ଜୟପୁର,୨୩।୧୧ : ରାଜସ୍ଥାନ କଂଗ୍ରେସ ପାଇଁ ଏକ ସମସ୍ୟା ପାଲଟିଛି। ଜଣକୁ ବୁଝାଇବା ପରେ, ଅନ୍ୟ ଜଣେ ଆଖି ଦେଖାଇବା ଆରମ୍ଭ କରୁଛନ୍ତି। ମୁଖ୍ୟମନ୍ତ୍ରୀ ପଦ ପାଇଁ ଅଶୋକ ଗେହଲୋଟ ଏବଂ ସଚିନ ପାଇଲଟଙ୍କ ମଧ୍ୟରେ ଜାରି ରହିଥିବା ଲଢ଼େଇରେ କଂଗ୍ରେସ ସଙ୍କଟରେ ପଡ଼ିଛି। ବର୍ତ୍ତମାନ ଭାରତ ଯୋଡୋ ଯାତ୍ରା ରାଜସ୍ଥାନରେ ପହଞ୍ଚିବା ପୂର୍ବରୁ ରାହୁଲ ଗାନ୍ଧୀଙ୍କୁ ମୁଖ୍ୟମନ୍ତ୍ରୀ ଅଶୋକ ଗେହଲୋଟ ଏବଂ ତାଙ୍କ ପ୍ରତିଦ୍ୱନ୍ଦ୍ୱୀ ସଚିନ ପାଇଲଟଙ୍କ ମଧ୍ୟରେ ଚାଲିଥିବା ଯୁଦ୍ଧ ବିଷୟରେ ମନେ ପକାଇ ନିଷ୍ପତ୍ତି ନେବାକୁ ଚାପ ପକାଯାଉଛି।
ସଚିନ ପାଇଲଟ ଖୋଲାଖୋଲି ଭାବରେ ସେପ୍ଟେମ୍ବରରେ ଦଳ ବିରୁଦ୍ଧରେ ବିଦ୍ରୋହ କରିଥିବା ତଥା ଅଶୋକ ଗେହଲୋଟଙ୍କୁ ସମର୍ଥନ କରୁଥିବା ବିଧାୟକଙ୍କ ବିରୋଧରେ କାର୍ଯ୍ୟ କରିବାକୁ କଂଗ୍ରେସକୁ ଖୋଲାଖୋଲି ଭାବେ କହିବା ପରେ ଗୁର୍ଜର ସମ୍ପ୍ରଦାୟର ଜଣେ ନେତା ଭାରତ ଯୋଡୋ ଯାତ୍ରାକୁ ନେଇ ଚେତାବନୀ ଦେଇଛନ୍ତି।
ଗୁର୍ଜର ନେତା ବିଜୟ ସିଂ ବୈଂସଲା କହିଛନ୍ତି, ବର୍ତ୍ତମାନର କଂଗ୍ରେସ ସରକାର ଚାରି ବର୍ଷ ପୂରଣ କରିଛନ୍ତି ଏବଂ ଗୋଟିଏ ବର୍ଷ ବାକି ଅଛି। ଏବେ ସଚିନ ପାଇଲଟଙ୍କୁ ମୁଖ୍ୟମନ୍ତ୍ରୀ କରାଯିବା ଉଚିତ। ଯଦି ଏହା ଘଟେ ତେବେ ରାହୁଲ ଗାନ୍ଧୀଙ୍କୁ ଆମେ ରାଜ୍ୟରେ ସ୍ବାଗତ କରିବୁ। ଅନ୍ୟଥା ଆମେ ରାହୁଲଙ୍କୁ ବିରୋଧ କରିବୁ। ବୈଂସଲା କହିଛନ୍ତି ଯେ ଆମର କୌଣସି ବିକଳ୍ପ ନାହିଁ। ବର୍ତ୍ତମାନର ମୁଖ୍ୟମନ୍ତ୍ରୀ ୨୦୧୯ରେ ହୋଇଥିବା ଚୁକ୍ତିନାମାକୁ କାର୍ଯ୍ୟକାରୀ କରୁନାହାଁନ୍ତି। ଆମେ କାହାକୁ ଧମକ ଦେଉ ନାହୁଁ, କିନ୍ତୁ କେତେ ଦିନ ଆଉ ଅପେକ୍ଷା କରିବୁ।
