ଅହମଦାବାଦ,୧୦ା୧୧: ଅଙ୍ଗନଓ୍ବାଡି କର୍ମୀ ଏବଂ ସହାୟିକାମାନଙ୍କ ପାଇଁ ସ୍ଥାୟୀ ସିଭିଲ୍ କର୍ମଚାରୀଙ୍କ ଭଳି ସୁବିଧା କରିବା ନିମନ୍ତେ ଗୁଜରାଟ ହାଇକୋର୍ଟ ରାଜ୍ୟ ଏବଂ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟଙ୍କ ଏହି ଗୁରୁତ୍ୱପୂର୍ଣ୍ଣ ରାୟ ଦେଶର ଅନେକ ଲକ୍ଷ ଅଙ୍ଗନଓ୍ବାଡି କର୍ମୀ ଏବଂ ସହାୟିକାମାନଙ୍କ ପାଇଁ ଲାଭଦାୟକ ହେବ। ସରକାରୀ କର୍ମଚାରୀଙ୍କ ଭଳି ସେମାନଙ୍କୁ ସମ୍ମାନ ମିଳୁ ନ ଥିବାବେଳେ ପକ୍ଷପାତ କରାଯାଉଥିବା ହାଇକୋର୍ଟ ଜାଣିବା ପରେ ଉପରୋକ୍ତ ରାୟ ଦେଇଛନ୍ତି। ଏହି ପଦବୀଗୁଡ଼ିକୁ ସରକାରୀ ସେବାରେ ସାମିଲ କରିବା ସହ ସେମାନଙ୍କୁ ନିୟମିତ କର୍ମଚାରୀଙ୍କ ଭଳି ସୁବିଧା ଦେବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କୁ ମିଳିତ ଭାବେ ନୀତି ପ୍ରଣୟନ କରିବା ନିମନ୍ତେ ଜଷ୍ଟିସ୍ ନିଖିଲ ଏସ୍. କାରିଏଲ୍ଙ୍କ ଖଣ୍ଡପୀଠ କହିଛନ୍ତି।
କେନ୍ଦ୍ର ସରକାରଙ୍କ ସମନ୍ବିତ ଶିଶୁ ବିକାଶ ସେବା (ଆଇସିଡିସି) ଯୋଜନାରେ ୧୯୮୩ରୁ ୨୦୧୦ ମଧ୍ୟରେ ନିଯୁକ୍ତି ପାଇଥିବା ଅନେକ ଅଙ୍ଗନଓ୍ବାଡି କର୍ମୀ (ଏଡବ୍ଲ୍ୟୁଡବ୍ଲ୍ୟୁ) ଏବଂ ସହାୟିକା (ଏଡବ୍ଲ୍ୟୁଏଚ୍)ଙ୍କ ଆବେଦନର ଶୁଣାଣି କରି ହାଇକୋର୍ଟ ଉପରୋକ୍ତ ରାୟ ଦେଇଛନ୍ତି। ୬ ବର୍ଷରୁ କମ୍ ବୟସର ପିଲା, ଗର୍ଭବତୀ ଓ ସ୍ତନ୍ୟପାନ କରାଉଥିବା ମହିଳାଙ୍କ କଲ୍ୟାଣ ଲାଗି ସାରା ଦେଶରେ ଅଙ୍ଗନଓ୍ବାଡିି କେନ୍ଦ୍ର ଖୋଲାଯାଇ ଏଡବ୍ଲ୍ୟୁଡବ୍ଲ୍ୟୁ ଏବଂ ଏଡବ୍ଲ୍ୟୁଏଚ୍ଙ୍କୁ ନିଯୁକ୍ତି ଦିଆଯାଇଥିଲା। ସେମାନେ ୧୦ ବର୍ଷରୁ ଊର୍ଦ୍ଧ୍ୱ ହେଲା ଦୈନିକ ୬ ଘଣ୍ଟାରୁ ଅଧିକ ସମୟ କାର୍ଯ୍ୟ କରୁଥିବାବେଳେ ସରକାରୀ କର୍ମଚାରୀଙ୍କ ଭଳି ସୁବିଧା ଦିଆ ନ ଯାଇ ସ୍ବଳ୍ପ ପରିମାଣର ପାରିତୋଷିକ ଦିଆଯାଉଛି। ଉପଯୁକ୍ତ ପ୍ରାପ୍ୟ ପ୍ରଦାନ ପାଇଁ ନିର୍ଦ୍ଦେଶ ଦେବା ନିମନ୍ତେ ସେମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।