କଲମ୍ବୋ,୧୫।୯: ଶ୍ରୀଲଙ୍କାର ପୂର୍ବତନ ଅଧିନାୟକ ତଥା ଭେଟେରାନ ଫାଷ୍ଟ ବୋଲର ଲାସିଥ ମାଲିଙ୍ଗା ହଠାତ୍ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ଲାସିଥ ମାଲିଙ୍ଗା ୨୦୨୧ ଟି-୨୦ ବିଶ୍ୱକପ ଖେଳିବାକୁ ଚାହୁଁଥିଲେ, କିନ୍ତୁ ଶ୍ରୀଲଙ୍କା ଚୟନକର୍ତ୍ତା ତାଙ୍କୁ ଟୁର୍ନାମେଣ୍ଟ ପାଇଁ ଚୟନ କରି ନ ଥିଲେ। ଏହାପରେ ମାଲିଙ୍ଗା ଅବସର ଘୋଷଣା କରିଛନ୍ତି। ତାଙ୍କ ଅଧିନାୟକତ୍ୱରେ ଶ୍ରୀଲଙ୍କା ୨୦୧୪ରେ ଆଇସିସି ଟି -୨୦ ବିଶ୍ୱକପ ଟାଇଟଲ ଜିତିଥିଲା। ଲାସିଥ ମାଲିଙ୍ଗା ସହିତ ଜଡିତ ଏକ ମଜାଦାର ତଥ୍ୟ ହେଉଛି ଯେ, ଯେତେବେଳେ ସେ ବୋଲିଂ କରୁଥିଲେ, ସେ ବଲକୁ ଚୁମ୍ବନ କରୁଥିଲେ, ଏହା ପଛର କାରଣ ଜାଣି ଆପଣ ଆଶ୍ଚର୍ଯ୍ୟ ହୋଇଯିବେ। ଏହା ଥିଲା ଲାସିଥ ମାଲିଙ୍ଗାଙ୍କ କୌଶଳ। ମାଲିଙ୍ଗାର ଏହି କୌଶଳ ତାଙ୍କ କ୍ୟାରିୟର ଆରମ୍ଭରୁ ଥିଲା। ମାଲିଙ୍ଗା ବଲ ଫିଙ୍ଗିବା ପୂର୍ବରୁ ଚୁମ୍ବନ ଦେଉଥିଲେ। ଯେତେବେଳେ ମାଲିଙ୍ଗା ନିଜର ରନ ଅପ ଆରମ୍ଭ କରୁଥିଲେ, ସେ ଚୁମ୍ବନ ଦେବା ପରେ ହିଁ ବଲ ଫିଙ୍ଗିଥା’ନ୍ତି। ଏକ ସାକ୍ଷାତକାରରେ ମାଲିଙ୍ଗଙ୍କୁ ଏହାର କାରଣ ପଚରାଯାଇଥିଲା, ସେ କହିଥିଲେ ଯେ ସେ ପ୍ରକୃତରେ ବଲକୁ ସମ୍ମାନ କରନ୍ତି। ମାଲିଙ୍ଗା କହିଥିଲେ, କ୍ରିକେଟ ମୋର କାମ ଏବଂ ମୋ ଜୀବନ ଏଥିରେ ଚାଲିଥାଏ। ଜଣେ ବୋଲର ଭାବରେ ମୁଁ ବଲକୁ ସମ୍ମାନ କରେ। ବଲକୁ ଚୁମ୍ବନ ଦେବା ମୋର ଅଭ୍ୟାସ, ଯାହା ମୁଁ ମୋର କ୍ୟାରିୟର ଆରମ୍ଭରୁ କରିଆସୁଛି। ସୂଚନାଯୋଗ୍ୟ, ଲାସିଥ ମାଲିଙ୍ଗା ହେଉଛନ୍ତି ବିଶ୍ୱର ଏକମାତ୍ର ବୋଲର, ଯିଏ ବିଶ୍ୱକପରେ ଦୁଇଥର ହ୍ୟାଟ୍ରିକ ନେବାରେ ସଫଳତା ହାସଲ କରିଛନ୍ତି।
୨୦୦୭ ବିଶ୍ୱକପରେ ଦକ୍ଷିଣ ଆଫ୍ରିକା ବିପକ୍ଷରେ ଲଗାତାର ୪ଟି ବଲରେ ମାଲିଙ୍ଗା ୪ ଉଇକେଟ ନେଇଥିଲେ। ଏହା ପରେ ମାଲିଙ୍ଗା ମଧ୍ୟ ୨୦୧୧ ବିଶ୍ୱକପରେ କେନିଆ ବିପକ୍ଷରେ ହ୍ୟାଟ୍ରିକ ନେଇଥିଲେ। ମାଲିଙ୍ଗା ହେଉଛନ୍ତି ବିଶ୍ୱର ଏକମାତ୍ର ବୋଲର ଯିଏ ଦିନିକିଆ ରେ ତିନିଥର ହ୍ୟାଟ୍ରିକ ନେଇଛନ୍ତି। ୨୦୧୧ ବିଶ୍ୱକପରେ ନ୍ୟୁଜିଲାଣ୍ଡ ବିପକ୍ଷରେ ମାଲିଙ୍ଗା ମଧ୍ୟ ୧୫୫.୭ କିଲୋମିଟର ବଲ୍ ପକାଇଥିଲେ।
ଲାସିଥ ମାଲିଙ୍ଗାଙ୍କ ବ୍ୟକ୍ତିଗତ ଜୀବନ ମଧ୍ୟ ଅତ୍ୟନ୍ତ ଆକର୍ଷଣୀୟ। ଏହି ବୋଲର ତାନିଆ ମିନୋଲି ପେରେରାଙ୍କ ହସରେ ‘ବୋଲ୍ଡ’ ହୋଇଗଲେ।ଲାସିଥ ମାଲିଙ୍ଗା ଏକ ବିଜ୍ଞାପନ କରିବାକୁ ଆସିଥିଲେ, ସେହି ଇଭେଣ୍ଟର ମ୍ୟାନେଜର ତାନିଆ ଥିଲେ। ଏହି ସମୟରେ ଉଭୟଙ୍କର ପ୍ରେମ ଏବଂ ପରେ ବିବାହ ହୋଇଥିଲା। ଲାସିଥ ମାଲିଙ୍ଗା ଅଗଷ୍ଟ ୨୮, ୧୯୮୩ରେ ଗଲରେ ଜନ୍ମଗ୍ରହଣ କରିଥିଲେ। ତାଙ୍କର ମାରାତ୍ମକ ବୋଲିଂ ହେତୁ ମାଲିଙ୍ଗାଙ୍କୁ ‘ସ୍ଲିଙ୍ଗା ମାଲିଙ୍ଗା’ ମଧ୍ୟ କୁହାଯାଏ।