ନୂଆଦିଲ୍ଲୀ,୨୯ ।୧୧: କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ଆପତ୍ତିଜନକ ଟିପ୍ପଣିକୁ ନେଇ ଭାରତୀୟ ଜନତା ପାର୍ଟି(ଭାଜପା) ଖୁବ୍ ବର୍ଷିଛି । ଭାଜପାର ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କୁ କ୍ଷମା ମଗିବାକୁ କହିଛନ୍ତି । ସମ୍ବିତ ପାତ୍ର କହିଛନ୍ତି, କଂଗ୍ରେସ ଅଧ୍ୟକ୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନେଇ ଯେଉଁଭଳି ଭାଷାରେ କହିଛନ୍ତି ଏହା କୌଣସି ଦୃଷ୍ଟିରୁ ଆଦୌ ଠିକ ନୁହେଁ । ସେ ତାଙ୍କ ବୟାନ ପାଇଁ କ୍ଷମା ମାଗିବା ଉଚିତ । ସମ୍ବିତ ପାତ୍ର ଦିଲ୍ଲୀରେ ଥିବା ଭାଜପା ମୁଖ୍ୟାଳୟରେ ମିଡିଆ ସହ କଥା ହେବା ସମୟରେ କହିଛନ୍ତି ଖାର୍ଗେ ଯେଉଁଭଳି ଭାବେ ବୟାନ ଦେଇଛନ୍ତି ତାହା ଅତ୍ୟନ୍ତ ଆପତ୍ତି ଜନକ ।
ସମ୍ବିତ ପାତ୍ର କହିଛନ୍ତି ମଲ୍ଲିକାର୍ଜୁନ ଖାର୍ଗେଙ୍କ ବୟାନ ସମ୍ପୂର୍ଣ୍ଣ ରୂପେ ଭୁଲ । ଗୁଜରାଟର ପୁଅ ପାଇଁ ଖାର୍ଗେ ଯେଉଁଭଳି ଭାଷାର ବ୍ୟବହାର କରିଛନ୍ତି ତାହା ଆଦୌ ଠିକ ନୁହେଁ । ତାଙ୍କର ଏହି ବୟାନ କଂଗ୍ରେସର ମାନସିକତାକୁ ଦର୍ଶାଉଛି । ଏହା ନା କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅପମାନ ବରଂ ପ୍ରତିଟି ଗୁଜରାଟିଙ୍କର ଅପମାନ ।
ସୂଚନାଯୋଗ୍ୟ, ଖାର୍ଗେ ପ୍ରଧାନମନ୍ତ୍ରୀ ମୋଦିଙ୍କୁ ନେଇ ଟିପ୍ପଣି କରିବା ସମୟରେ କହିଥିଲେ, ପିଏମ ମୋଦି ସବୁବେଳେ ନିଜ କଥା କହିଥାଆନ୍ତି । ଆପଣମାନେ କିଛି ଦେଖନ୍ତୁ ନାହିଁ କେବଳ ମୋଦିଙ୍କୁ ଦେଖି ଭୋଟ ଦିଅନ୍ତୁ । ଏବେ ତୁମର ମୁହଁ କେତେଥର ଦେଖିବୁ । କର୍ପୋରେଶନରେ ତୁମର ମୁହଁ ଦେଖିଲୁ, ଏମଏଲଏ ଇଲେକ୍ଶନରେ ତୁମ ମୁହଁ ଦେଖିଲୁ ମଧ୍ୟ ନିର୍ବାଚନରେ ବି ତୁମ ମୁହଁ ଦେଖିଲୁ, ସବୁ ସ୍ଥାନରେ… କେତେ ମୁଣ୍ଡ କି…କ’ଣ ଆପଣଙ୍କର ରାବଣ ଭଳି ୧୦୦ ମୁଣ୍ଡ । ଖାର୍ଗେଙ୍କ ଏହି ବୟାନକୁ ନେଇ ଏବେ ଭାଜପା କଂଗ୍ରେସକୁ ଟାର୍ଗେଟ କରିଛି ।