ଉମରକୋଟ, ୧୮।୧୧(ସନ୍ତୋଷ ଶତପଥୀ): କେନ୍ଦ୍ର ସରକାରଙ୍କ ସଂସ୍ଥା ନାଫେଡ୍ ପକ୍ଷରୁ ନବରଙ୍ଗପୁର ଜିଲାର ଉମରକୋଟ, ଝରିଗାଁ ଓ ରାଇଘରରେ ମକାମଣ୍ଡି ଉଦ୍ଘାଟିତ ହୋଇଯାଇଛି। ଉମରକୋଟ ଆର୍ସିଏମ୍ଏସ୍ ୟାର୍ଡରେ ଅନୁଷ୍ଠିତ ଉତ୍ସବରେ ନାଫେଡ୍ ସହକାରୀ ପ୍ରବନ୍ଧକ ଗୋବିନ୍ଦ ମୁର୍ମୁ ଯୋଗଦେଇ ଏହାର ଉଦ୍ଘାଟନ କରିଥିଲେ।
ଅନ୍ୟମାନଙ୍କ ମଧ୍ୟରେ ମନୋଜ ପତିଆରି, ଅତିରିକ୍ତ ମ୍ୟାନେଜର ଗୋପାଳ ମଲ୍ଲିକଙ୍କ ସମେତ ଅଞ୍ଚଳର ଚାଷୀ ଭୋଗୀ ସେଠୀ, ଆପନା ସେଠୀ, ଜଗନ୍ନାଥ ପାଳ, ହିତେଶ ଜେନା, କୈଳାସ ନାୟକ ଓ କିଶୋର ସାହୁ ପ୍ରମୁଖ ଉପସ୍ଥିତ ଥିଲେ।
ନାଫେଡ୍ରୁ ଘରୋଇ ବ୍ୟବସାୟୀ ଅଧିକ ଦାମରେ ମକା କ୍ରୟ କରୁଥିବାରୁ ତୁରନ୍ତ କେନ୍ଦ୍ର ସରକାର ମକା ସହାୟକ ମୂଲ୍ୟକୁ ବୃଦ୍ଧି କରିବା ପାଇଁ ଚାଷୀ ଦାବି କରିଛନ୍ତି। ମକାର ସହାୟକ ମୂଲ୍ୟ କୁଇଣ୍ଟାଲ ପିଛା ୨୨୨୫ ଟଙ୍କା ଥିବାବେଳେ ଘରୋଇ ବ୍ୟବସାୟୀମାନେ ୨୩୦୦ ଟଙ୍କାରେ ଜମିରୁ କିଣି ନେଉଛନ୍ତି। ମାସକ ତଳେ ଘରୋଇ ବ୍ୟବସାୟୀମାନେ ୨୫୦୦ ଟଙ୍କାରୁ କିଣିବା ଆରମ୍ଭ କରିଥିଲେ। ସରକାର ଦର ନ ବଢ଼ାଇଲେ ମଣ୍ଡିକୁ ମକା ଆସିବା ଅସମ୍ଭବ ହୋଇଯିବ ବୋଲି ଚାଷୀ କହିଛନ୍ତି।
ମକାର ସହାୟକ ଦର ନିର୍ଦ୍ଧାରଣ କରିବା କେନ୍ଦ୍ର ସରକାରଙ୍କ ନୀତି । ଚାଷୀଙ୍କୁ ଯେଉଁଠି ଅଧିକ ଟଙ୍କା ମିଳିବ ସେଠି ମକା ବିକ୍ରି କରିବେ। ବ୍ୟବସାୟୀ କୁଇଣ୍ଟାଲ ପିଛା ୨୨୨୫ରୁ କମ୍ରେ କ୍ରୟକରି ପାରିବ ନାହିଁ। ଯଦି କ୍ରୟକରେ ଚାଷୀମାନେ ନାଫେଡ୍ ମଣ୍ଡିରେ ମକା ବିକ୍ରି କରିପାରିବେ ବୋଲି ନାଫେଡ୍ ସହକାରୀ ପ୍ରବନ୍ଧକ ଗୋବିନ୍ଦ ମୁର୍ମୁ କହିଛନ୍ତି। କେନ୍ଦ୍ର ସରକାର ଏହି ମକା ମଣ୍ଡି ଖୋଲିବା ଦ୍ବାରା ବ୍ୟବସାୟୀଙ୍କ ଉପରେ ଅଙ୍କୁଶ ଲାଗିବ ଓ ଚାଷୀଙ୍କ ପାଇଁ କବଚ ସଦୃଶ ହୋଇପାରିବ ବୋଲି ଆଲୋଚନା ହେଉଛି।
