ନୂଆଦିଲ୍ଲୀ,୪।୧: ତିନି ବର୍ଷ ପୂର୍ବେ ଟିମ୍ ଇଣ୍ଡିଆର ଅଧିନାୟକ ପଦ ଛାଡ଼ିଥିବା ଷ୍ଟାର ବ୍ୟାଟ୍ସମ୍ୟାନ ବିରାଟ କୋହଲି ପୁଣିଥରେ ମଇଦାନରେ ନିଜର ପୁରୁଣା ଷ୍ଟାଇଲ୍ରେ ନଜର ଆସିଥିଲେ। ସିଡନୀ ଟେଷ୍ଟରୁ ରୋହିତ ଶର୍ମା ନିଜକୁ ଦୂରେଇ ନେଇଥିଲେ, ଏହାପରେ ଉପ ଅଧିନାୟକ ଜସପ୍ରିତ ବୁମ୍ରାଙ୍କୁ ଦଳର ନେତୃତ୍ୱ ମିଳିଥିଲା। ହେଲେ ମ୍ୟାଚ୍ର ଦ୍ୱିତୀୟ ଦିନ ଆହତ ହେବା ଯୋଗୁ ବୁମ୍ରା ମଇଦାନରୁ ଚାଲିଯାଇଥିଲେ। ଏହାପରେ କୋହଲି ଅଧିନାୟକ ଦାୟିତ୍ୱ ତୁଲାଇଥିଲେ। ଏହାପରେ ବ୍ୟାଟ୍ସମ୍ୟାନମାନେ ହଠାତ ଚମତ୍କାର ବୋଲିଂ କରିବା ଆରମ୍ଭ କରିଥିଲେ। ଅଷ୍ଟ୍ରେଲିଆ ଖୁବ୍ କମ୍ ଓଭରରେ ଉଇକେଟ ହରାଇଥିଲା। ଏହାପରେ କୋହଲିଙ୍କୁ ପୁଣି ଥରେ ଅଧିନାୟକ କରାଯାଉ ବୋଲି ଦାବି କରାଯାଉଛି।
ଆହତ ହେବା ପରେ ବୁମ୍ରା ଯେବେ ମଇଦାନ ଛାଡ଼ିଥିଲେ ସେତେବେଳେ ଅଷ୍ଟ୍ରେଲିଆର ପ୍ରଥମ ଇନିଂସ ସ୍କୋର ୯୬/୪ ଉଇକେଟ ଥିଲା। ଏଠାରୁ ଦଳର ନେତୃତ୍ୱ କୋହଲି ସମ୍ଭାଳିବା ଆରମ୍ଭ କରିଥିଲେ। ପରେ ୧୮୧ ରନ୍ ସ୍କୋରରେ ଅଷ୍ଟ୍ରେଲିଆର ପୁରା ଟିମ୍ ଅଲଆଉଟ୍ ହୋଇଯାଇଥିଲେ। ପୁଣିଥରେ ବିରାଟ ନିଜର ନେତୃତ୍ୱ ବଳରେ ପ୍ରଶଂସକଙ୍କ ହୃଦୟ ଜିତିଥିଲେ। ପ୍ରଥମେ ଭାରତର ଇନିଂସର ସ୍କୋରରୁ ଅଷ୍ଟ୍ରେଲିଆ ଆଗକୁ ଯିବା ନିଶ୍ଚିତ ବୋଲି ଲାଗୁଥିଲା। ହେଲେ ଶେଷରେ ଦଳ ଭାରତ ଇନିଂସଠାରୁ ୪ ରନ୍ ପଛୁଆ ରହିଥିଲା।
ଏସବୁ ଘଟଣାକୁ ନେଇ ସୋସିଆଲ ମିଡିଆରେ ପ୍ରଶଂସକମାନେ କୋହଲିଙ୍କୁ ପୁଣିଥରେ ଅଧିନାୟକ କରାଯାଉ ବୋଲି ଦାବି କରୁଛନ୍ତି। ‘ବ୍ରିଙ୍ଗ ବ୍ୟାକ୍ ବିରାଟ ଆଜ୍ ଟେଷ୍ଟ କ୍ୟାପ୍ଟେନ୍’ ସୋସିଆଲ ମିଡିଆରେ ଭାଇରାଲ ହେଉଛି।