ବେଙ୍ଗାଲୁରୁ,୯।୪:କର୍ନାଟକର ବିରୋଧୀ ଦଳର ନେତା ସିଦ୍ଧରମୈୟା, ପୂର୍ବତନ ମୁଖ୍ୟମନ୍ତ୍ରୀ ଏଚ୍.ଡି କୁମାରସ୍ବାମୀ ଏବଂ ଲୋକପ୍ରିୟ ପ୍ରଗତିଶୀଳ ସାହିତ୍ୟକାର କେ.ବୀରଭଦ୍ରାପ୍ପାଙ୍କ ସମେତ ୬୪ଜଣ ଲୋକଙ୍କୁ ହତ୍ୟା କରିବାର ଏକ ଧମକପୂର୍ଣ୍ଣ ଚିଠି ମିଳିଛି। ଏହି ଚିଠି ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅନ୍ୟପଟେ ଏହି ମାମଲାକୁ ଗମ୍ଭୀରତାର ସହ ନେଇ ପୋଲିସ ମାମଲା ରୁଜୁ କରି ସୁରକ୍ଷା ବ୍ୟବସ୍ଥାକୁ କଡାକଡି କରିବାକୁ ଚିନ୍ତା କରିଛି। ସୂଚନାଯୋଗ୍ୟ, କର୍ନାଟକରେ ସୋସିଆଲ ମିଡିଆରେ ଭାଇରାଲ ହେଉଥିବା ଉକ୍ତ ଚିଠିରେ ଲେଖାଯାଇଛି ଯେ, ମୃତ୍ୟୁ ଆପଣଙ୍କ ଚାରିପାଖରେ ଲୁଚି ରହିଛି, ମରିବାକୁ ପ୍ରସ୍ତୁତ ରୁହ। ଆପଣ ବିନାଶ ବାଟରେ ଥିବା ବେଳେ ମୃତ୍ୟୁ ଆପଣଙ୍କ ବହୁ ନିକଟତର ରହିଛି। ପ୍ରସ୍ତୁତ ରୁହନ୍ତୁ, ମୃତ୍ୟୁ ଆପଣଙ୍କୁ ଯେକୌଣସି ରୂପରେ ମାରି ଦେଇପାରେ। ଆପଣଙ୍କ ପରିବାର ସଦସ୍ୟଙ୍କୁ ଜଣାନ୍ତୁ ଏବଂ ନିଜର ଅନ୍ତିମ ସଂସ୍କାରର ବ୍ୟବସ୍ଥା କରନ୍ତୁ ବୋଲି ଉକ୍ତ ଚିଠିରେ ଲେଖାଯାଇଛି। ତେବେ ଏହି ବାର୍ତ୍ତା ପଠାଇଥିବା ଦୁର୍ବୃତ୍ତ ନିଜକୁ ହିନ୍ଦୁ ବୋଲି କହିଛନ୍ତି। ଅନ୍ୟପଟେ ଏଭଳି ଧମକକୁ ହାଲୁକା ଭାବେ ଗ୍ରହଣ ନ କରିବାକୁ ପୂର୍ବତନ ମୁଖ୍ୟମନ୍ତ୍ରୀ ଏଚ୍ଡି କୁମାରସ୍ବାମୀ ସରକାରଙ୍କୁ ଚେତାବନୀ ଦେଇଛନ୍ତି। ଏଥିସହ ସେମାନଙ୍କୁ ସୁରକ୍ଷା ପ୍ରଦାନ କରିବାକୁ ନିବେଦନ କରିଛନ୍ତି।