ମାଲକାନଗିରି, ୨୦।୧ (ଡି.ଏନ୍.ଏ.): ମାଲକାନଗିରି ଜିଲାରେ ପୂର୍ବରୁ ମ୍ୟାଲେରିଆରେ ବହୁ ଜନସାଧାରଣ ଆକ୍ରାନ୍ତ ହୋଇ ମୃତ୍ୟୁବରଣ କରୁଥିଲେ। ଏଥିପାଇଁ ସରକାର ମ୍ୟାଲେରିଆ ନିରାକରଣ ପାଇଁ ଏକ ସ୍ବତନ୍ତ୍ର ଯୋଜନା କରି ମାଲକାନଗିରି ଜିଲାରେ ଯେକୌଣସି ଲୋକଙ୍କୁ ଜ୍ୱର ହେଲେ ତାହାର ରକ୍ତ ନମୁନା ପରୀକ୍ଷା କରି ମ୍ୟାଲେରିଆ ହେଉଥିଲେ ତାହାର ଚିକିତ୍ସା କରିବା, ମ୍ୟାଲେରିଆ ବୃଦ୍ଧି ନ ପାଇବା ନେଇ ସ୍ବତନ୍ତ୍ର ଟିମ୍ ଗଠନ କରିବା, ବିଭିନ୍ନ ଅଞ୍ଚଳ ବୁଲି ଲୋକଙ୍କ ସ୍ବାସ୍ଥ୍ୟ ପରୀକ୍ଷା କରାଯିବା, ଔଷଧଯୁକ୍ତ ମଶାରି ବ୍ୟବହାର ଲାଗି ମାଗଣାରେ ପ୍ରତି ପରିବାରଙ୍କୁ ମଶାରି ବଣ୍ଟନ କରାଯାଇଥିଲା। ଏହି ମଶାରି ତୃଣମୂଳ ସ୍ତରରେ କାର୍ଯ୍ୟ କରୁଥିବା ସ୍ବାସ୍ଥ୍ୟ କର୍ମୀ ଏବଂ ଅଙ୍ଗନଓ୍ବାଡି କର୍ମୀଙ୍କ ଦ୍ୱାରା ବିତରଣ କରାଯାଇଛି। ତେବେ ସେହି ମଶାରୀ ଜଣେ ସ୍ବାସ୍ଥ୍ୟକର୍ମୀଙ୍କ ବାଡ ବୁଜିବାରେ ଲାଗୁଥିବା ଜଣାପଡିଛି। ଫଳରେ ମ୍ୟାଲେରିଆ ନିରାକରଣ ନେଇ ସରକାରଙ୍କ ବିଭିନ୍ନ ପଦକ୍ଷେପ ଧୂଆଁବାଣରେ ପରିଣତ ହୋଇଛି। ଏପରି ଦେଖିବାକୁ ମିଳିଛି କୁଡୁମୁଲୁଗୁମ୍ମା ବ୍ଲକରେ। ବ୍ଲକର ଉପାନ୍ତ ଅଞ୍ଚଳରେ ଗରିବ ଲୋକେ ବିନା ମଶାରିରେ ରାତି ବିତାଉଥିବା ବେଳେ ଏଠାରେ ଔଷଧଯୁକ୍ତ ମଶାରି ଜଣେ ସ୍ବାସ୍ଥ୍ୟକର୍ମୀଙ୍କ ବଗିଚାରେ ବାଡ ହୋଇ ଲାଗିଛି। ଗୋଟିଏ କି ୨ଟି ନୁହେଁ ପ୍ରାୟ ୮ /୧୦ଟି ମଶାରିକୁ ସେ ନିଜ ବଗିଚାରେ ବାଡ ତିଆରି କରି ବ୍ୟବହାର କରୁଥିବା ଅଭିଯୋଗ ହୋଇଛି। ଏ ସମ୍ପର୍କରେ କୁଡୁମୁଲୁଗୁମ୍ମା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଅଧିକାରୀ ଡା. ରଜନୀକାନ୍ତ ଦାସଙ୍କୁ ପଚାରିବାରୁ ସେ କହିଲେ ଯେ, ଅଭିଯୋଗର ତତନ୍ତ ହେବ। ସତ୍ୟାସତ୍ୟ ଥିଲେ କାର୍ଯ୍ୟାନୁଷ୍ଠାନ ହେବ ବୋଲି କହିଥିଲେ।