ମାଲକାନଗିରି,୨୭।୨(ଡି.ଏନ.ଏ.): ୟୁକ୍ରେନ ଓ ଋଷିଆ ମଧ୍ୟରେ ଯୁଦ୍ଧ ଜାରି ରହିଥିବା ବେଳେ ସେଠାରେ ପରିସ୍ଥିତି ଶୋଚନୀୟ ହେବାରେ ଲାଗଛି। ଏଭଳି ସ୍ଥିତରେ ୟୁକ୍ରେନକୁ ପାଠପଢିବାକୁ ଯାଇଥିବା ଅନେକ ଓଡିଆ ଛାତ୍ର ସେଠାରେ ଫସି ରହିଛନ୍ତି। ମାଲକାନଗିରି ଜିଲା ବୁଟିଗୁଡାର ରାଜେନ୍ଦ୍ର ପ୍ରଧାନଙ୍କ ପୁଅ ଅଂଶୁମାନ ପ୍ରଧାନ ମଧ୍ୟ ୟୁକ୍ରେନକୁ ପଢିବା ପାଇଁ ଯାଇ ସେଠାରେ ଫସି ରହିଛନ୍ତି । ଅଂଶୁମାନ ୟୁକ୍ରେନର ଖାର୍କିବ ନ୍ୟାସନାଲ୍ ମେଡିକାଲ ୟୁନିଭରସିଟିରେ ଡାକ୍ତରୀ ପଢୁଥିବା ବେଳେ ପଞ୍ଚମ ବର୍ଷର ଛାତ୍ର ଅଟନ୍ତି। ପୁଅ ୟୁକ୍ରେନରେ ଫଶି ରହିଥିବାରୁ ପରିବାର ଲୋକେ ଚିନ୍ତାରେ ଅଛନ୍ତି। ତାଙ୍କ ଫେରିବା ବାଟକୁ ସମସ୍ତେ ଚାଁହି ରହିଛନ୍ତି । ଗତ ଦୁଇ ଦିନ ତଳେ ଅଂଶୁମାନ ପରିବାର ଲୋକଙ୍କ ସହ କଥା ହୋଇଥିଲେ। ମେଡିକାଲ କଲେଜ ଛୁଟି ଦେଉନ ଥିବାରୁ ଯାଇପାରୁ ନ ଥିବା କହିଥିଲେ। ଅନ୍ୟପକ୍ଷରେ ଶୁକ୍ରବାରଠାରୁ ଅଂଶୁମାନଙ୍କ ଫୋନ ଲାଗୁ ନ ଥିବାରୁ ପରିବାର ଲୋକେ ଭୟଭିତ ଅବସ୍ଥାରେ ଅଛନ୍ତି। ଅଂଶୁମାନ କ୍ୟୁଭର ମେଟ୍ରୋ ଷ୍ଟେସନ ନିକଟରେ ଥିବା ଏକ ବଙ୍କର ମଧ୍ୟରେ ରହିଥିବା ଜଣାପଡିଛି। ଭାରତର ରାଷ୍ଟ୍ରଦୂତଙ୍କ ସହ ପରିବାର ଲୋକେ କଥାବାର୍ତ୍ତା ହୋଇଥିବା ବେଳେ ହଙ୍ଗେରି ଓ ପୋଲାଣ୍ଡ ରାସ୍ତା ଦେଇ ଭାରତ ଅଣାଯିବ ବୋଲି ସେମାନେ ପ୍ରତିଶ୍ରୁତି ଦେଇଥିବା କୁହାଯାଉଛି। ଅଂଶୁମାନଙ୍କ ବଡଭାଇ ଅମ୍ଳାନ ଗତବର୍ଷ ୟୁକ୍ରେନ୍ରେ ଡାକ୍ତରି ପାଠସାରି ଘରକୁ ଫେରିଛନ୍ତି। ସରକାରୀ ସ୍ତରରେ ଅଂଶୁମାନଙ୍କ ସମେତ ଅନ୍ୟ ଯେଉଁ ଓଡିଶା ଲୋକେ ସେଠାରେ ଫସି ରହହିଛନ୍ତି ସେମାନଙ୍କୁ ଉଦ୍ଧାର କରିବା ପାଇଁ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି ।
