟୋବର ୨୬ରେ ଲୋକ ସଭାର ନୈତିକ କମିଟି ନିକଟରେ ହାଜର ହେବାର କାର୍ଯ୍ୟକ୍ରମ ରହିଛି। ସେ ଅଭିଯୋଗ କରିଛନ୍ତି ଯେ ସଂସଦରେ ପ୍ରଶ୍ନ ଉଠାଇବା ବଦଳରେ ବ୍ୟବସାୟୀ ଦର୍ଶନ ହିରାନନ୍ଦାନୀଙ୍କଠାରୁ ମୋଇତ୍ର ଲାଭ ନେଇଥିଲେ।
ମୋଇତ୍ର ତାଙ୍କ ବିରୋଧରେ ଆସିଥିବା ଅଭିଯୋଗକୁ ଅସ୍ବୀକାର କରୁଛନ୍ତି। ଆଦାନୀ ଗ୍ରୁପଙ୍କ ନିର୍ଦ୍ଦେଶରେ ଭାଜପା ତାଙ୍କୁ ଟାର୍ଗେଟ କରୁଛି ବୋଲି ସେ ଦାବି କରିଛନ୍ତି। ସଂସଦରେ ଏବଂ ବାହାରେ ଆଦାନି ଗ୍ରୁପ ତାଙ୍କ ଆକ୍ରମଣର କେନ୍ଦ୍ରରେ ରହିଆସିଛି। ଲୋକପାଳରେ ମହୁଆଙ୍କ ବିରୋଧରେ ଅଭିଯୋଗ ଦାଖଲ କରିବାର ଗୋଟିଏ ଦିନ ପରେ ଦୁବେ କହିଛନ୍ତି, ଦୁର୍ଗା ପୂଜାର ଶୁଭ ଉତ୍ସବ ହେତୁ ମୁଁ ଆଜି ମୋ ତରଫରୁ ଷ୍ଟମି ଠାରୁ ୨୪ଅକ୍ଟୋବରରେ ଦଶମୀ ପର୍ଯ୍ୟନ୍ତ ସଂଘର୍ଷ ବିରାମ କରୁଛି।
ଦୁବେ ଏବଂ ଓକିଲ ଜୟ ଅନନ୍ତ ଦେହାଦରାଇଙ୍କ ଅଭିଯୋଗ ପରେ ମୋଇତ୍ର ଭାଜପା ଏମପିଙ୍କୁ ବଦନାମ କରିଥିବା ଅଭିଯୋଗ କରି ଦିଲ୍ଲୀ ହାଇକୋର୍ଟରେ ଆବେଦନ କରିଥିଲେ। ଦୁବେଙ୍କ ଅଭିଯୋଗକୁ ଲୋକ ସଭା ବାଚସ୍ପତି ଓମ ବିର୍ଲା ସଂସଦର ନୈତିକ କମିଟି ନିକଟକୁ ପଠାଇଛନ୍ତି।