କୁଆଲା ଲମପୁର,୧୪।୪: ମାଲେସିଆର ଏକ ଟପ ସିକ୍ରେଟ ଫାଇଲକୁ ୪୭ ବର୍ଷ ପରେ ସାର୍ବଜନିନ କରାଯାଇଛି। ସୂଚନାଯୋଗ୍ୟ, ୧୯୭୬ରେ ମାଲେସିଆରେ ଏକ ବିମାନ ଦୁର୍ଘଟଣା ଗ୍ରସ୍ତ ହୋଇଥିଲା। ଏଥିରେ ଅନେକ ରାଜନେତା ଓ ମନ୍ତ୍ରୀଙ୍କର ମୃତ୍ୟୁ ହୋଇଥିଲା। ବିମାନ ଦୁର୍ଘଟଣା ପରଠାରୁ ମାଲେସିଆ ସରକାର ଏହାର ଫାଇଲକୁ ଗୁପ୍ତ ଭାବେ ରଖିଥିଲେ। ଏହି ଦୁର୍ଘଟଣାର କାରଣକୁ ସାର୍ବଜନିନ କରାଯାଇ ନ ଥିଲା। ଏବେ ଲୋକଙ୍କ ବହୁ ଦାବି ପରେ ମାଲେସିଆ ସରକାର ୧୯୭୬ରେ ହୋଇଥିବା ବିମାନ ଦୁର୍ଘଟଣା ଫାଇଲକୁ ସାର୍ବଜନିନ କରି ଦେଇଛନ୍ତି। ଫାଇଲରୁ ଜଣାପଡିଛି କି ବିମାନରେ ଜିନିଷପତ୍ର ଠିକ ଭାବେ ରଖାଯାଇ ନ ଥିଲା, ଯେଉଁଥିପାଇଁ ବିମାନଟି ଦୁର୍ଘଟଣା ଗ୍ରସ୍ତ ହୋଇଥିଲା।
ମାଲେସିଆ ସରକାର ୨୧ ପୃଷ୍ଠାର ତଥ୍ୟ ବୁଧବାର ସାର୍ବଜନିନ କରିଛନ୍ତି। ଏହା ଅନୁଯାୟୀ, ଯେଉଁ ବିମାନ ଦୁର୍ଘଟଣାର ଶିକାର ହୋଇଥିଲା, ତାହା ଅଷ୍ଟ୍ରେଲିଆର ଏୟାର କ୍ରାପ୍ଟ ଫ୍ୟାକ୍ଟ୍ରିରେ ନିର୍ମାଣ କରାଯାଇଥିଲା। ବିମାନଟି ସବାହ ରାଜ୍ୟର ରାଜଧାନୀ କୋଟା କେନାବାଲୁ ଯାଉଥିଲା। ସେତେବେଳେ ଏହା ସମୁଦ୍ରରେ ବୁଡି ଯାଇଥିଲା। ଏହି ବିମାନ ଦୁର୍ଘଟଣାରେ ସବାହ ରାଜ୍ୟର ତତକାଳୀନ ମୁଖ୍ୟମନ୍ତ୍ରୀ ତୁମ ଫୁଆଦ ଷ୍ଟିଫେନ୍ସ ଓ ରାଜ୍ୟର ଆବସ ମନ୍ତ୍ରୀ, ଅର୍ଥମନ୍ତ୍ରୀ ଓ ସଂଚାର ମନ୍ତ୍ରୀଙ୍କ ମୃତ୍ୟୁ ହୋଇଥିଲା। ରିପୋର୍ଟରେ କୁହାଯାଇଛି କି ଏମିତି କୌଣସି ପ୍ରମାଣ ମିଳିନାହିଁ ବିମାନରେ କୌଣସି ପ୍ରକାର ତ୍ରୁଟି ଅଥବା ନିଆଁ ଲାଗିବା ଅବା ବିସ୍ଫୋରଣ ହୋଇଥିଲା। ରିପୋର୍ଟରେ କୁହାଯାଇଛି କି ବିମାନରେ ଆବଶ୍ୟକତାଠାରୁ ଅଧିକ ଜିନିଷ ଭର୍ତ୍ତି କରାଯାଇଥିଲା ଓ ଏହାକୁ ଠିକଭାବେ ଭର୍ତ୍ତି କରାଯାଇ ନ ଥିଲା। ଫଳରେ ପବନରେ ବିମାନର ସନ୍ତୁଳନ ବିଗିଡି ଯାଇଥିଲା ଓ ଏହା ଦୁର୍ଘଟଣାଗ୍ରସ୍ତ ହୋଇଥିଲା।
