ପାଟନା,୧୨।୧୨: ୨୦୨୪ ଲୋକ ସଭା ନିର୍ବାଚନ ଲାଗି ତୃତୀୟ ସାମ୍ମୁଖ୍ୟ ନୁହେଁ, ମୁଖ୍ୟ ସାମ୍ମୁଖ୍ୟ ଗଢ଼ାହେବ ବୋଲି ବିହାର ମୁଖ୍ୟମନ୍ତ୍ରୀ ତଥା ସଂଯୁକ୍ତ ଜନତା ଦଳ (ଜେଡିୟୁ) ନେତା ନୀତୀଶ କୁମାର ରବିବାର କହିଛନ୍ତି। ଦଳୀୟ ସମ୍ମିଳନୀକୁ ଉଦ୍ବୋଧନ ଦେଇ ନୀତୀଶ କହିଥିଲେ, ଭାଜପାକୁ ବିରୋଧ କରୁଥିବା ଦଳଗୁଡ଼ିକ ପରସ୍ପର ହାତ ମିଳାଇବାକୁ ରାଜି ହେଲେ ଆଗାମୀ ଲୋକ ସଭା ନିର୍ବାଚନରେ ବିପୁଳ ସଂଖ୍ୟାଗରିଷ୍ଠତା ସହ ଜିତିପାରିବେ। ଏହାକୁ ବାସ୍ତବରେ ପରିଣତ କରିବା ପାଇଁ ସେ ଉଦ୍ୟମ ଜାରି ରଖିବେ, ତେବେ ସବୁକିଛି ବିରୋଧୀ ଦଳଗୁଡ଼ିକ ଉପରେ ନିର୍ଭର କରୁଛି ବୋଲି ବିହାର ମୁଖ୍ୟମନ୍ତ୍ରୀ କହିଛନ୍ତି।
ନୀତୀଶ ନିକଟରେ ଅନେକ ବିରୋଧୀ ଦଳ ନେତାଙ୍କୁ ଭେଟିଥିଲେ। ସମଭାବାପନ୍ନ ଦଳଗୁଡ଼ିକୁ ଏକାଠି କରି ଆଗାମୀ ସାଧାରଣ ନିର୍ବାଚନରେ ଭାଜପାକୁ ଚ୍ୟାଲେଞ୍ଜ ଦେବାକୁ ସେ ଉଦ୍ୟମ ଚଳାଇଛନ୍ତି। ସେ ପ୍ରଧାନମନ୍ତ୍ରୀ ହେବା ଲାଗି ଲକ୍ଷ୍ୟ ରଖିଥିବା କେତେକେ କହୁଥିବାବେଳେ ଏହାକୁ ନୀତୀଶ ଖଣ୍ଡନ କରିଛନ୍ତି। ସେ କହିଛନ୍ତି, ୨୦୨୦ ବିଧାନସଭା ନିର୍ବାଚନ ବେଳେ ଭାଜପା ଜେଡିୟୁର ସହଯୋଗୀ ଥାଇ ଏହା ବିରୋଧରେ କାର୍ଯ୍ୟ କରିଥିଲା। ଏହା ପୂର୍ବରୁ ୨୦୦୫, ୨୦୧୦ ନିର୍ବାଚନରେ ଜେଡିୟୁ କେବେ ଏତେ କମ୍ ଆସନ ଜିତି ନ ଥିଲା। ଭାଜପା ଆମ ପ୍ରାର୍ଥୀଙ୍କୁ ହରାଇବା ଲାଗି ଉଦ୍ୟମ କରିଥିଲା ବୋଲି ନୀତୀଶ କହିଛନ୍ତି।
ବିହାର ମୁଖ୍ୟମନ୍ତ୍ରୀ ଗଣମାଧ୍ୟମକୁ ସମାଲୋଚନା କରିଛନ୍ତି। ସେମାନଙ୍କୁ କେତେକ ରିପୋର୍ଟ କରିବାକୁ ଅନୁମତି ନ ଥିବାବେଳେ ସେମାନେ ସବୁକିଛି ରେକର୍ଡ କରିନେଉଛନ୍ତି, ଦଳ କ୍ଷମତାରୁ ଯିବା ପରେ ସେମାନେ ତାହାକୁ ପ୍ରକାଶ କରୁଥିବା ନୀତୀଶ ଅଭିଯୋଗ କରିଛନ୍ତି। ସେ ଆଉ ଥରେ ମୁଖ୍ୟମନ୍ତ୍ରୀ ହେବାକୁ ଚାହୁଁ ନ ଥିଲେ ହେଁ ଭାଜପା ପ୍ରରୋଚନାରେ ଦାୟିତ୍ୱ ଗ୍ରହଣ କରିଥିଲେ। ତେବେ କେନ୍ଦ୍ରର ଭାଜପା ନେତୃତ୍ୱାଧୀନ ସରକାରଠାରୁ ବିହାର କିଛି ପାଇ ନ ଥିବା ଜେଡିୟୁ ନେତା କହିଛନ୍ତି।
