ଭୁବନେଶ୍ୱର, ୧୭।୧୧(ବ୍ୟୁରୋ): ଫନୀ ବାତ୍ୟାକୁ ଦେଢ଼ ବର୍ଷ ବିତି ଗଲାଣି। ମାତ୍ର ଏ ପର୍ଯ୍ୟନ୍ତ ପିପିଲି, ଡେଲାଙ୍ଗ ଅଞ୍ଚଳରେ କୌଣସି ବାସହରାଙ୍କୁ ଗୃହ ଯୋଗାଇ ଦିଆଯାଇ ନାହିଁ। ବିନା କାରଣରେ ହଜାର ହଜାର କ୍ଷତିଗ୍ରସ୍ତଙ୍କ ବ୍ୟାଙ୍କ ଆକାଉଣ୍ଟକୁ ଦୀର୍ଘ ସମୟ ଧରି ଅଚଳ କରିଦିଆ ଯାଇଛି। ଏନେଇ କଂଗ୍ରେସ ମୁଖପାତ୍ର ନିଶିକାନ୍ତ ମିଶ୍ରଙ୍କ ନେତୃତ୍ୱରେ ଏକ ପ୍ରତିନିଧି ଦଳ ରାଜୀବ ଭବନରେ ସ୍ବତନ୍ତ୍ର ରିଲିଫ କମିଶନର ପ୍ରଦୀପ ଜେନାଙ୍କୁ ଭେଟି ଏ ବାବଦରେ ଜଣାଇଛନ୍ତି। ବ୍ୟାଙ୍କ ଖାତାକୁ ତୁରନ୍ତ କାର୍ଯ୍ୟକ୍ଷମ କରିବା ଏବଂ ହିତାଧିକାରୀ ତାଲିକାରେ ସ୍ଥାନ ପାଇ ନ ଥିବା କ୍ଷତିଗ୍ରସ୍ତଙ୍କୁ ସହାୟତା ଦେବା ଦାବିରେ ସ୍ମାରକପତ୍ର ପ୍ରଦାନ କରିଛନ୍ତି। କଂଗ୍ରେସ ପ୍ରତିନିଧି ଦଳ ପକ୍ଷରୁ ଅଭିଯୋଗ ହୋଇଛି ୨୦୧୯ ମେରେ ହୋଇଥିବା ବାତ୍ୟାରେ ବହୁ ପରିବାର ବାସହରା ହୋଇଥିଲେ। ଦେଢ଼ ବର୍ଷ ହେବ ପିପିଲି, ଡେଲାଙ୍ଗ ୨ ତହସିଲରେ ଘରଭଙ୍ଗା ସର୍ଭେ କାମ ଚାଲିଛି। ଯାହା ସୂଚନା ଅଧିକାରୀ ଆଇନ୍ ଦ୍ୱାରା ପ୍ରାପ୍ତ ତଥ୍ୟ ବୟାନ କରୁଛି। ପ୍ରାଥମିକ ତଦନ୍ତ ପରେ ଘର ଭାଙ୍ଗିଥିବା ଲୋକଙ୍କୁ ଯେଉଁ ସହାୟତା ରାଶି ସରକାର ଦେଇଥିଲେ, ଏବେ ସେଥିରୁ ବହୁ ହିତାଧିକାରୀଙ୍କ ଖାତାକୁ ଅଚଳ କରି ରଖାଯାଇଛି। ଦଳୀୟ ଭିତ୍ତିରେ ସେହି ବ୍ୟାଙ୍କ ଖାତାକୁ କାର୍ଯ୍ୟକ୍ଷମ କରାଯାଉଛି।
