ନୂଆଦିଲ୍ଲୀ, ୪ା୧୧(ପି.ଟି.)-ପ୍ରଫେସନାଲ ସ୍ତରରେ ଖେଳିବାବେଳେ ବ୍ୟାଟ୍ସମ୍ୟାନଙ୍କ ଲାଗି ହେଲମେଟ ପିନ୍ଧିବା ବାଧ୍ୟତାମୂଳକ କରାଯାଉ ବୋଲି ଭାରତୀୟ ବ୍ୟାଟିଂ କିମ୍ବଦନ୍ତୀ ସଚିନ ତେନ୍ଦୁଲକର ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)କୁ କହିଛନ୍ତି। ସନରାଇଜର୍ସ ହାଇଦ୍ରାବାଦ ଅଲ୍ରାଉଣ୍ଡର ବିଜୟ ଶଙ୍କରଙ୍କ ମୁଣ୍ଡରେ ବଲ୍ ବାଜିବା ଦୃଶ୍ୟର ଏକ ଭିଡିଓ ସେ ଶେୟାର କରିଛନ୍ତି। ରନଆଉଟ କରିବା ଲାଗି କିଙ୍ଗ୍ସ ଇଲେଭେନ ପଞ୍ଜାବ ଫିଲ୍ଡର ନିକୋଲାସ ପୁରନ ଷ୍ଟ୍ରାଇକର୍ସ ଏଣ୍ଡ୍କୁ ବଲ୍ ଫିଙ୍ଗୁ ଥିବାବେଳେ ତାହା ବ୍ୟାଟ୍ସମ୍ୟାନଙ୍କୁ ଆଘାତ ଦେଇଥିଲା। ଏହି ଭିଡ଼ିଓଟି ପ୍ରକୃତରେ ଇଣ୍ଡିଆନ ପ୍ରିମିୟର ଲିଗ୍ ଅଫିସିଆଲ ଓ୍ବେବସାଇଟ୍ରେ ପୋଷ୍ଟ ହୋଇଥିଲା। ବଲ୍ ବାଜିବା ପରେ ଶଙ୍କର ତଳେ ପଡ଼ିଯାଇଥିଲେ। ଫିଜିଓ ତାଙ୍କ ନିକଟକୁ ଯାଇ ସ୍ବାସ୍ଥ୍ୟାବସ୍ଥା ଯାଞ୍ଚ କରିଥିଲେ। ସୌଭାଗ୍ୟବଶତଃ ୨୯ବର୍ଷୀୟ ବ୍ୟାଟ୍ସମ୍ୟାନ ସେତେବେଳେ ଏକ ହେଲମେଟ୍ ପିନ୍ଧିଥିଲେ। ଖେଳ ଏବେ ଦ୍ରୁତତର ହୋଇଛି। କିନ୍ତୁ ଖେଳାଳିଙ୍କୁ ସୁରକ୍ଷା ପ୍ରତି ଧ୍ୟାନ ଦିଆଯାଉ ନାହିଁ। ୨୦୧୪ ନଭେମ୍ବରରେ ଏକ ଘରୋଇ ମ୍ୟାଚ୍ ବେଳେ ସିନ୍ ଆବଟଙ୍କ ଏକ ବାଉନ୍ସରରେ ଆଘାତପ୍ରାପ୍ତ ହୋଇ ଅଷ୍ଟ୍ରେଲିଆର ଯୁବ ବ୍ୟାଟ୍ସମ୍ୟାନ ଫିଲିପ ହ୍ୟୁଗ୍ସଙ୍କ ମୃତ୍ୟୁ ଘଟିଥିଲା। ସେତେବେଳେ ଖେଳାଳିଙ୍କ ସୁରକ୍ଷାକୁ ନେଇ ବିତର୍କ ହୋଇଥିଲା। ବଲ୍ ୨୫ ବର୍ଷୀୟ କ୍ରିକେଟରଙ୍କ ବେକ ତଳେ ବାଜିଥିଲା। ଫଳରେ ବ୍ୟାଟ୍ସମ୍ୟାନଙ୍କୁ ଅଧିକ ସୁରକ୍ଷିତ କରିବା ଲାଗି ହେଲମେଟ୍ ଡିଜାଇନ୍ରେ ପରିବର୍ତ୍ତନ କରାଯାଇଥିଲା। ତେନ୍ଦୁଲକର ଏହି ଭିଡିଓଟିକୁ ବିସିସିଆଇ, କ୍ରିକେଟ ଅଷ୍ଟ୍ରେଲିଆ ଏବଂ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ ସମେତ ସମସ୍ତ କ୍ରିକେଟ ବୋର୍ଡ ସହିତ ଯୋଡ଼ିଛନ୍ତି। ସେ ତାଙ୍କର ଅନ୍ୟ ଏକ ଟୁଇଟ୍ରେ ବର୍ତ୍ତମାନର ଭାରତୀୟ ମୁଖ୍ୟ କୋଚ୍ ରବି ଶାସ୍ତ୍ରୀଙ୍କୁ ଯୋଡ଼ିଛନ୍ତି। ଏକ ପୁରୁଣା ଘଟଣାକୁ ସେ ମନେ ପକାଇଛନ୍ତି। ସେତେବେଳେ ଏକ ପ୍ରଦର୍ଶନୀ ମ୍ୟାଚ୍ରେ ସୁନିଲ ଗାଭାସ୍କରଙ୍କ ଏକ ଫୁଲ୍ଟସ୍ ବଲ୍ ଶାସ୍ତ୍ରୀଙ୍କ ମୁଣ୍ଡରେ ବାଜିଥିଲା। ବଲ୍ଟି ଟପ୍ ଏଜ୍ ହୋଇ ନ ଥିଲେ ହୁଏତ ସେ ଗୁରୁତର ଭାବେ ଆଘାତପ୍ରାପ୍ତ ହୋଇଥାନ୍ତେ।