ଆବୁଧାବି,୭।୧୧: ଭାରତରେ ଭିଣେଇ ଭାଇ ଭାବେ ଜଣାଶୁଣା ପାକିସ୍ତାନ ଅଲରାଉଣ୍ଡର ଶୋଏବ ମଲିକ ରବିବାର ସ୍କଟଲାଣ୍ଡ ବିପକ୍ଷ ମ୍ୟାଚ୍ରେ ଖେଳିଛନ୍ତି ବିସ୍ଫୋରକ ଅର୍ଦ୍ଧଶତକୀୟ ପାଳି। ମାତ୍ର ୧୮ ବଲର ସମ୍ମୁଖୀନ ହୋଇ ୧ ଚୌକା ଓ ୬ ବିଶାଳ ଛକା ସହାୟତାରେ ୩୯ ବର୍ଷୀୟ ମଲିକ ୫୪ ରନ୍ ଦର୍ଶନୀୟ ପାଳି ଖେଳିଛନ୍ତି। ମ୍ୟାଚ୍ର ଅନ୍ତିମ ଓଭରରେ ସେ ୫ଟି ବଲ ଖେଳିଥିଲେ। ସେଥିରୁ ସେ ୪ ଛକା ଓ ୧ ଚୌକା ଲଗାଇ ଅର୍ଦ୍ଧଶତକ ପୂରଣ କରିଥିଲେ। ଅନ୍ତର୍ଜାତୀୟ ଟି୨୦ରେ ପାକିସ୍ତାନ ଖେଳାଳିଙ୍କ ମଧ୍ୟରେ ଏହା ଦ୍ରୁତତମ ଅର୍ଦ୍ଧଶତକ।
ତେବେ ଏହା ଚଳିତ ଟି୨୦ ବିଶ୍ୱକପ୍ର ଯୁଗ୍ମ ଦ୍ରୁତତମ ଅର୍ଦ୍ଧଶତକ। ସମାନ ସଂଖ୍ୟକ ବଲରେ ଗତ ଶୁକ୍ରବାର ସମାନ ପ୍ରତିଦ୍ୱନ୍ଦ୍ୱୀ ବିପକ୍ଷରେ ଅର୍ଦ୍ଧଶତକୀୟ ପାଳି ଖେଳିଥିଲେ ଭାରତୀୟ ଓପନର ଲୋକେଶ ରାହୁଲ। ମଲିକଙ୍କ ଅପରାଜିତ ଅର୍ଦ୍ଧଶତକୀୟ ପାଳି ବଳରେ ପାକିସ୍ତାନ ପ୍ରତିପକ୍ଷ ସ୍କଟଲାଣ୍ଡ ଆଗରେ ୧୯୦ ରନ୍ର ବିଶାଳ ଟାର୍ଗେଟ ଛିଡ଼ା କରିଛନ୍ତି। ଅଧିନାୟକ ବାବର ଆଜାମ ୬୬ (୫ ଚୌକା ଓ ୩ ଛକା) ଓ ମହମ୍ମଦ ହାଫିଜ ୩୧ (୪ ଚୌକା ଓ ୧ ଛକା) ରନ୍ର ଇନିଂସ ଖେଳିଥିଲେ।